Luk 6
6
Zezu ni Kuŋwu we vʉsa ve idzundu
1Vʉsa ve idzundu votu, Zezu alinanga mekʉba me mesangwe bane bebingi bedzi. Bebingi bedzi bavuneka mesangwe, banyukʉle mesangwe ne mekaka badza. 2Batu be Falizi ne bangu ati: «Ye beyi bipika tuu vʉsa ve idzundu niyi? Beyi nde yiba ati, yedzi ne tsɨla.» 3Ye Zezu ekalule ne bangu ati: «Beyi beke tangala, me Davidi epika, vʉsa votu ye nzala ye kwata wangu bane boko nedzi 4Davidi anyinzile se ndaku ye Nzambi, aboko pembe ye bekaba Nzambi, adza bane batu bedze ne usukʉdze wangu. Ni bituka dza pembe yayu, si bekabi be bisemi bye Nzambi.» 5Zezu avele tanda ne bangu ati: «Me we yikwene Muutu, me ni Kuŋwu we vʉsa ve idzundu.»
Zezu asaka muutu wedzi ne leme se boko
6Vʉsa voko ve idzundu, Zezu anyinzile se ndaku ye umbondu ne ulakɨse. Yedze ne muutu wedze ne leme se boko ye sangwe. 7Belakɨsi be bitsɨla ne batu be Falizi bedze ne uwaya, ne uyene ati, Zezu atse saka muutu vʉsa ve idzundu, ne bangu bifumba bomo mbingu ye upɨta Zezu. 8Ni Zezu eyiba metsimini me bangu. Zezu ne muutu widzi ne leme se boko ye sangwe ati: «Telime, dze wa busu ve batu besi.» Ye muutu etelime busu ve batu besi. 9Zezu ne bangu ati: «Me suŋwule beyi dzamvu dzotu, ye bituka pika vʉsa ve idzundu niyi? Mamvu meve na mamvu mebi? Usaka muutu na ubuuma wangu.» 10Zezu awaya bangu besi, yedzi etanda ne muutu mene ati: «Simvɨle boko.» Muutu asimvɨle boko, ne boko ya lunga. 11Bekuŋwu be bitsɨla ne batu be Falizi bakamve kate kamve amene. Ye bangu bewowe tima ye bangu ati: «Ni bebe baki pika ne Zezu yu nivi?»
Zezu atobo betuma bedzi iku ne bole
12Ndili mene yayu Zezu abita kule kudzi ne ubondo, yedzi ebondo Nzambi pinzi yesi. 13Vʉsa ve seŋwe Zezu abanga bebingi bedzi, atobo tima ye bangu batu iku ne bole, bedzi eluka kumvu ye betuma bedzi. 14Yenayi me kumvu me betuma be Zezu. Simo wedzi eluka kumvu ye Pyeli, ŋwanzi wedzi Andeli, Zaaki, Zan, Filipi, Batelemi. 15Matye, Toma, Zaaki ŋwana we Alife ne Simo witondo dzanza. 16Zude ŋwana we Zaaki ne Zuda Isɨkalyoti witse sumbise Zezu.
Zezu alakɨse batu asaka ne mibedzu
17Zezu asundaka kudzi bane betuma bedzi, basita se lindebe, buma yedze ne bebingi bedzi beyitsi. Yedze ne batu beyitsi be Zudee, se ngundu ye Zeluzalemi ne be bingundu bye Tili ne Sidoni. Ngundu ye Tili ne ye Sidoni, byedze ni uŋkolo ŋwe nzali ye metsimba. 18Batu baya yuka Zezu, baya saka ne me nyulu me bangu. Zezu asaka ne bedze ne mimbiti. 19Batu besi bafumba betime nedzi, ne singa yedze ne upula se nyulu yedzi, ne usaka mibedzu myesi.
Itsisa ne ndoko
20Zezu awaya bebingi bedzi, ne bangu ati:
«Itsisa ne beyi bidzi ne uŋkuuna,
ne Ukani ve Nzambi ni ve beyi!
21Itsisa ne beyi bidzi nzala lolo,
ne beyi betse yʉla,
itsisa ne beyi bilila lolo,
ne beyi betse sewe!»
22Itsisa ne beyi, ndili ye batu biwunda beyi, ye batu bilewe beyi, ye batu bitukene beyi, ye bitanda beyi mamvu mebi, utsɨna nami we yikwene Muutu. 23Tsisayi, tambayi ndili ye mamvu mamu mitse ya, ni Nzambi atse kaba beyi mewʉta meneni ikulu, ne bekoko be bangu bedze ne unyokɨle Batu be Nzambi si vavu.
24«Ni ndoko ne beyi bidzi ne untamvu,
ne beyi bamana bomo untamvu! 25Ndoko ne beyi bidzi ne byesi lolo, ni nzala yetse kwata beyi! Ndoko ne beyi bisewe lolo, beyi betse dze se ubi, ne beyi betse lila!»
