Sáni Mateo 9
9
Acheti ma enka no úempka manakorheni ampakeranhantasti
(Mk 2.1-12; Lk 5.17-26)
1Tátsekua enka Jesusi k'éri icharhutarhu jatant'a'pka, parhikuntaspti ka imeri iretarhu niántaspti. 2Ka jimaksï pérakuspti k'uírakua ma jimpo achetini ma enka no úempka manakorheni. Jesusi exearini eskaksï ima kánekua mintsikaxapka, p'amenchatini arhispti:
–Jucheti uátsï, uinhapekorhentsï, k'amanharhintskuechaniri púamenhantaskia.
3Ka máruksï kararicha arhip'eraxapti: “I Diósïni útakuxati.” 4Jesusi mítetini ampe enkaksï eratseni jápka, uantaspti:
–¿Antits'ïsï xáni nósesi jásï ampe p'ikuarhenhek'i? 5¿Ampe sánteru no ts'unhapeski, uantani: “K'amanharhintskuechaniri púamenhantaskia arhini, o jauara ka xanhara arhini?” 6Jíksïni exeraaka eska Acheti Uáp'a, parhakpeni juramukua jatsiska k'amanharhintskuechani púatspeantaani.
Ka arhispti imani enka no úempka manakorheni:
–Jauara ka k'uírakuani k'arhakorhentsï ka níia níntani.
7Ka ima acheti jauaraspti ka níntaspti. 8Ísï exenhatini, kánekua chérakorhenhatixapti ka Diósïnksï k'éri ampe arhispti jimpoka xásï juramukua íntspespka.
Jesusi Mateoni uantap'asti
(Mk 2.13-17; Lk 5.27-32)
9Enka Jesusi jima kéntikupka, achetini ma exespti enka Mateo arhinhempka, enka tumina tánantskuarhu uaxakatini jápka ka arhispti:
–Chúxapurini.
Mateo jauaraspti ka chúxapaspti.
10Ísï tátsekua, enka Jesusi Mateuo t'ireni jápka, uánekuaksï tumina tánaticha ka k'amanharhintsticha niáraspti, ka uaxakasptiksï t'ireni jima enka Jesusi jurhenkorheri jémpecha jinkuni jápka. 11Enkaksï fariseuecha exepka arhiasptiksï jurhenkorherichani:
–¿Antisï chári jurhentpiri tumina tánaticha ka k'amanharhintstichani jinkuni t'ireni jaki?
12Jesusi ísï kurharini arhiaspti:
–P'amenchatichaksïsï tsinap'irini uétarhenchat'i, nóksï ima enkaksï sési jámani jaka. 13Ni je ka jurhenkorhe je ampe enka arhikuekak'a “P'amop'erakuasïni uék'a ka no parhantikua kéts'ïtakua ampe.” Jimpokani ji no kaxumpitichanisï ióarhiantaani juka, k'amanharhintstichanisïni juka ióarhiataani.
Jesusinksï k'arhinta jakueri ampe kurhamarhesti
(Mk 2.18-22; Lk 5.33-39)
14Juánu itsï atats'ïkpiriri jurhenkorherichaksï, Jesusini antarheraspti ka kurhamarhesptiksï:
–¿Antisïni jucha ka fariseuechaksï mémechani k'arhinta jarhak'i? ¿Ka antiksïsï chéti jurhenkorhericha no k'arhinta jarhak'i?
15Ka Jesusi arhiantaaspti:
–¿Anti úaksï tempuchakuarhu, jarhop'iricha mískorheni jarhani enka tempucha imechani jinkuni jauaka? K'óru niáraati jurhiata enka tempucha p'íkunhantaaka ka jiák'ani k'óruksï karhinta jauati.
16“Nónema takusï jimpanhe jimpo maiarasïnti xukuparhakua tamapuni, jimpoka takusï jimpanhe tskúntasïnka ka tamapuni sánteru karukuni. 17Ka kauikua jimpanhet'u no jatsiranhasïnti kauikua jatakua tamapurhu, jimpoka sïkuiri katikorhesïnka ka kauikua tsîncheni. Ísï jimposï kauikua jimpanhe, jimpanhe jatakuarhu jatsiranhat'i, ka ísïksï tsimani ampe márku patsakorheati.”
