Luk 9
9
Zezu aluma betuma bedzi iku ne bole
1Zezu akukise betuma bedzi iku ne bole. Yedzi ekaba bangu singa ne ukani ve upanza mimbiti myesi ne usaka mibedzu. 2Wangu amana vavu, yedzi eluma bangu ne utse tandaka misisili mive mye Ukani ve Nzambi ne usaka mibedzu. 3Zezu atanda ne bangu ati: «Ye beyi bitse uŋdzunga beyi nde bapa yila tine yotu. Beyi nde bapa unsumbi, nde bapa ŋwanza, nde bapa bila, nde paba bedolo, bapayi si ingoyi dzotu ne muutu. 4Yebi yamba beyi se ndaku mbotu, dzakayi wawu nzii ne beyi bivutse. 5Ndili ye batu bilewe yamba beyi, temayi ngundu ye bangu. Fufulayi iwulu dze metambi me beyi. Ye beyi bapika vavu, beyi belaka nati Nzambi atse pama bangu.»
6Ndili ye Zezu emana wowe vavu, ye bebingi bedzi betse se membuka mesi. Ne utandaka misisili mive mye Nzambi, ne usaka mibedzu.
Bayi ye Elodi
7Elodi lipatima le Ngalilee, ayuka mesi me mesuta. Wangu edze nde yiba nda wangu itsimene. Utsɨna ne batu boko bedze ne tanda ati: «Zezu ni Zambatisi wa nyuse tima ye lɨku.» 8Aba ati: «Eli iya laka nyulu.» Boko ati: «Toko Muutu we Nzambi motu we me yinga se liku.»
9Ni Elodi ati: «Me mene ni we luma ne utsɨta Zambatisi tsʉngu, ni wangu yu muutu niza? Wami iyuka mamvu me tuu.» Ye Elodi efumba yene Zezu.
Zezu abungule meku me mikama me batu meku metanyi (5000)
10Betuma be Zezu baye vʉtse, ye bangu betanda Zezu mesi me bangu bepika. Zezu abapa bangu ulayi ne batu, kwele ye ngundu ye kumvu Betsayida. 11Ndili ye batu beyuka vavu, ye bangu bebinga Zezu. Zezu ayamba bangu, yedzi ewowe ne bangu mamvu me Ukani ve Nzambi, Zezu asaka batu bedze ne mebedzu.
12Betuma be Zezu beyene ati, vʉsa va kitse yinda, ye bangu betsindene konedzi ati: «Vʉtise batu betse se membuka, ne se mendaku medzi bakaka. Awawu bangu betuka kobisele buma ye bembula ne bila bye udza, awa bebe bedzi ni se buma ye ikanye.» 13Ni Zezu ne bangu ati: «Beyi mene kabayi bangu bila.» Betuma be Zezu nedzi ati: «Besu bedzi si ne pembe itanyi ne beswi bole, we ni witi besu betse sumba bila bye batu ba besi?» 14Ni yedze ne meku me mikama me mebaka meku metanyi. (5000) Zezu ne betuma bedzi ati: «Sundisayi bangu mitsitsi, batu meku metanyi (50) ne ye bangu buma.» 15Ye betuma bepika nda Zezu eluma bangu pika, basundise batu mitsitsi. 16Ye Zezu eboko pembe mene itanyi ne beswi mene bole, yedzi ewaya ikulu, avʉtise Nzambi live ne bila. Zezu akaba bila ne bebingi bedzi, ye bangu bekabaka batu besi. 17Batu besi badza, bayula. Metsɨka mebila mevuka, ma lundise membele iku ne mole.
Pyeli ati Zezu ni we Nzambi etobo
18Vʉsa votu, Zezu atse bondo se buma yotu wangu mene, ne bebingi bedzi bedze konedzi. Zezu asuŋwule ne bangu ati: «Me batu bitanda se nyulu yami ni meza?» 19Bebingi bakalule nedzi ati: «Aba ati, we ni Zambatisi, boko ati, we ni Eli, boko ati, we ni Muutu we Nzambi motu wa waa, wa nyuse.» 20Zezu atanda ne bangu ati: «Ni beyi bati me niza?» Pyeli akalule ati: «We ni we Nzambi etobo.»
