Sáni Mateo 11
11
1Enka Jesusi k'amarapka jurhenkorheri jémpechani arhistakuani ampe enkaksï xáni úpirinka, kéntikuspti, ka ampakiti aiankperakuani máteru iretecharhu niraspti aiankpeni ka jurhentpeni.
VI. AMPE ENKA JESUSI XÁNI ÚKA
(11.2—12.50)
Juánu itsï atats'ïkpiriri ánchperata úricha
(Lk 7.18-35)
2Juánu itsï atats'ïkpiri k'ataperakuarhu jatini kurhach'pespti ampe enka Krístu úni jápka, ka tsimani jurhenkorheri jémpechani axaaspti eskaksï nipirinka Jesusini 3kurhamarheni: “¿T'úeski ima enka jupirinka, óchi máteruni erokaa?”
4Ka Jesusi arhiaspti: “Níntsï je ka aiankuntsï je Juánuni ampe enkats'ï exeni jaka ka kurhani jarhani. 5Pátenharhichaksï exexati, ka chkéch'uechaksï xanharaxati ka xúta jukarichaksï ampakentaxati; ka kántichaksï kurhaxati ka uarhirichaksï tsíntaxati, ka kómu jántichaksï ampakiti aiankperakuani aiankunhantaxati. 6Tsípeksï ima enkaksï jínteni jimpo nómpe ma nósesi exek'a.”
7Enkaksï Juánueri jurhenkorhericha k'uanhatsentani jápka, Jesusi Juánueri ampe ísï uantaspti: “¿Anti ampets'ï niraski exeni jima enka no irenhaka? ¿P'atamuntkuts'ï niraski exeni enka tarhiata juírhuskaka? 8¿O ampets'ïsï niki exeni? ¿Achetini ma enka ampakiti ampe xukuparhatini jaka? Ima enkaksï ampakiti ampe xukuparhak'a, irechoksï jarhasti. 9Jiák'ani, ¿Néntsïsï niki exeni? ¿Diósïri uantarini ma? Jo, ísïsti, ka sánteru k'éri ampe eska Diósïri uantari ma, 10jimpoka interi ampesï karakata jaka:
‘Jíkini urhetatachepaxaka
jucheti uantakua párini,
enkakini xanharini
p'arhikjantskachepaaka.’”
11“Sési jimpoksïni arhixaka, eska nómeni antap'enuxapka sánteru k'éri ma eska Juánu itsï atats'ïkpiri, ka k'óru ne enka auantarhu anapu irechekuarhu sánteru sapichueka, Juánu jinkuni sánteru k'éri ampesti.”
12“Jiák'ani uératintki enka Juánu itsï atats'ïkpirika ka iásï jamperi, auantarhu anapu irechekua uinhamu etsakurhixati, ka uiuinharhatichak'uksïsï úati inchani, náuek'i ima enkaksï no jiókorhek'a jánkorhent'ani jaka k'amak'uni. 13Diósïri uantaricha ka juramukua, Diósïni jimpoksï uantasti jiák'ani jamperi enka Juánu arhits'ïkpeka. 14Ka ekats'ï uék'a íni ampe kurhankuni, Juánu Eliasïsti, ima enka jupirinka. 15Ne enka jurhenaka kurhani, kurhankunte.”
16“¿Ampe jinkuni terukutant'a'ua iásï anapuechani? Tumpinksï járhasti enkaksï kópekuarhu uaxapek'a pámpiri jémpechani uinhachakuani: 17‘Kústacheskaksïni ka nóts'ï uarhaska; mískorheteriksïni kústacheska, ka nóts'ï sáni ueraska.’ 18Jimpoka Juánu ixu jámaxapka, ima enka no t'irempka ka ni kauikua ts'ému, ka cháts'ï ísï uantasïnka eska nóampakiti incharhetixapka. 19Ka iásï acheti uáp'a jurhasti, enka t'irek'a ka kauikuat'u ts'émuni ka cháts'ï uantasïnka: ‘I jukari t'iresïnti ka kauini, ka tumina tánaticha ka k'amanharhintsticha jinkuni jámasïnti.’ K'óru Diósïri mímixekua, jánkuarhu xarharasïnti.”
K'érati iretechaksï xerenhantaati
(Lk 10.13-15)
20Jesusi xukaaspti imani iretechani enka xáni milagruechani úapka, jimpokaksï ima Diósïni no antarhent'aska ka arhiaspti: 21“¡Áke t'u Korasini! Ka ¡Áke t'u Betsaida! Jimpoka enkaksï Tíro ka Sidoni únhapirinka milagruecha enkaksï chénio únhaka, iátkipirintia eskats'ï móantatini japirinka ch'erapiti xukuparhantatini ka t'upuri jápu atats'ïparini. 22Sési jimpoksïni arhixaka eska imani jurhiatekua enka arhinharhikperanhaaka, Tíro ka Sidoni nóksï xáni k'amanharhiranhant'aati eskats'ï cha na k'amanharhiranhantaaka. 23Ka t'u Kafarnaumi, ¿Anti eratsexakiri eskari auantarhu k'érikuarhu péranhaaka? Sánteruri kénhekua k'uaninhanhaaka, jimpoka enkaksï Sodoma únhapirinka milagruecha enkaksï chénio únhaka, ima ireta japirintiteru. 24Ísï jimpoksïnisï arhini jaka, eska ima jurhiatekua enka arhinharhikperanhaaka, nóksï xáni k'amanharhiranhant'aati Sodoma anapuecha, eskari t'u na k'amanharhiranhantaaka.”
Jesusi Diósïni k'éri ampe arhisti
(Lk 10.21-22)
25Imani jurhiatekuechani jimpo, Jesusi uantaspti: “Táte, auanta ka parhakpeniri Acha, k'éri ampekini arhisïnka, jimpokari mímixetichani ka jánhaskatichani íni ampe jískakuaska, ka sapirhatichanti xarhatakuaska. 26Jo Táte, jimpokari t'u ísï tsitiska.”
27“Jucheti Táterini iámentu ampe jurak'uchesti. Tátek'usï Uáp'ani míteti, ka Uáp'ak'usï Táteni míteti, ka Uáp'a ne enkani uékauaka mítetaraani.” 28“Juini je jínteni jinkuni cha enkats'ï kuataratini jaka xáni ánchekorheni, ka cha enkats'ï xáni uantanheani jaka, jíksïni mintsikustaaka. 29Jucheti uanach'akuani pa je, ka jurhenkorhe je, ka ísï jama je eskani ji na jámka, jíchkani tekaantasïnka ka sési jimpo kétsekua uérasïnka, ísïts'ï mintsikorheaka. 30Jimpoka jucheti uanach'akua no p'atuch'akpesïnka ka no k'uetsapesti ampe enkani ji párpek'a.”
Terpilih Sekarang Ini:
Sáni Mateo 11: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
