Sáni Mateo 12
12
Jurhenkorherichaksï sábadu tríju kuarhats'ïkuxapti
(Mk 2.23-28; Lk 6.1-5)
1Jesusi sábadu ma jimpo, tríju jatsikatarhu isï parhiakuxapti, ka jurhenkorheri jémpechaksï tríjuni kuarhats'ïkupaxapti ka arhasïremptiksï jimpokaksï karhimaxapka. 2Fariseuechaksï jurhenkorherichani exearini, Jesusinksï arhispti: “Eraa chéti jurhenkorherichani, iásï enka mintsikorhekuek'a, imani ampeksï úxati enka juramukua no jiáretpek'a.” 3Ka Jesusi arhiantaaspti: “¿Anti nóts'ï méni arhintaski ampe enka úpka Dabi, jiák'ani enka ima ka pámpiri jémpechaksï k'arhimani jápka? 4Na enka Dabi tiósïo inchapka ka kurhinta úch'akurakatechanksï auaspti enkaksï no sésekua jatsipka arhani, enkaksï tátechak'u sésekua jatsik'a arhani. 5¿Anti Moisesiri juramukuarhuts'ï no arhintaski? Na enkaksï sábadu, tátecha ánchekorhek'a ka nóksï k'amanharhiranhantasïnti. 6Jíksïni arhixaka, eska ixu jarhaska ima enka sánteru k'érika eska tiósïo. 7Enkats'ï jánhaskapirinka ampe enka arhikuekak'a: ‘P'amok'perakuasïni uék'a ka no parhantikua kéts'ïtakua ampe’, nóts'ï ísku jatini k'amanharhirantaapirinka imani enkaksï nómpe ma arhikueka. 8Ka Acheti Uáp'a, sábadut'u juramukua jatsisti.”
Jesusi sábadu p'amenchatini ma ampakerantasti
(Mk 3.1-6; Lk 6.6-11)
9Jesusi kéntikusti ka jima anapu k'umanchekua tánkorhentskuarhu inchaspti. 10Ka jima jarhaspti ma enka ma akantani k'urhuk'upka, ka nónaksï Jesusini k'amanharhitant'a'ni ísïksï kurhamarhespti: “¿Anti sésekua jarhaski sábadu ampakerpentani?”
11Ka Jesusi arhiaspti: “Jaki cha ma ísï enka karichini ma kámka, ka karichi sábadu nani uekanheni, ¿Anti nóts'ï p'ínhantasïnki? 12¡Néuek'i sánteru jukaparhasti eska karichi ma! Ísï jimpo sésekua jarhasti sábaduechani sési ampe úni.”
13Ka k'urhuk'urhani arhispti: “Ióxurhantsï.” Ka k'urhuk'urha ióxurhant'aspti, ka sési ampak'urhantaspti eskamentu máteru akantani. 14Ka fariseuecha enkaksï uéntapka, eratsekuntaxapti néna enkaksï Jesusini uántikupirinka.
Jesusi Diósïri jántspiristi
15Jesusi mítetini ampe enkaksï eratseni jápka, kéntikukuaspti, ka uánekuaksï chúxapaspti ka ima iámentuechani ampakerantaaspti, 16ka juramukuasïrempti eskaksï no jámapirinka imeri ampe uantant'a'ni; 17ka ísï úkorheni enka Diósïri uantari Isaiasï uantaka:
18“Ísti jucheti jántspiri enkani ji erakuka,
enkani ji xáni uék'a,
enka jucheti álmani xáni tsíperak'a.
Jucheti Espirituni inteni antats'ïteraaka
ka iámentu iretechani aiankuantauati
ampe enka Diósï uék'a.
19No uantakorheati ka nót'u uinhachaati,
ka xanharu isï nónema kurhauati.
20No k'amatakuati p'atamuni enka kuarhats'ïtini jaka,
ka no párhutaati piruakuani enka sïraantsïnterku jakaia,
eka no urheta xérpeaka ampe enka Diósï uék'a.
21Ka iápuru isï anapuechaksï imeri jakankurhikuani mintsikaati.”
Jesusinksï arhiparhataxapti eska ima nóampakitiska
(Mk 3.20-30; Lk 11.14-23; 12.10)
22Jesusinksï achetini ma pérakuspti enka nóampakiti incharhepka, ka enka pátenharhipka ka nunuxini, ka Jesusi ampakerantaspti ka ima úspti exeni ka uantani. 23Iámentuksï ísku pakareraspti ka uantasïremptiksï: “¿Íxamu Dabidi Uáp'e?” 24Ka fariseuechaksï ísï kurharini uantasïrempti: “I Belsebu, k'éri nóampaki jimposï nóampakitichani petarhpeantat'i.”
25Jesusi mítetini ampe enkaksï ima eratseni jápka, arhiaspti: “Eka irechekua ma arhukurhitini jauaka, ima irechekua k'amakurhiati, ka nóma k'éri ireta óksï ma k'umanchekuarhu anapuecha jauatiteru enkaksï arhukurhitini jauaka. 26Ka eka nóampakiti jantiok'u uérhekorhent'aska, arhukurhitixati; ¿Imeri irechekua néna jauateru? 27Ka ekani ji nóampakitichani, k'éri nóampakitini jimpo petarhep'eantak'a, ¿Ne jimpoksï petarhpeantasïnki ima enkaksïni chánksïni chúxapak'a? Imaksïni xarhataxati eskats'ï cha támu ísï jámaxaka. 28Ka ekani ji nóampakitichani Diósïri Espirituni jimpo petarhpentak'a, sési jimpo, Diósïri irechekuaksïni janochestia.