21Zezu asimba bangu ati: «Beyi nde banda batanda ne muutu tine motu, me beyi beme tanda kule yami.» 22Ye Zezu evele tanda ne bangu ati: «Uve we yikwene Muutu ayene membaba meyitsi. Batu bekala ne bekuŋwu be bekabi be bisemi bye Nzambi ne belakɨsi be bitsɨla betse lewe wangu. Betse buuma wangu, vʉsa ve unsatu wangu atse nyuse.»
23Ye Zezu etanda ne batu besi ati: «Ti muutu afumba binga me, wangu nde tsimene nyulu yedzi mene. Uve wangu abapa koko ye beliningise wangu mene#9.23 Koko ye beliningise yedzi ni buma ye bekomidze Zezu betsete. masi mesi ne ubinga me. 24Yayu witse fumba lungise libɨku ledzi atse fiya langu, ni witse fiya libɨku ledzi utsɨna nami atse lunga. 25Muutu ti abomo untamvu ŋwe ilongo, afiya libɨku ledzi, ayabaka langu, yedzi ibomo niyi? 26Muutu ti adzi ne sonyi yami ne mamvu mami iwowe, nami we yikwene Muutu, me tse yene sonyi nedzi, yami itse ya se ukani vami ne ukani ve Tata wami, ne ukani ve betuma be Nzambi bemipende. 27Me tanda beyi umbu amene, se batu bidzi wa, boko nde tse waa ye bangu besande yene Ukani ve Nzambi.»
Pyeli ne Zan ne Zaaki bayene Zezu se ukani ve Nzambi
28Masi ŋwambi mesuta, Zezu amana wowe vavu, yedzi eboko Pyeli ne Zan ne Zaaki, abita kule kudzi ne ubondo. 29Ye Zezu edze ne ubondo, panza yedzi ya yikwene, ne mikanda myedzi eswa mya fuma fuuu. 30Palɨkise, batu bole bedze ne uwowe ne Zezu, yedze ni Moyizi ne Eli. 31Bayene bangu se ukani ve Nzambi. Moyizi bane Eli bedze ne uwowe ne Zezu ne liku ledzi Zeluzalemi. 32Pyeli ne boko bedze nedzi bawoto bembula. Ndili ye bangu benyuse, bangu bayene ukani ve Zezu ne batu bole bedze nedzi. 33Ndili ye Moyizi ne Eli betse, Pyeli atanda ne Zezu ati: «Kuŋwu, ayi ni buma yimve, bebe betuka dze wa, bebe betunga membanza mesatu, mbotu yowe, mbotu ye Moyizi ne mboko ye Eli.» Ni Pyeli eke yiba medzi edze ne utanda. 34Yedzi edze ne uwowe vavu, ye lingutsu levungile bangu. Bebingi be Zezu bayene bongo. 35Dzuyi dzayinga se lingutsu ati: «Ayu ni ŋwana wami me tobo, yukayi wangu.» 36Dzuyi dze mana wowe, ye Zezu evʉka wangu mene. Ye bebingi be Zezu bebata dzangu, bangu beke tanda ne muutu tine motu me bangu beyene vʉsa vavu.