26«Ndoko ne beyi ndili ye batu besi bakakɨse beyi, ne bekoko be bangu bedze ne upika si vavu ne Batu be Nzambi be uŋdzuma.»
Tondo biwʉnda we
27«Ni me tanda ne beyi, biyuka me miti, tondayi biwʉnda beyi, pikayi mamvu meve ne batu be nde tondo beyi. 28Kabayi batu biwunda beyi meve, bondayi Nzambi ne batu bipanda beyi. 29Ndili ye muutu idama we se ibuka dzotu, wa laka wangu ne dzoko. Ndili ye muutu ipinule we ingoyi dzineni, wa kaba wangu ne dzite. 30Kaba paka si muutu widzʉka we yila, ndili ye muutu iboko we yila we nde suŋwule. 31Pikayi boko me beyi bitondo ati, bepika ne beyi. 32Beyi ti batondo si bitondo beyi, beyi nde buka ati betse vʉtise beyi live, ni ne batu bidzi ne mesumu betondo si bitondo bangu. 33Ndili ye beyi bipika mamvu meve si ne batu bipika beyi meve, nde we ivʉtise beyi live, ne batu bidzi ne mesumu bepika si vavu. 34Ni beyi ti babikɨse bedolo ne batu bitse vʉtise beyi, nde witse vʉtise beyi live. Ne batu bidzi ne mesumu bebikɨse si bidzi ne mesumu nda bangu, ne bangu bivʉtise bangu si mvunu mene mbotu. 35Ni tondayi biwunda beyi, pikayi bangu mamvu meve, bikisayi bangu bedolo, beyi nde somo ivʉkidze ati, bangu betuka vʉtise beyi bedolo babu. Yayu beyi betse bomo mewuta meneni, beyi betse yikwe baana be Nzambi we ikulu amene. Wangu adzi uve ne batu be nde vʉtise wangu live ne batu benzulu. 36Dzayi ne tsesi ye batu nda ye Tata we beyi.»
Dzikayi pama boko
37«Beyi nde pama boko, yayu ne Nzambi nde tse pama beyi. Beyi nde kwise boko mikwaka, ne Nzambi nde tse kwise beyi mikwaka. Bolokayi boko ne Nzambi aboloko beyi. 38Kabayi boko ne Nzambi atse kaba beyi, betse lundise membele me beyi bataa matakʉse. Ne Nzambi atse kaba beyi nda beyi bikaba boko.» 39Zezu avele te bangu ngana mboko ati: «Muutu we nde mɨsa, nde tuka bapa moko nedzi we nde mɨsa nda wangu. Toko bangu besi bole banaŋwe se ibila. 40umbingi nde tuka takwe Kuŋwu, ni umbingi ŋwe beyebise lakɨse, atse dze nda Kuŋwu. 41Yowe iwaya lisawʉle lidzi se dzɨsa dze moko, ni we nde yene liyi ye lipayi lidzi se dzɨsa dzowe. 42Yowe itanda ne ŋwana mama witi: “Yaka me nanguse we lisawʉle lidzi se dzɨsa dzowe”. Ni we nde yene liyi ye lipayi lidzi se dzɨsa dzowe? Umpyeli ŋwowe ŋwaŋwu, banda nanguse liyi ye lipayi lidzi se dzɨsa dzowe, yayu we yene tselele, ne unanguse lisawʉle lidzi se dzɨsa dze ŋwana mama.»
Ŋwili ne mbulu yedzi
43«Ŋwili umve nde buta mbulu yimbi, ne ŋwili umbi nde buta mbulu yimve. 44Beyiba ŋwili umve ni ne mbulu yedzi. Nde tolo sawu kule bikaka bye me sendule, nde tolongo mboloko sɨna mɨsambi. 45Muutu widzi ne mamvu meve, awowe ni mamvu meve, nedzi idzi ne unlima umve. Muutu widzi ne mamvu mebi, awowe ni mamvu mebi, nedzi idzi ne unlima umbi. Mamvu me muutu iwowe, me laka midzi se unlima ŋwedzi.»
Mendaku mole
46Zezu avele tanda ati: «Beyi bebanga me, Kuŋwu, Kuŋwu, ni beyi nde pika mami itanda niyi? 47Muutu we ibinga me, we iyuka mami itanda, ne ukuuna me, yenayi wedzi itala. 48Wangu atala ni muutu we itunga ndaku, wangu aluma senze duu, asomo memanya atunga ndaku kule memanya. Ndili ye mvʉla we uneni ino, tunda yaya, mangu me unsulu makʉvele ndaku, ni ndaku yayu nde tuka anyingene ne betunga yangu uve. 49Ni muutu we iyuka mami itanda, ti nde pika mangu, yenayi wedzi itala. Wangu atala ni muutu we itunga ndaku nde luma ibila. Ndili ye mangu me unsulu miya ye mangu mibula ndaku, ye ndaku yi naŋwe, ye yangu yi tsalive yesi.»
Terpilih Sekarang Ini:
Luk 6: WUM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
