Sáni Mateo 10
10
V. JURHENTPIRICHANI ARHIANI AMPE ENKAKSÏ ARHITS'ÏKPEAKA
(10.1—11.1)
Jesusi témpeni tsimani jurhenkorherichani erakuasti
(Mk 3.13-19; Lk 6.12-16)
1Jesusi témpeni tsimani jurhenkorheri jémpechani erakuaspti, ka juramukua íntsaaspti nósesi jarhati espirituechani petarhpeantaani, ka mámaru jásï p'amenchakuechani ka p'ikuarherakuechani ampakerpeantaani.
2Ístiksï témpeni tsimani jurhenkorhericha: Simoni uénani enka Pédru arhinhempka; ka erachi jémpa Andresï; ka Juánu, Sebedeo uáp'echa; 3ka Felipe ka Bartolome ka Tomasï; ka Mateo tumina tánantsti; ka Jakobu Alfeo uáp'a; ka Lebeo enkat'uksï Tadeo arhimpka; 4ka Simoni uarhipiti ka Júdasï Iskariote, ima enka Jesusini intsïnharhitpepka.
Jesusi jurhenkorherichani jurhentpeni axaasti
(Mk 6.7-13; Lk 9.1-6)
5Íni témpeni tsimani, Jesusi axaani jámani arhistakuaspti: “No jakak'uticheri xanhari jimpo ásï ni je, ka Samaria anapu iretecharhu ásï inchaaku je, 6sánteru sáni karichi tsînchekatecha Israeli anapuecha jinkuni ni je. 7Ka arhits'ïkpeakats'ï eska auantarhu anapu irechekua janoxakaia. 8P'amenchatichani ampakerantaa je, ka uarhirichani tsítant'a'a je, ka xúta jukarhekorherichani p'ikurheantaa je, ka nóampakitichani petarhpeantsï je. Cháts'ï ísku intsïnhaska íni ampe, chát'u ásï ampe ma kurhak'orhe je.”
9“Tumina ásï p'át'akorhe je, méntku nóma jásï; 10sutupu ka mórhekorhekuat'u ásï pát'akorhe je, o kuarhachi o tenhexkorhekua ka imani ampe enkats'ï xanhari jimpo uétarhenchapaaka, jimpoka ánchekorheri ma sésekua jatsisïnka eska t'ireranhaaka.
11Ka enkats'ï k'éri iretarhu ma o sapichu iretarhu ma niáraaka, jirinhantsï je nemani enkats'ï mintsinharhiaka, ka imecho pakara je enkats'ï jamperi uéakuntaska. 12Ekari nani niáraaka, jima anapuechani sési uantap'aa. 13Ka ekaksï jima anapuecha jukanchaka eskaksï uantap'anhaaka, chéti sési jakua imani k'umanchekuarhu jauati; k'óru ekaksï jima anapuecha no jukanchaka eskaksï uantap'anhaaka, sési jakua no jima pakaraati. 14Ka enkaksïni nema nósesi erokaaka, ka nóksïni kurhani, ima kumanchekuarhu o iretarhu uéakuntsï je ka t'upuri sésisesi uauantuntsï je. 15Sési jimpoksïni arhixaka eska jurhiatekua enka útatsperanhaaka, ima iretarhu anapuechaksï sánteru k'amanharhiranhant'aati eskaksï Sodoma ka Gomorra anapuecha.”
Atanhantsï kánhaaka
16“Jíksïni karichini axaxaka jimesï enkaksï jiuatsïcha uánekua jámka, jinkuntku jáma je, ísï eskaksï akuitsecha ka jipunicha na jámka.”
17“Jinkuntku je, jimpokaksïni juramuticha jinkuni páaka, ka k'umanchekua tánkorhentskuecharhuksïni k'uikirheati, 18ka ístuts'ï jínteni jimpo k'érati juramuticha jinkuni pánhaaka ka irechecha jinkuni; ísïts'ï úaka jima uantant'a'ni jucheti ampe ka iámentu iretechani mítetaraani. 19Ka enkats'ï juramutichani jinkuni pánhaaka, ásï jáma je uantanheani ampe o nénats'ïsï uantaa, jimats'ï jánhastanhaaka ampe enka k'uanik'a uantani, 20jimpokats'ï no chásï uantaaka, chári Táteri Espirituksïnisï uantaraati.”
