Luk 7
7
Zezu asaka undzanzi we kuŋwu we bewolo
1Ndili ye Zezu emana wowe mesi ne batu bedze ne uyuka wangu, yedzi etse Kapenayumi. 2Awawu yedze ne kuŋwu we bewolo we ilongo dze Lomi. Wangu edze ne uŋdzanzi wedzi edze ne utondo uyitsi. Undzanzi mene edze ne ubedzu vineni, edze akɨtse waa. 3Ye kuŋwu we bewolo eyuka bewowe ne kumvu ye Zezu, yedzi eluma va bibutu bye Bezwifi, ne ubondo Zezu ne uya saka uŋdzanzi ŋwedzi. 4Ye bibutu bekalwe kone Zezu, ye bangu bebondo Zezu ati: «Uve waya yamene muutu yu. 5Wangu atondo besu batu be Zuda, wangu ni we tunga ndaku ye besu ye umbondu.» 6Ye Zezu etse bane bangu. Ye bangu bekalwe kone ndaku, ye kuŋwu we bewolo eluma bembatsi bedzi ne utanda wangu ati: «Kuŋwu, sele wawu, we nde tuka nyinzile se ndaku ye muutu nda me. 7Yene utsɨna vami eke ye yene we. Ni tanda si dzamvu dzotu, uŋdzanzi wami alunga. 8Me mene, medzi ne bekuŋwu bami ikuuna, nami ni kuŋwu we bewolo, ne bangu bekuuna me. Ndili yami itanda ne motu tseke wangu atse, ne moko yaka wangu aya, yami itanda ne uŋdzanzi ŋwami pika tuu, wangu apika.» 9Ndili ye Zezu eyuka mamvu me kuŋwu we bewolo edze ne uwowe, Zezu ayene uve. Wangu ayikwene, awaya uŋkuka ŋwedze ne ubinga wangu ati: «Me tanda beyi, ne se Izayeli, me sande yene muutu widzi ne ivʉkidze nda dze kuŋwu we bewolo.» 10Batu bedzi eluma, bavʉtse ndaku ye kuŋwu we bewolo, bakobise uŋdzanzi ŋwa lunga.
Zezu anyusile ŋwana we ibaka we ŋwatu we uŋkwili
11Zezu atse ngundu ye Nayine, bebingi bedzi, ne uŋkuka uneni basukɨdze wangu. 12Ye bangu bekalwe ikuvu dze ngundu, bakwanye ne batu betse ne tsinzi mesongo. Yedze ni ŋwana we ibaka we itsɨka dze ŋwatu uŋkwili, batu beyitsi bedze ne usukɨdze wangu. 13Zezu awaya ŋwatu wayu, ayene wangu tsesi, ye Zezu etanda nedzi ati: «Dzika lila.» 14Yedzi etsɨndene ne ubetime ne lipoyi, bebapi basita. Zezu atanda ati: «Ŋwana we ibaka yu, me tanda we, telime.» 15Tsinzi ya nyuse, ya sunda untsitsi ya wowe. Zezu avʉtise ŋwana ne mama. 16Bangu besi bayene bongo, bakʉmise Nzambi ye bangu betanda ati: «Muutu we Nzambi aya tima ye besu, Nzambi aya yamene batu bedzi.» 17Besi bedze Zudee ne membuka me konedzi bayuka likʉma le mamvu me Zezu epika.
Bebingi be Zambatisi
18Bebingi be Zambatisi batse tanda mamvu mamu mesi ne kuŋwu we bangu Zambatisi, ye Zan ebanga bebingi bedzi bole. 19Wangu aluma bangu kwele ye Kuŋwu, ne usuŋwule wangu ati: «We ni we Nzambi etobo witse ya? Na besu bebuka ni moko?» 20Ye bangu bekalwe kone Zezu, bangu nedzi ati: «Zambatisi meluma besu kwele yowe ne usuŋwule we.» Ati: «We ni we Nzambi me tobo witse ya? Na besu bebuka ni moko?» 21Ndili mene yayu Zezu edze ne saka batu bedze ne mebedzu mesi, apanza ne mimbiti myedze se me nyulu me batu, alungise ne batu be nde mɨsa. 22Ye Zezu ekalule ne bebingi be Zambatisi ati: «Tsekayi tanda ne Zan, me beyi beme yene ne me beyi beme yuka. Be nde mɨsa baki yene, be bileme baki landa, be bifima balunga, be nde meluyi baki yuka, bitsinzi byaki nyusenge, be mimvuvu bamekidze misisili mive. 23Itsɨsa ne muutu we nde dzika ivʉkidze utsɨna nami!»
