Haheburayi 2
2
Ruvigha rorukuru rwa negha thirughana thothikuru
1Pathinu thi, twa kona kutanarera po nongcamu thikuma koyi twa yuvire, maghana mba tu pemukitha. 2Ngeshi n̂ando dhi ha ghambire haengeli ne dhaghushemwa, kehe mareghero noghuthururu yikone kupwa kuhumbitha. 3Atwe ne ngepi di twa kurunyetuka, ngeshi ha tu pembura ruvigha rorukuru rokemo? Ruvigha ru gha ru yuvithire Fumu pakutanga kwendi kuyoyihe, no gha yi tutanarithera poyu gha yiyuva. 4Na Nyambi gha yinongononine karo payidimukitho noyitetukitho no payitenda yomangcamu ghomengi no yitapa yaMupepo ghoKupongoka, thika di gha yihimine thinda.
Mukamiti ghokuruvigha
5Eyi no, mbadi gha yitapire eshi mbo ha raghure haengeli kaye kokughutho, thika di tuna kughamba. 6Karo ghumweya gha nongononine no gha ningire eshi:
“Thinye munu eshi ghughayare We kukwendi,
mwanamunu ne thinye sho mu ghamene We?
7Owe wa mu mbirupithire mukanakoghana eshi ha
mu piterere haengeli;
Owe wa mu yenga noghufumu nodikuto,
8Owe wa tapa yoyiheya kukwendi.”
Matapero ghoyoyiheya kwamunu, mbadiko thi tha thara ko. Yoyiheya ne yomukakuyiraghura. Ene pano kumona tuna kumona shime eshi, munu ne mbadi ghana kuraghura yoyihe. 9Oyu tuna kumona ne Jesusi yu ha yenga nodikuto noghufumu, munyima dhokumumbirupitha mukunyanda no payifa yendi, ha mu pitererire haengeli munako dhodhifupi vene. Eshi gha fere waheya pathin̂eke thaNyambi.
10Nyambi yu gha karera po yoyihe pamurandu wendi, no poyu ya tunda yoyihe, gha haka kutwara hengi yira hanendi kughufumu. Yodigho ya hungamine eshi, Aye gha kare Mukamiti ghomakomweneno, gha mu rikanyithe kuyinyanda yendi. 11Aye ne mupongokithi, thika di hapongwera hanu wahe kwaWihawo yofotji. Payinu yi, mbadi ghana kufa honyi Jesusi pakuwatoya eshi mwayendhange. 12Aye ghana kuninga eshi:
“Ame ne mbona yuvitha Dina dyoye kwawayendhange,
no mbona kukughu mukatji kombunga dhawakriste.”
13Shime ghana kuninga karo eshi:
“Mbona kuruperera roruheya paPendi.”
Karo eshi:
“Yame no nawa gha ni pire Nyambi.”
14Thika di ha kara hanu wano yirama nomanyinga, dyo gha karire Naye munu thika wo. Eyi gha yitendire, yoyishi yo gha kara nogcamu dhoyifa, mukumudhimitha po shadipinyi, 15no kushutura awa ha kara mudorongo rure romoyo wawo ghoghuhe pamurandu ghowoma ghoyifa. 16Yashemwa, mbadi gha kudhekerire yokwawaengeli, ene yokwawanahoka waAbrahamu. 17Yodigho, Aye gha kona kukurikanya nawayendhendi muyoyiheya, eshi gha kare mupristeri Shokuru kughutho waNyambi no mukathin̂eke nomakurupero ghokushemwithanitha mahawero ghawanu. 18Yoyishi Aye thinda naye gha karire mumayerekero no gha nyandire, gha kona kughamwena awa hana kuyereka.
Terpilih Sekarang Ini:
Haheburayi 2: MHW1986
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Mbunga dhoBayibili dhaNamibia (Bible Society of Namibia) 1986