Haheburayi 4
4
Maturekero ghomaturumuthero kwawa ha tawa
1Oku shime gha karera matoyedhero ghendighomaturumuthero nongcamu, tu koneke eshi, pa kara ghumweya ghopapenu yu sho gha thighare po. 2Atwe ne twa wana mbudhi dhodhiwa, thika di ha dhi wana wo. Ene ngambi kenge ha yuvire yiyaghura, mbadiko thi thawaghamwenine. Yoyishi mbadi ha tawire koyi ha yuvire. 3Atwe twa tawa ne, kwingena mumaturumuthero. Awo ne mbokapwe, thika di gha ningire Nyambi eshi:
“Po nedherire mughukenya wange eshi:
‘Awo ne mbadi mbo hengena mumaturumuthero ghange.’ ”
Ene ngambi kemo, yirughana yendi yapwire kare munyima dhomavarekero ghokaye. 4Yoyishi padyango dyoYitjanga ha ghamba kudiyuwa dyoghukwo noghuwadi eshi: “Na Nyambi gha turumuthire mudiyuwa dyohukwoko noghuwadi munyima dhoyirughana yendi yoyihe.” 5Apa no karo kuninga ghana kuninga eshi: “Mumaturumuthero gha, nokamanana temba mbadi mbo hengena mo.” 6Awa ha yuvire pakutanga mbudhi dhodhiwa, no ha karire ghuthururu, mbadi mbo hengena mumaturumuthero. Ene kwawamweya, kukona kurikanya kukwingena mumaturumuthero ghendi. 7Nyambi gha pakire po karo diyuwa eshi: “Dyarero” thika di gha hukurukire pakutanga rwingi pakanwa kaDavita eshi:
“Ngeshi ngo mu yuve diywi dyendi dyarero,
mbadi mwa kona kukara ghuthururu.”
8Yoyishi ngeshi ngo Josuwa ghawa kumithire mumaturumuthero, ngo mbadi gha ghambire Nyambi mudiyuwa dimweya. 9Pa karire karo maturumuthero ghoSabata ghodiko dyaNyambi thinda. 10Yoyishi kehe yu ghokwingena mumaturumuthero ghaNyambi, gha kona naye kuturumutha kuyirughana yendi, thika di gha turumuthire naye Nyambi. 11Mu ninge natwe tu toghorope kumaturumuthero gha eshi, gha dhire kukutha ghumweya thitamenedhi thawo thoghuthururu no maghana sha yowe nawo.
N̂ando dhi kare yira dimende
12N̂ando dhaNyambi dha kara nomoyo nongcamu. Adho ne dhitwe kupiterera kehe thimende, ethi tha kara ghutwe kuwadi no adho ne, kwingena kate dhi yakunuthe mudhimu nomupepo no makunungero ghomushukwaghongo. Adho dha tetera yitambo no yighayadhara yomumutjima. 13No karo mbadiko thivareka ethi thonda kwaNyambi. Yoyiheya yi ne ya kuyara vene kughutho ghomeho ghendi. No kwendi Yu twa kona kunongwenena yoghushemwa.
Jesusi ne mukuru ghoMupristeri ghokupiterera
14Thika di tudi pashadyarero nomupristeri Shokuru, oyu gha dhinine mumawiru, Jesusi ghoMwana Nyambi, mu ninge tu tanarere mumatawero gha twa nongonona. 15Mupristeri shokuru yu tudi nendi, kadi Yu gha dhira kuthotera kughukashu wetu. Aye naye ha mu yerekithika yatwe, ene mbadi gha harurire. 16Mwiye na tu yende nomitjima dhodhihunga kudipuna dyothin̂eke, eshi mbo tu kawane thin̂eke non̂eke no mbo tupwe kukomonona munako dhodhihunga.
Terpilih Sekarang Ini:
Haheburayi 4: MHW1986
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Mbunga dhoBayibili dhaNamibia (Bible Society of Namibia) 1986