Luk 8
8
Baatu betse ne sukudze Zezu
1Yumana, Zezu atse se bingundu ne membuka ne utandaka misisili mive mye Ukani ve Nzambi. Betuma bedzi iku ne bole bedze konedzi. 2Yedze ne va baatu boko be Zezu epanza mimbiti, ne boko bedzi esaka mebedzu, Maliya we Mangidala wedzi epanza mimbiti untsami. 3Zani ŋwadzi we kuza, uŋdzanzi we Elodi, Suzani bane boko nedzi bekaba untamvu ŋwe bangu ne uyamene Zezu bane bebingi bedzi.
Ngana ye uŋkuni
4Batu beyitsi be bingundu byesi bakukene ne uya kwele ye Zezu. Wangu ate bangu ngana mbotu ati: 5«Vʉsa votu muutu atse se buka ne uŋwasa mbulu, ndili yedzi edze ne ŋwasa mbulu, mbulu mboko ya nawen se peyi, ye batu bidzangite, benyodzi badza yesi. 6Mbulu mboko ya naŋwe se senze ye memanya, yamene, ni bimeni bya kanye ne nde mangu. 7Mboko ya naŋwe tima ye minzila. Ne minzila ne mbulu byesi bya mene unsamba, ni minzila mya lutimise bila. 8Ni mbulu mboko ya naŋwe se senze yimve, bimeni bya nene, meni yotu ya buta mikama mye mbulu myole (100)». Ye Zezu evele wowe ne singa ati: «Bidzi ne meluyi me uyuka, bayuka.»
Ye Zezu iwowe ne me ngana niyi
9Bebingi be Zezu nedzi ati: «Ngana yowe mete besu yi ye tanda nati yi?» 10Zezu akalule ne bangu ati: «Nzambi akaba beyi utsengu ve uyiba mamvu medzi midzi isolo se Ukani ve Nzambi, ni ngana yedzi ni ye batu boko, me wowe ne bangu ni ne mengana.»
«Ni bangu bewaya, bangu nde yene,
bangu bedzi ne meluyi me uyuka, ni bangu nde yuka me bitanda.»
Zezu asilile ngana ye uŋkuni
11Zezu ne bebingi bedzi ati: «Yene me ngana yayu itanda, mbulu ni Iwowe dze Nzambi. 12Uŋkolo ŋwe peyi, ni batu biyuka Iwowe dze Nzambi. Ni Sata ti aya, yedzi ipinule Iwowe dze Nzambi se milima mye batu toko bangu bamekidze Iwowe dze Nzambi bangu balunga. 13Senze ye memanyan ni batu biyuka Iwowe dze Nzambi ne itsisa, ni bangu nde bata dzangu se milima mye bangu. Bangu bevukidze ne mendili moko, ni ndili ye mamvu meneni mikwa bangu baya nde ivʉkidze. 14Mbulu mboko ya naŋwe se midzila. Yedzi ni batu biyuka Iwowe dze Nzambi ye bangu biyakwe. Ni menyoŋgo, ne untamvu, ne meve me se ilongo, me simba Iwowe dze Nzambi dzidzi se milima mye bangu ne unene. Ni bangu nde tuka nene, nde yele se Iwowe dze Nzambi. 15Mbulu mboko yi naŋwe se senze yimve, yedzi ni batu biyuka Iwowe dze Nzambi, bibata se unlima umve ne ŋwe telee. Bangu bebata Iwowe dze Nzambi, ye bangu bibomo milima mive.»
Ngana ye ibamvu
16«Muutu nde takise ibamvu asodze se mbiya, na asomo sɨna ilaka, ni bedzika ibamvu ni ikulu, yayu binyinzile se ndaku bayene kwalala. 17Mesi midzi isole metse pulene, ne mamvu midzi isole se milima betse yiba mangu. 18Dzayi ne utsengu ne me beyi biyuka, yayu muutu widzi ne yila yotu betse velise wangu byoko biyitsi, ni we nde yila betse nanguse va yila yedzi itsimene ati, adzi ne yangu.»