21“Márkuechaksï uantikperaati, ka tátechaksï uáp'echani uantikuauati, ka sapichaksï tátjempani ka amampani mókukuati ka uántikuauatiksï. 22Jucheti jakankurhikua jimpoksïni kurhunheati; k'óru ima p'ímutantskateuati enka tekaantaaka k'amarhuni jamperi. 23Enkaksïni ireta ma jimpo atakuekaaka, máteru iretarhu ni je sïpakorheni. Sési jimpochkaksïni arhixaka eska Acheti Uáp'a junkuaka enkats'ï nótki iápuru Israeli anapu iretecharhu nirani jauaka.”
24“Jurhenkorheri ma no sánteru k'éri ampesti eska jurhentpiri jémpa, ka jántspiri mát'u no sánteru k'éri ampesti eska imeri ánchetpiri. 25Nósesisti eska jurhenkorheri jurhentpirini uanokuaka. Ka enkaksï tekaak'a Belsebu arhini imani enka chéni jémpo k'érika, ¡Nénaksï no tekauaia sánteru nósesi arhiani chéni jémpo anapuechani!”
Ásï chérhpe je
(Lk 12.2-7)
26“Ásï chérhpe je, jimpoka mítekorheaka iámentu ampe enka no mítekorheka, ka xarhatanhantaati ampe enka jískakata jaka. 27Ampe enkaksïni páp'akantu arhik'a, cháts'ï jurhiatekua uantant'a'aka, ka ampe enkaksïni ji arhintikuni jaka, taiats'ïtakatecharhu uératini uinhacha je uantant'a'ni. 28Ásï chérhea je uántikpitichani, jimpokaksï no úsïnka mintsita uántikutspeni; sánteru sántsï imanisï chérheaka enka anhanhatakuani ka tsípekuani chpírirhu k'uanip'ak'a.
29¿Anti cha no míteski, eskaksï tsimani kuínicha ma taiakata jimpok'usï piánhak'a? Ka eska nóma uekorhent'asïnka eka chári Táte no uékaaka. 30Ísï jimpo, jauiri jamperits'ï sési miiumenhatixaka. 31Ásï che je: Cháts'ï sánteru jukaparhaska eskaksï kuínicha.”
Jesusi jinkunini
(Lk 12.8-9)
32“Eka nema uánekuechani japarini uantaska eska jínteni jinkuniska, jít'uni ima jinkunini uantaaka jucheti Táteni japarini enka auantarhu jaka. 33Ka eka nema uánekuechani japarini uantaaka eska no jínteni jinkuniska, jít'uni no ima jinkunini uantaaka jucheti Táteni japarini enka auantarhu jaka.”
Jesusini jimpo uarhiperanhaati
(Lk 12.51-53; 14.26-27)
34“Ásï ísï eratse je eskani ji parhakpeni sési páp'erakuasï juka juáni, nósesi páp'erakuasïni juka juáni, uarhiperata ampesïni juáka. 35Eska tataka, tátjempani mókukuaka, ka eska nanaka amampani mókukuaka, ka tarhampa tarhampirini mókukuni, intenisïni juka juáni. 36Ísï jimpo, márkuechaksï kurhunhperaati.”
37“Ne enka tátjempani ka amampani sánteru uékaaka eska jínteni uékani, no nitatarhenchasïnti jínteni jinkunini, ka ne enka uáp'echani sánteru uékaaka eska jínteni, no nitatarhenchasïnti jínteni jinkunini. 38Ka ne enka no ichantikorheaka krúsini ka chúxapantini, no nitatarhenchasïnti jínteni jinkunini. 39Ima enka tsípekuani patsakorhekuekaaka, tsîtaati, k'óru ima enka imeri tsípekuani jínteni jimpo tsîtaaka, p'ímutantskorheati.”
Diósï maiampentaati
(Mk 9.41)
40“Ima enkaksïni sési erokaaka, jíntentsïnisï sési erokani jati, ka ne enkarini sési erokani jaka, sési erokaxati imani enkarini axaka. 41Ne enka Diósïri uantarini ma mítent'aakaka ísï sési erokani, méntkueni antakua intsïnhaati eska Diósïri uantari ma, ka ne enka kaxumpitini ma sési erokaaka, kaxumpitiri itsïmperata intsïnhaati. 42Eka nema, jucheti sapini ma ísïni itsï ts'irapiti íntskuaka, jimpokarini jínteni chúxapasïnka, sési jimpoksïni arhisïnka eska intsïmperakua antakorhetixakaia.”
Terpilih Sekarang Ini:
Sáni Mateo 10: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
