Sáni Mateo 14
14
Na enka Juánu itsï atats'ïkpiri uántikunhaka
(Mk 6.14-29; Lk 9.7-9)
1Ima jurhiatekuechani, Erodesi Antipasï enka Galilea juramuni jápka, Jesusiri ampe mítespti, jimpoka imeri ampeterku uantanhaxapkia, 2ka arhiaspti imeri jántspirichani: “I Juánu itsï atats'ïkpiristi, tsíntasti, jimposï xásï uinhapekua xarhatat'i.”
3Ma xanhari Erodesi Juánuni jupirkorhespti ka ónhatarkorheni, Erodiasïni jimpo, enka imeri erachi jémpa Filipueri témpepka. 4Jimpoka Juánu arhisïrempka: “Nóri sésekua jatsiska inteni uarhiti jinkuni jarhani.”
5Ka Erodesi uékasïrempti Juánuni uántikuni, k'óru iretani chérhesïrempti jimpokaksï Juánuni Diósïri uantarini exesïrempka. 6Ka jiák'ani enka Erodesi máteru uéxurhini antankutapka, Erodiasï uáp'a uátsï, kép'espti uarhani, ka Erodesi kánekua jaiapanhentaspti, 7enka aiakorhepka íntskuni iámentu ampe enka ima kurhakupirinka. 8Ka t'uíni amampa arhistakutixaptia, ka ima nanaka Erodesïni arhispti: “Iáiasïrini Juánu itsï atats'ïkpiriri ép'uni íntsku urhani ma jimpo.”
9Ka irecha Erodesï kánekua kómu p'ikuarheraspti, jimpoka p'ímarhekatechani japarini aiakorhespka, ka juramuspti eskaksï íntskupirinka. 10Juramusti eskaksï Juánuni k'ataperakuarhu kachuch'akupirinka. 11Ka uátsïnksï Juánueri ép'u urhanirhu ma pákuspti, ka ima amampani íntskuntaspti. 12Juánueri jurhenkorherichaksï niraspti Juánuni p'íntani ka jatsintasptiksï, ka tátsekuaksï niraspti Jesusini aiankunt'ani.
Jesusi iúmu míli t'irerpesti
(Mk 6.30-44; Lk 9.10-17; Jn 6.1-14)
13Enka Jesusi mítepka, jantiok'u icharhutarhu ma jimpo niraspti jima enka nónema jámempka. Enka mítekorhepka, iretecharhu uéakunhaspti ka xanharakorhepasptiksï chúxapani. 14Enka Jesusi icharhutarhu kétseni jápka, uánekua exep'espti; ka p'amok'uaspti ka p'amenchatichani ampakerantaaspti. 15Ka tirimarhantu, jurhenkorheri jémpechaksï antarheraspti ka arhisptiksï: “Ixuesï no irekanhasti ka chúrexatia. Axap'entsï, jurakue ninhani iretecharhu t'irekua ampe piákorhenhani.” 16Ka Jesusi arhiaspti: “Ampet'uksï úni niua; cha t'ireraa je.” 17Ka imaksï uantaspti: “Iúmu kurhintechani ka tsimani kuruchechantkuchisï káani jaka.” 18Ka Jesusi arhiaspti: “Juácheats'ïni je.” 19Jiák'ani juramuspti eska uitsakuarhu uaxantenhapirinka, ka iúmu kurhintechani ka tsimani kuruchechani p'íkuaspti, ka erancheparini úch'akuraspti, ka jurhenkorheri jémpechani íntsaapti ka imaksï etsakuspti. 20Iámentuksï uiniarhantaspti t'ireni, ka pakarakataksï témpeni tsimani tsïkiata uiniri tánantaspti. 21Ka ima enkaksï t'irepka iúmu míli ísïsptiksï, ka no miiuaparini uarhitichani ka sapichani.
Jesusi itsïrhu xanharaspti
(Mk 6.45-52; Jn 6.16-21)
22Ísï tátsekua, Jesusi jurhenkorheri jémpechani arhiaspti eskaksï icharhutani jatant'a'pirinka, ka eskaksï urheparinka japuntarhu parhimeni enka jamperi ima axap'entapirinka. 23Ka enka axap'entapkia, jantiok'u juátarhu ma karhamaspti kómarhani, ka chúrekua juátarhu jantioterku pakaraspti. 24Ka icharhuta terumeni ísï niraxaptia, ka jenkuerakuechaksï manamananhtsïtaxapti icharhutani jimpoka tarhiata k'uanhaskuntasïrempka. 25Ka erantepakua, Jesusi niraspti chúxapaani itsïrhu xanharapani. 26Ka jurhenkorherichaksï exerini eska itsïrhu xanharaxapka, kánekuaksï chéspti ka chérakorhetinksï uinhachasïrempti “¡Uarhicha ma!” 27K'óru Jesusi jimak'u uantap'aaspti: “¡Ásï che je, jíska!” 28Ka Pédru arhispti: “Tata enkari t'úeka, juramu eskakini ji úaka antarheraaka itsïrhu xanharapani.” 29Ka ima arhispti: “Juíni.” Ka Pédru icharhutarhu kétsetini, itsïrhu xanharaxapti Jesusini antarherani. 30K'óru exerini na enka uinhamentu tarhiani jápka, chérakorhespti ka inchamexaptia. Ka uinhachaspti: “¡Tata p'ímantsïrini!” 31Ka Jesusi jupik'uspti ka arhispti: “¡Xáni enkarini no mintsikak'a! ¿Antirisï tsimantsimanea?” 32Ka enkaksï icharhutarhu jatant'a'pka, nóteru tarhiaspti. 33Ka ima enkaksï icharhutarhu jápka, Jesusinksï antarheraspti ka tinkuixurhikusptiksï arhini: “Sési jimpori t'u Acha Diósï Uáp'eska.”
Jesusi Genesareti p'amenchatichani ampakerantaasti
(Mk 6.53-56)
34Enkaksï japuntarhu parhikupka, Jenesaretiksï niáraspti. 35Ka enkaksï jima anapuecha Jesusini mítent'apka, aiankuantaasptiksï iámentu jimak'u isï anapuechani, ka imaksï iámentu p'amenchatichani pákuaspti; 36ka kómarhisïremptiksï eska jurak'uapirinka sununtak'u jupirhukukuni. Ka ima enkaksï p'árhempka ampakentasïremptiksï.
Terpilih Sekarang Ini:
Sáni Mateo 14: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