Yali amene ye Zezu
19Vʉsa votu mama ne banzi be Zezu baya yene wangu, ni bangu beke tuka yene wangu utsɨna ne batu uyitsi. 20Batanda Zezu ati: «Mama wowe ne banzi bowe baya ituna befumba yene we.» 21Ni Zezu atanda ne bangu ati: «Mama wami ne banzi bami ni biyuka Iwowe dze Nzambi, ne bikuuna dzangu.»
Zezu atabise ipepe dzineni
22Vʉsa votu Zezu abita se mbungu bane bebingi bedzi, Zezu atanda ne bangu ati: «Yakayi betse ngulu ye dzanga.» Ye bangu betse. 23Ndili ye mɨsavili, Zezu ananga mbula se mbungu. Palɨkise ipepe dze singa dza kukudze kule dzanga, mangu manyinzile se mbungu, mbungu ya fumba yinaka, bangu bayene bongo. 24Ye bebingi be Zezu betsindene konedzi ne unyusile wangu ati: «Kuŋwu, Kuŋwu bebe bawele.» Zezu anyuse, akamve ne ipepe, ne mipukise mineni, ne ipepe ne mipukise byesi bya taba. 25Zezu ne bebingi bedzi ati: «Ivʉkidze dze beyi dzawayi?» Ni bangu bedze ne bongo ve iyitsi, ye bangu bekima. Ye bangu bewowe tima ye bangu ati: «Ayu muutu niza? We iwowe ne ipepe ne mangu, ye byangu bikuuna wangu.»
Zezu asaka muutu widzi ne mimbiti
26Zezu ne bebingi bedzi basave dzanga, bakalwe ilongo dze Zelasene, dzidzi busu ve Ngalilee. 27Ndili ye Zezu epula se mbungu, muutu motu we ngundu yayu aya kwanye nedzi. Muutu mene edze ne mimbiti miyitsi se nyulu, edze ne mikanda ande uswa, nde nanga bembula se mendaku. Ni wangu adze si se mesongo. 28Yedzi eyene Zezu, wangu awula unsima, avʉna mebongo busu ve Zezu, yedzi ewowe ne singa ati: «Yowe ifumba nami niyi? Zezu Ŋwana we Nzambi we ikulu, kolokolo yowe dzika nyokile me.» 29Wangu ewowe vavu, ni ne Zezu etanda ne umbiti ati: «Umbiti ŋwe pula se nyulu yedzi.» Ni mimbiti myedze ne usabise wangu. Bedze ne ukutaka wangu bitseyi se meboko ne mekulu, ni wangu edze ne utsitaka bitseyi byabu. Ye umbiti ŋwe bapa wangu se ikanye. 30Zezu asuŋwule wangu ati: «Kumvu yowe niza?» Muutu mene akalule nedzi ati: «Kumvu yami ni beyitsi.» Wangu etanda vavu ni ne mimbiti miyitsi myedze se nyulu yedzi. 31Mimbiti myedze ne ubondoko Zezu ati: «Kolokolo yowe, we nde luma besu se ibila dze nde sele.»
32Yedze ne dzimvu dze bingu dzedze ne ufumba bila kule kudzi. Mimbiti ne Zezu ati: «Dzika besu benyindzile se bingu.» Ye Zezu eluma mimbiti se bingu. 33Ye mimbiti mye pula se nyulu ye muutu mene ne unyindzile se bingu. Dzimvu dze bingu dzayinga kule kudzi ne mbangu, dzanaŋwe se dzanga, bingu byesi bya yinaka. 34Batu bedze ne ubata bingu beyene vavu, ye bangu betanga ne utse tanda se ngundu ne be se membuka. 35Ye batu bepula ne utse yene mamvu mesuta. Bangu bekalwe kone Zezu, bangu bayene muutu we Zezu epanza mimbiti untsitsi sɨna mekulu me Zezu, alunga, aswa mikanda. Ye bangu beyene bongo. 36Bangu beyene mamvu mamu mesi, batanda ne boko nda muutu wedze ne mimbiti elunga. 37Batu besi be ngundu ye Zelasene, batanda ne Zezu ne uteme se ilongo dze bangu, ne bangu bedze ne bongo. Zezu abita se mbungu ne utse. 38Muutu we Zezu epanza mimbiti nedzi ati: «Tumbeke benu.» Ni Zezu atanda nedzi ati: 39«Vʉtse sombo yowe, we tanda mesi me Nzambi mepika we.» Ye muutu mene etse ne utandaka se ngundu yesi me Zezu epika wangu.