Zezu asaka ŋwana widzi ne umbiti
37Vʉsa ve se ŋwe, ye Zezu ne bebingi bedzi beyinga se kudzi ne usundaka, ye uŋkuka ŋwe batu ŋwe ya kwanye ne Zezu. 38Se uŋkuka ŋwe batu ŋwaŋwu, ye muutu motu ewula unsima ati: «Kuŋwu, kolokolo yowe, waya ŋwana wami yu, wangu ni ŋwana wami we itsɨka! 39Umbiti ŋwe kwata keke wangu palɨkise, yedzi iwula misima, ye umbiti wiyingise ŋwana ne singa, ye meteyi mipula ŋwana se uŋdzumvu. Ye nyulu yipika wangu nganzi, ŋwangu ne upula udilu. 40Ma suŋwule bebingi bowe ne upanza umbiti, ni bangu nde tuka.» 41Zezu ati: «Beyi batu belolo , beyi nde ivʉkidze, beyi bedzi ne mamvu mebi. Me tse dze ne beyi ni nzii ndili yowi?» Zezu ne muutu mene ati: «Yaka ne ŋwana wowe we ibaka wiya.» 42Ye ŋwana edze ne tsindene, umbiti ŋwa naŋwule ŋwana ŋwa nyingise wangu ne singa. Zezu abaŋwule umbiti, alungise ŋwana avʉtise ŋwana ne tata. 43Batu besi bakima. Bangu bati: «Nzambi adzi ne uneni amene.»
44«Dzuvulayi meluyi me beyi, uve beyi babata mami itandele, betse tsɨna we yikwene Muutu se meboko me batu.» 45Ni bebingi be Zezu nde yuka me Zezu ewowe ne bangu, mamvu mamu medze ni mesaka isolo, ni bangu beke yiba metsɨna me mamvu mamu, ne bangu bedze ne bongo ve usuŋwule Zezu metsɨna me mamvu mamu.
Witakwe boko ubutu niza?
46Bebingi be Zezu bedze ne uwowe tima ye bangu, ne ufumba yiba witakwe boko. 47Zezu ayiba me bangu bedze ne uwowe, yedzi eboko ŋwana unte ne udzika konedzi. 48Ye Zezu etanda ne bangu ati: «We iyamba ŋwana yu ne itondo dzedzi idzi ne dzangu nami, ame yamba ni me. We me yamba me, ayamba ne we meluma me, ni widzi nda ŋwana unte tima ye beyi, awayu ni witakwe boko besi.»
49Zan ne Zezu ati: «Kuŋwu, besu beme yene muutu motu we me panza mimbiti ne kumvu yowe, ye besu beme simba wangu nedzi nde se yimvu ye bebe.» 50Ni Zezu akalule nedzi ati: «Beyi nde simba wangu, we nde wunda bebe adzi ni we bebe.»
Zezu atse Zeluzalemi
51Ndili ya kalwe ye Zezu inangwe ilongo dzi. Zezu ati, uve ma tse Zeluzalemi. 52Zezu aluma betuma se mbuka ye Samali ne utse yebise wangu buma. 53Ni batu be mbuka balewe yamba wangu, nedzi edze ne utse Zeluzalemi. 54Zaaki bane Zan beyene vavu, bangu ne Zezu ati: «Kuŋwu ti wa tondo, besu beluma ŋwunya wiyinga ikulu ŋwe bungise bangu besi.» 55Ni Zezu ayikwene, awaya bangu, atanda ne bangu ati: «Beyi nde pika vavu.» 56Ye bangu betse se mbuka mboko.
Bitondo binga Zezu
57Ndili ye bangu bedze ne ulanda, muutu motu ne Zezu ati: «Me tse binga we paki si buma yowe itse tse.» 58Zezu akalule nedzi ati: «Bembakwe bedzi ne mebila me bangu bisolime, ne benyodzi bedzi ne mendaku, ni we yikwene Muutu nde buma yedzi inanga bembula ne yedzi idzunda.» 59Zezu ne muutu moko ati: «Binga me.» Ye muutu ekalule nedzi ati: «Kuŋwu, dzika ma ketse sodze tata wami.» 60Zezu akalule nedzi ati: «Dzika bitsinzi bye sodze bitsinzi bye bangu. We, tseke ne utandaka misisili mye Ukani ve Nzambi.» 61Muutu moko ne Zezu ati: «Kuŋwu me binga we, ni dzika ma ketse lakene ne yali yami.» 62Zezu akakule nedzi ati: «We iboko ipimbi ne ukuna, ti wangu awaya mbisa, awayu nde tuka dzanza se Ukani ve Nzambi.»
Terpilih Sekarang Ini:
Luk 9: WUM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
