ISIKELI 19
19
Sa lelevaki ko ira na luve ni tui, e na vosa vakatautauvata ni luve ni laioni sa rawai e nai keli, 1-9; sa lelevaki talega ko Jerusalemi, e na vosa vakatautauvata ni vaini sa malai, 10-14.
1Ia oqo ko iko, mo taurivaka na lele e na vukudra na turaga ni Isireli, 2ka kaya, A cava na tinamu? A laioni yalewa: sa koto ko koya e na kedra maliwa na laioni, e na kedra maliwa na luve ni laioni, sa maroroya na luvena. 3Ka sa raica vinaka e dua na luvena: ka sa tubu cake me laioni kaukauwa cake, a sa vakavulici me toboka na kena; ka sa daukana tamata. 4Era sa rogoca kina na veivanua; ka sa tobo e na nodra i keli, ka ra sa kauti koya ni sa vesu tu ki na vanua ko Ijipita.
5Ia ni sa raica na laioni yalewa ni sa wawa tiko ko koya, ka sa yali na ka e nuitaka, sa qai kauta e dua tale na luvena, ka maroroi koya me laioni kaukauwa cake. 6A sa veilakoyaki tu e na kedra maliwa na laioni, ka sa tubu cake me laioni kaukauwa cake, ka sa vakavulici me toboka na kena, ka sa daukana tamata ko koya. 7Ka sa kunea ko koya na nodra vale vakaturaga sa lala tu, a sa vakalalataka na nodra veikoro; ka sa rusa na vanua, kei na ka kece sa tu kina, e na vuku ni rorogo ni nona tagi.
8Sa qai mai vala kaya na veimatanitu mai na veiyasana mai na veiqali, ka ra tevuka vua na nodra lawa: ia sa tobo e na nodra i keli. 9A ra sa sogolati koya ni sa vesuki, ka kauti koya vei tui Papiloni: era kauti koya ki na dua na vale kaukauwa, me kakua ni rogo tale na domona e na veiulu-ni-vanua ni Isireli.
10A tinamu, e vaka na vaini vakataki iko, sa tei e na bati ni wai: sa vuavuai vinaka ka sa levu na drauna e na vuku ni levu ni wai. 11A sa vakatabana kaukauwa me nodra i titoko masei era ia na lewa, ka sa cecere vakaidina ko koya e loma ni taba ni kau rugurugua, a sa rairai vakacecere ko koya ni sa vuqa na tabana.
12Ia sa cavuivuvutaki ko koya e na cudru, sa biu sobu ki na qele, ia na cagi mai na tu-i-cake sa vakamalaitaka na vuana: sa raramusumusu na tabana kaukauwa ka sa malai; ka sa yavu e na bukawaqa. 13Ia sa qai tei ko koya e na veikau, e na vanua mamaca ka dausiga. 14A sa lako tani na bukawaqa mai na dua na basaga lailai ni tabana, a sa kama kina na vuana, ka sa qai sega kina na tabana kaukauwa me caka kina nai titoko masei me ia kina na lewa. Sa vakaoqo na lele, ia ena yaco me ka e lelevaki.
Одоогоор Сонгогдсон:
ISIKELI 19: FOV
Тодруулга
Хувилах
Харьцуулах
Хуваалцах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Vakavakadewa Makawa (Fijian Old Version) © Bible Society of the South Pacific