29¿Néna ua nema acheti uinhapitini ma inchakuni, ka jatsikorhekua ampe iámu petakuni? Eka no urheta jótaska, jiák'ani k'óru úati ampe petakuni.
30Ima enka no jínteni jinkunika, ikiachesïntirini, ka ima enka no jínteni jinkuni tánantak'a, arhukpesïnti.”
31“Ísï jimpoksïnisï ji arhini jaka, eska náki uék'i ma k'amanharhintskua ka nósesi ampe enkats'ï uantaaka, púamenhantaakats'ï. K'óru ima enka Espirituni útakuaka, nómeni púamenhantaati. 32Ne uék'i enka Acheti uáp'ani útakuaka, púamenhantaati, k'óru ima nómeni púamenhantaati enka Espiritu Sántuni útakuaaka.”
Anhatapu ampakitini
(Lk 6.43-45)
33“Enka anhatapu ampakek'a, amanhech'akua ampakesïnti, ka enka anhatapu no ampakek'a, amanhech'akua no ampakesïnti; amanhech'akua anhatapu jimpo exenhasïnti. 34¡Akuitseni járhaticha! ¿Néna jimpots'ïsï no ampakeparini sési ampe uantak'i? Ampe enka mintsitarhu jatanhenhak'a ima ampe uantanhasïnti. 35Ima enkaksï amparhaka, sési jásï mintsita jimpoksï, sési ampeksï uantasïnti, ka nóamparhatichaksï nósesi jásï ampe uantasïnti, jimpokaksï nósesi jásï ampe jatarixaka. 36Ka jíksïni arhixaka eska ima jurhiatekua enka arhinharhikperanhaaka, eska táchani ísï mókukorhenhaaka ísku jásï uantakuechani jimpo enka xáni uémuskorhenhaka. 37Ampe enkari uantaaka, imani jimpori arhikua o nómpe ma arhikueuaka.”
Máruksï mínta exekuekaxati
(Mk 8.12; Lk 11.29-32)
38Máruksï juramukua jurhentpiricha ka fariseuechaksï mókukuntaspti: “Jurhentpiri, milagruchi ma uékasïnka exeni.” 39Ka Jesusi arhiantaaspti: “Iásï anapu no amparhaticha ka ísku jántichaksï milagru ma kurhak'orhexati, k'óruksï nóteru ma milagru xarhatamenhaati, imantku enka Diósïri uantari Jonasi úmenhaka. 40Eskamentu Jonasi tanimu jurhiatekua na jápka k'éri kurucheri k'úparhatarhu, Acheti uáp'at'u tanimu jurhiatekua echerirhu inchatsetini jauati. 41Nínibe anapuechaksï iásï anapuechani útatsperakuarhu arhinharhikuauati, jimpokaksï ima Jonasiri arhits'ïkperatani kurharini, Diósïni antarhent'aska, ka ima enka ixu jaka, Jonasi jinkuni sánteru k'éristi. 42Nana irecha kétsekua ísï anapu, iásï anapuechani útatsperakuarhu arhinharhikuauati, jimpoka ima iauani uératini jurhaspka Salomoniri mímixekuani kurhani, ka ixu jarhasti ima enka Salomoni jinkuni sánteru k'érika.”
Nósesi jásï espiritu enka ménteru incharhpentak'a
(Lk 11.24-26)
43“Enka nósesi jásï ma espiritu uérhpentak'a, k'arhikjantu jámani jarhasïnti jirinhantani nani mintsikorheni, ka no exent'asïnti. 44Jiák'ani uantasïnti: ‘Juchenio níntaaka.’ Ka enka niántak'a, nónemani exent'asïnti ka sési k'arhatakata ka sésesi ampantskantskata jarhasïnti. 45Ka nirasïnti ka pát'aasïnti máteru iúmu tsimani espirituechani, sánteru nóamparhatichani, ka incharhpesïntiksï ka jimaksï irekorhesïnti, ka acheti sánteru nósesi úkorhenchasïnti. Iásï anapuechat'uksï mák'ueni úkorhenchaati.”
Jesusiri amampa ka erachi jémpecha
(Mk 3.31-35; Lk 8.19-21)
46Enka Jesusi útasï uantani jápka, amampa ka erachi jémpechaksï uérakua jarhaspti, ka ima jinkunksï uantaxeni uékaxapti. 47Ka nema Jesusini arhispti: “Chéti nánte ka chéti erachichaksï uérakua jarhasti, ka t'únkeni jinkunksï uékasïnti uadaxeni.”
48Jesusi arhintaspti imani enka íni ampe arhini jápka: “¿Néski jucheti nánte ka néksïsï jucheti erachi?”
49Ka jurhenkorheri jémpechani t'antsiraaparini uantaspti: “Íksïsï jucheti nánteti ka jucheti erachinksï, 50jimpoka ima enka úk'a ampe enka jucheti Táte uék'a enka auantarhu jaka, jucheti erachisti ka jucheti pirenchisti ka jucheti nántesti.”
Terpilih Sekarang Ini:
Sáni Mateo 12: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
