ISIKELI 26
26
Ko Taia, ni sa vosalevutaki Jerusalemi, sa cudruvi kina, 1-6. Ena gumatua ko Nepukanesa ni sa veivaluti kaya, 7-14. O ira kece na turaga ni veivanua era dausokota era na tagicaki koya ni sa bale, 15-21.
1Ia e nai katinikadua ni yabaki, e nai matai ni siga ni vula, sa yaco vei au na vosa i Jiova, ka vaka,
2Ko iko na luve ni tamata, ni sa vosataki Jerusalemi ko Taia, ka kaya, Ue, sa ramusu ko koya ka nodra matamata-ni-koro ko ira na veimataqali; sa vuki mai vei au ko koya: au na vakavutuniyautaki, ni sa lala mai ko koya: 3o koya oqo sa kaya kina na Turaga ko Jiova, ka vaka; Mo kila, au sa veimecaki kei iko, Taia, ia ka'u na kauta cake mai vei iko na veimatanitu e vuqa, me vaka na ua ni sa se mai ki na wasawasa. 4A ra na vakarusa na bai kei Taia, ka basuka sobu na kena veivale cecere: ia ka'u na taviraka tani na kena kuvu-ni-soso, ka vakatautauvatataki koya kei na dela ni vatu. 5Ka na yaco mei sasau ni lawa e loma ni wasawasa: ni sai au ka cavuta, sa kaya na Turaga ko Jiova: ia ena yaco ko koya me nodra i toki ni valu na veimatanitu. 6A luvena yalewa talega mai tailevu era na mate e nai seleiwau, ka ra na kila ni sai au ko Jiova.
7Ni sa kaya vakaoqo na Turaga ko Jiova; Raica, au na kauti Nepukanesa na tui Papiloni ki Taia, mai na mata ni tokalau, ko koya na nodra tui na tui, kei na ose, kei na qiqi-ni-valu, kei nai valu e vodo ose, kei nai vavakoso, kei na tamata e lewe vuqa. 8Na luvemu yalewa mai tailevu ena vakamatea ko koya e nai seleiwau: ia ena cakava na kemu vale ni valu, ka viria na kemu suva, ka vakaduria na kemui vakaruru. 9Ia na kemui tukituki ni bai ena vakaduria ko koya ki na nomu bai, ka basuka sobu na nomu vale-cecere e na nona matau. 10Ni sa levu na nona ose ena kuvuci iko taucoko na nodra kuvu-ni-soso: e na vuku ni domo ni valu sa vodo ose, kei na qiqi-ni-yaya, kei na qiqi-ni-valu, ena yavala kina na nomu bai, ni sa curu ko koya ki na nomu matamata-ni-koro, me vaka ni sa curumi na koro sa kabasu. 11E na ququ ni nona ose ena butuka kece kina na nomu sala: ena vakamatei ira na nomu tamata e nai seleiwau, kei na nomu bai ni valu kaukauwa ena bale sobu ga ki na qele. 12A ra na tokitaka na nomu i yau, ka koveraka na nomu ka ni veivoli: ka ra na basuka sobu na nomu bai, ka vakacacana na nomu veivale domoni: ia era na viritaka ki loma ni wai na nomu veivatu kei na nomu kau ni vale kei na nomu kuvu-ni-soso. 13Ia ka'u na vakaotia na domo ni nomu meke: ia na domo ni nomu api ena sega tale ni rogo. 14Ia ka'u na cakavi iko mo tautauvata kei na dela ni vatu: ko na yaco mei sasau ni lawa; ko na sega tale ni tara; ni sai au ko Jiova ka'u sa cavuta, sa kaya na Turaga ko Jiova.
15Sa kaya vakaoqo na Turaga ko Jiova ki Taia; Ni sa rorogo na nomu bale, ka ni ra vutugu tiko ko ira na vuetaki, ni sa ia na veivakamatei e na kemu maliwa, me na qai sega li ni yavavala kina na veiyanuyanu? 16Era na qai lako sobu mai na nodra i tikotiko na turaga kece ni wasawasa, ka biuta na nodra i tutuvi, ia era na luvata tani na nodra i sulu veivolavolai: era na vakaisulu e na sautaninini; era na tiko sobu ki na qele, ka sautaninini tikoga, ka kidacalataki iko. 17A ra na taurivaka na lele e na vukumu, ka kaya vei iko, Na kemu rusa, ko iko ka tawa e na kai wai, na koro rogo, ka daugumatua mai na wasawasa, ko koya kei na lewena, ka ra dauveivakarerei vei ira kecega era tiko kina! 18Ena qai sautaninini na veiyanuyanu e na siga ni nomu bale; io, ena kidroa na veiyanuyanu e na loma ni wasawasa ni ko sa lako tani. 19Ni sa kaya vakaoqo na Turaga ko Jiova; Ni'u na vakalalataki iko, me vaka na veikoro sa sega tiko ni tawa; ni'u na kauta cake mai vei iko na wasa titobu, ka na sa luvuci iko na wai levu; 20ni'u na kauti iko sobu kei ira era lako sobu ki nai keli, vei ira na tamata eliu, ka vakatikori iko e na ruku i vuravura, e na veitikina sa rusa makawa, kei ira era lako sobu ki nai keli, mo kakua ni tawa tale; ni'u na vakatikora talega nai ukuuku e na nodra vanua na bula; 21ka'u na qai cakavi iko mo ka rerevaki, ia ko na qai yali sara: ia kevaka ko sa dauqarai, ko na sega sara ni kune tale, sa kaya na Turaga ko Jiova.
Одоогоор Сонгогдсон:
ISIKELI 26: FOV
Тодруулга
Хувилах
Харьцуулах
Хуваалцах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Vakavakadewa Makawa (Fijian Old Version) © Bible Society of the South Pacific