Ŋwana we ŋwatu we Zayiluse ne ŋwatu we betime ne ingoyi dze Zezu
40Ye Zezu evʉtse ngulu ye dzanga, batu bayamba wangu, ne bangu besi bedze ne ubuka wangu. 41Muutu we kumvu Zayiluse aya, wangu edze ni kuŋwu we ndaku ye umbondu. Wangu anaŋwe sɨna mekulu me Zezu, yedzi ebondo Zezu ne utse ndaku yedzi. 42Nedzi edze ne ŋwana we ŋwatu we itsɨka, we bisiwu iku ne byole wedze se liku. Ndili ye Zezu edze ne utse, uŋkuka ŋwe batu ŋwedze ne upinyeke wangu me kwele mesi. 43Yedze ne ŋwatu wedze ne ubedzu ve ndaku ye kayi, yedze ne upula wangu uŋkomo, se bisiwu iku ne byole. Wangu amana untamvu ŋwesi ne ukaba besaki be mebedzu, ni nde muutu we saka wangu. 44Wangu atsindene mbisa ye Zezu, abetime soko ye ingoyi dzedzi. Palɨkise, unsu wedze ne pula ŋwa kanye. 45Zezu asuŋwule ati: «We me betime nami niza?» Batu besi basuna. Pyeli nedzi ati: «Kuŋwu batu badzenze we me kwele mesi.» 46Ni Zezu atanda ati: «Muutu abetime nami, ma yene miti singa yotu ya pula se nyulu yami.» 47Ŋwatu ayiba ati, wangu nde tuka solime, yedzi eya ne tsikɨte, anaŋwe sɨna mekulu me Zezu. Wangu atanda busu ve batu besi utsɨna vedzi ebetime ne isoko ye ingoyi dze Zezu, ne nda wangu elunga sɨna ne sɨna. 48Zezu atanda nedzi ati: «Ŋwana wami we ŋwatu ivʉkidze dzowe dzalungise we, tseke ne itavu.»
49Ndili ye Zezu edze ne uwowe, muutu motu ayinga sombo ye Zayiluse kuŋwu we ndaku ye umbondu, atanda nedzi ati: «Dzika vele dambise Kuŋwu, ŋwana wowe we ŋwatu awaa.» 50Zezu ayuka vavu, wangu ne Zayiluse ati: «We nde yene bongo, somo ivʉkidze, ŋwana wowe alungele.» 51Ndili ye Zezu ekalwe ndaku ye Zayiluse, wangu eke tondo ati, batu boko benyinzile nedzi se ndaku, ni benyinzile nedzi ni Pyeli, Zan, Zaaki, tata ne mama we ŋwana. 52Batu besi bedze ne ulila, ne unyongo utsɨna ne ŋwana we waa. Zezu atanda ne bangu ati: «Dzika lilayi, ŋwana asande waa, ni wangu adzi ni bembula.» 53Ni bangu bedze ne usewe Zezu, ne bangu beyiba ati, ŋwana edze awaa. 54Ye Zezu ekwata boko ye ŋwana we ŋwatu, awowe ne singa ati: «Ŋwana wami nyuse.» 55Ŋwana anyuse, nda tsaŋwe atelime. Zezu atanda ne bangu ne singa yesi ati: «Kabayi ŋwana bila.» 56Yali ye ŋwana ya kima kate kima amene, ni Zezu asikɨdze ne bangu ati: «Beyi nde banda batanda ne muutu tine motu me mesuta.»
Terpilih Sekarang Ini:
Luk 8: WUM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