Jáiru uáp'a uátsï tsítanhantasti
(Mk 5.21-43; Lk 8.40-56)
18Enka Jesusi íni ampe arhiani jápka, judiuecheri urhets'ïkuri ma antarheraspti, ka tinkuixurhikutini arhispti:
–Nanaka sapichu jucheti iáiasï uarhisti; ju p'áts'ïkuni ka ima tsíntaati.
19Jesusi jauaraspti ka jurhenkorheri jémpechaksï chúxapaspti. 20Ka xanhari jimpo, uarhiti ma antarheraspti enka témpeni tsimani uéxurhini p'amenchapkia, iurhirini no úni anhaxustani ka sununtani jupip'arhukuspti, 21jimpoka ísï p'ikuarhenhesïrempka: “Sunudak'uni ekani párhekupirinka, ampakentaaka.” 22K'óru Jesusi p'irhipakorhespti ka uarhitini erateparini arhispti:
–Ásï jáma p'ikuarherani jucheti uátsï, mintsikaskarini jimporisï ampakentaka.
Ka ima uarhiti jimak'u ampakentapaspti.
23Enka Jesusi urhets'ïkurio inchapka, exeaspti kústatichani, ka imechani enkaksï uerani jápka, ka enkaksï mámaru ampe uantant'a'ni jápka, 24ka arhiaspti:
–Kéntiku je, nanaka sapichu no uarhirixati, k'uíxati.
Ka Jesusinksï teresmarhusïrempti. 25Ka enkaksï iámentuecha petanhantapka, Jesusi inchaspti ka nanaka sapichuni jupik'uspti, ka nanaka sapichu tsíntaspti. 26Ka iápuru jimesï ima ampeterku uantanhantaxaptia.
Jesusi tsimani pátenharhichani éskataraasti
27Enka Jesusi uéntapka, tsimani pátenharhichaksï chúxapaspti uinhachakuparini:
–¡Dabi uáp'a, p'amok'uts'ïni!
28Ka enka Jesusi k'umanchekuarhu niántapka, pátenharhichaksï antarheraspti ka Jesusi kurhamarheaspti:
–¿Anti cha mitsikasïnki eskani úaka ísï úni?
Ka imaksï arhispti:
–¡Jo, Tata! Arhini.
29Jiák'ani Jesusi p'ánharhikuaspti arhiaparini:
–Úkorhe ísï eskamentuts'ï na mintsikani jaka.
30Ka exesptiksï ka Jesusi uinhamarhekuaspti:
–Ásï nemani aiankuntsï je.
31K'óruksï ima kéntikutini iápuru jimesïksï uantant'a'spti.
Jesusi nunuxini ma uantarasti
32Enkaksï pátenharhicha uéntani jápka, jimak'uksï pérakuspti nunuxini ma enka nósesi jásï ma incharhetini jápka. 33Enka Jesusi nósesi jásïni petarhetant'a'pka, nunuxi uantaspti. Ka ísku pakareranhaspti ka uantanhasïrempti:
–Israeli iretarhu nómeni xásï ampe exenhaxapti.
34Ka fariseuechaksï uantasïrempti:
–K'éri nóampakitiri juramukua jimpo petarhpeantaasïnti nósesi járhatichani.
P'ikuntskua kánekuesti
35Jesusi iápuru k'érati ka sapirhati iretecharhu nirasïrempti, ka k'umanchekua tánkorhentskuecharhu jurhentpesïrempti ampakiti aiankperakuani, ka iámentu jásï p'amenchakuechani ka p'ikuarherakuechani ampakerpentasïrempti. 36Ka xáni uáni exep'etini, kánekua p'amok'pespti jimpoka tsînchekata ka etsakorhetini jánhaxapka, ísï eskaksï karichicha enka nónema erankuani jarhak'a. 37Ka jurhenkorheri jémpechani arhiaspti:
–Sési jimpo, p'ikuntskua kánesti ka p'ikuntstichaksï namuntkuesti. 38Kómarhi je Achani enka p'ikuntani jaka eska axauaka p'ikuntstichani.
Terpilih Sekarang Ini:
Sáni Mateo 9: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
