Haheburayi 3
3
Jesusi ne gha piterera Mosesi
1Yodigho mwayendhange, amwe ha pongwera kwaFumu no mwa yerana kumethero ghomudiwiru, mwa kona kukoneka thiwana kwaJesusi ghomupostoli nomupristeri Shokuru, ghomatawero gha tuna kunongonona. 2Aye gha kara ghutawedhi kwaNyambi yu gha mu tororire, thika di gha karire karo Mosesi ghutawedhi mundhugho dhaNyambi dhodhihe. 3Ene Jesusi, gha piterera mufuma kadi thika Mosesi ene thika di gha kara mushokeki ghodighumbo nofuma, kupiterera dighumbo dyodihe. 4Kehe ndhugho dhapwa kushokeka kwaghumweya. Ene Nyambi yomuvareki ghoyinu yoyihe. 5Mosesi gha karire mukareri wendi ghomutawedhi, mu kehe ndhugho dhaNyambi dhodhihe no gha karire kanonga koyinu yoyihe, eyi nga ghambanga Nyambi eyi mbo yihokoka kughutho. 6Kristusi ne yoMwana ghomutawedhi ghondhugho dhaNyambi. Atwe ne yatwe twadighumbo dyendi, ngeshi ku tuna tanara mumatjimapero, no mumanongweneno kumataterero ghoyi twa kurupera.
Maghukukutu ghomapemukero pakupira matawero
7Yodigho, mu tegherere edi ghana kughamba Mupepo ghoKupongoka:
“Dyarero ngeshi mu yuve diywi dyendi,
8mbadi mwa kona kukara ghuthururu,
thika di heman̂anyine hakerekandongo wenu,
no pa ha ni yerekire mumaboreya.
9Awo ne dyo ha ni yerekire no kunisherera,
ngambi kenge ha ni monine myaka makumi mane
koyi nawa tenderire.
10Yo na paterire nodiko di no na ningire eshi:
‘Mitjima dhawo dha kara kehe pano mumapemukero,
no ha shwena kudimuka mayira ghange.’
11Po na paterire wedha eshi:
‘Mumaturumuthero ghange,
mbadi mbo hengena mo.’ ”
12Mwayendhange, mwa kona kutakamitha eshi, pa kara ghumweya mukatji kenu oyu gha kara no yikara yokupira matawero, noyu gha thigha Nyambi ghomukamoyo. 13Ene thika di yidi shime eshi: “Dyarero” mwa kona kukutjokedha kehe diyuwa, maghana sho gha pemuke ghumweya ghopapenu, pamurandu ghodiharwero di dina kumushinga. 14Atwe ne twayendha Kristusi, ngeshi ha tu dhidhimeka mumakurupero, kate paghuhura thika di twa tangire. 15Yo ha yighambera eshi:
“Dyarero ngeshi mu yuve diywi dyendi,
mwa kukutitha mitjima dhenu,
thika di mwa karire apa heman̂anyine
hakerekandongo wenu.”
16Hadye ne wa ha yiyuvire no hadye heman̂anyine? Waheya wa ne kadi wowa gha nyanderire Mosesi pakuwashwaghitha muEgiptena ndi? 17Hadye nane wa gha paterire Nyambi, kayenda komyaka makumi mane? Nane mbadi wa haharurire nawa ha fererire mumamboreya ndi? 18Ngo hadye karo ne, shimengwa awa ha karire ghuthururu, wo ghedhera eshi, mbadi mbo hengena mumaturumuthero ghendi ndi? 19Po tuna kuyimonena eshi, awo ne mbadi mbo hengena mumaturumuthero ghendi. Yoyishi pamurandu ghokupira matawero.
Terpilih Sekarang Ini:
Haheburayi 3: MHW1986
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Mbunga dhoBayibili dhaNamibia (Bible Society of Namibia) 1986