24Ndili ye bebingi be Zambatisi bevʉtse Zezu awowe ne uŋkuka utsɨna ne Zambatisi ati: «We beyi beme tse yene se ikanye niza? Va ŋwana we lisetse we ipepe dzinyingise?» 25Ni ye beyi beme tse yene niyi? Muutu widzi ne mengoyi meve? Biswa mengoyi meve ni bidzi ne untamvu ne bidzi se mendaku me bekani. 26We beyi beme tse yene niza? Muutu we Nzambi? Ee me tanda beyi umbu amene, wangu atakwe ne Muutu we Nzambi. 27Ni Zambatisi ni we Sanguvu ye Umpende ye tanda ati: «Me tse luma tuma wami busu vowe ne uyebise we peyi.»
28Zezu avele tanda ati: «Me tanda beyi nde muutu we itakwe Zambatisi, ni muutu we unte se Ukani ve Nzambi awayu, atakwe Zambatisi uneni.» 29Batu besi ne betoliŋgi be bedolo beyuka Zambatisi, ye bangu beyiba ati, Nzambi adzi telee, Zambatisi akaba bangu meteme. 30Ni batu be Falizi ne belakɨsi be bitsɨla belewe me Nzambi efumba pika bangu, ye bangu belewe ne meteme me Zambatisi.
31Zezu avele tanda ne bangu ati: «Wami ituka mikise batu belolo ba nedzi niza? We bangu bitala niza?» 32Bangu bedzi nda baana bete bidzi untsitsi se buma ye batu besi, boko beyukɨdze boko ati: «Besu babete beyi longo ati, beyi bebɨna, beyi beke bɨna, besu bayakwe limvu le kondo ni beyi beke lila!» 33Ni Zambatisi aya, wangu nde dza pembe, nde noto melaku, ni beyi ati: «Wangu adzi ne umbiti.» 34We yikwene Muutu meya, wangu adza anoto, beyi ati: «Wayayi muutu yu, wangu ayiba si idza ne inoto dze melaku, bedzi bembatsi ni betolingi be bedolo, ne batu bidzi ne mesumu.» 35Ni bemekidze ukani ve Nzambi beyiba ati, ukani vavu ni ve telee.
Zezu se ndaku ye Simo
36Muutu we Falizi abanga Zezu ne utse dza bila ndaku yedzi, Zezu atse ndaku ye muutu mene, asunda untsitsi ne udza. 37Yedze ne ŋwatu we fwati se ngundu yayu. Wangu ayuka ati, Zezu adza bila se ndaku ye Simo, wangu aya ne mbasi ye unyombo, 38wangu adze sɨna mekulu me Zezu, alila, yedzi ebolise mekulu me Zezu ne mesanga medzi, atsɨlile mesanga ne suyi yedzi, apoto mekulu me Zezu, yedzi esuwaka unyombo kule mekulu me Zezu. 39Muutu we Falizi we banga Zezu se ndaku yedzi, ayene vavu awowe se unlima ŋwedzi ati: «Muutu yu ti adzi si Muutu we Nzambi, tadzi wangu ayiba ati, ŋwatu we ibetime nedzi yu adzi ni fwati.» 40Zezu ne batu be Falizi ati: «Simo, me fumba tanda we dzamvu dzotu.» Simo nedzi ati: «Kuŋwu wowe.» 41Zezu atanda nedzi ati: «Muutu motu abikɨse batu bolo bedolo. Bimvu ye we wika yedze uyutsi, ni ye moko, ya takwese uyitsi. 42Nda besi bole bewata wʉta bimvu, wangu ayene bangu tsesi.» Atanda ne bangu ati: «Beyi besi bole bandu wʉta bimvu yayu.» Tima ye bangu bole witse tondo wangu uyitsi niza? 43Simo akalule ne Zezu ati: «Me tsimene miti witakwe moko bedolo beyitsi.» Zezu nedzi ati: «Wedzi ne mbingu.»
44Yedzi yikwene kwele ye ŋwatu, ne Simo ati: «We yene ŋwatu yu! Yami me nyidzile se ndaku yowe, wa ke swaka me mekulu, ni wangu aswaka me mekulu ne mesanga medzi, atsɨlile me mekulu ne sʉyi yedzi. 45Wa ke sanzile me, ni wangu ulayi vedzi meya, apoto mekulu mami. 46Wa ke suwaka me unyombo kule mulu, ni wangu asuwaka me unyombo se mekulu. 47Me tanda we dzamvu dzotu, ma boloko mesumu medzi mesi, yene utsɨna vedzi melaka itondo dziyitsi. Ni we biboloko mesumu ite, nedzi atondo si ite.» 48Zezu ne ŋwatu ati: «Ma boloko mesumu mowe mesi.» 49Batu bedze ne udza bila nedzi, batsimene se milima mye bangu ati: «Ayu muutu niza? Wituka boloko mesumu.» 50Ni Zezu atanda ne ŋwatu ati: «Ivʉkidze dzowe dzalungise we, tseke ne itavu.»
Terpilih Sekarang Ini:
Luk 7: WUM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
