زَكَرِيَّا 2
2
رُؤية الحبِل اليقاوُسوا بيه
1وَ بَتَّانْ أَنَا رَفَعْت رَاسِي وَ شِفْت رُؤْيَةْ. وَ دَاهُو شِفْت صَبِي وَ عِنْدَهْ فِي إِيدَهْ حَبِلْ الْيِقَاوُسُوا بَيَّهْ. 2وَ أَنَا سَأَلْتَهْ وَ قُلْت لَيَّهْ: «إِنْتَ مَاشِي وَيْن؟» وَ هُو قَالْ لَيِّ: «مَاشِي نِقَاوِسْ مَدِينَةْ الْقُدُسْ لِنَعَرِفْ عُرْضَهَا وَ طُولْهَا كَمْ.»
3وَ بَعَدْ دَا، الْمَلَكْ الْقَاعِدْ يِحَجِّي لَيِّ قَمَّ مَاشِي وَ مَلَكْ آخَرْ جَاءْ لَاقَاهْ. 4وَ الْمَلَكْ الْأَوَّلْ قَالْ لِلْآخَرْ: «أَجْرِي حَجِّي لِلصَّبِي دَا وَ قُولْ لَيَّهْ: ‹مَدِينَةْ الْقُدُسْ تَقْعُدْ مَفْتُوحَةْ بَلَا دُرْدُرْ أَشَانْ النَّاسْ وَ الْبَهَايِمْ بِقَوْا كَتِيرِينْ فِي أُسُطْهَا.› 5وَ دَاهُو كَلَامْ اللّٰهْ: ‹أَنَا ذَاتِي نُكُونْ لَيْهَا دُرْدُرْ هَنَا نَارْ مُحَوِّقْهَا. وَ فِي أُسُطْهَا، نُكُونْ مَجْدَهَا.›»
اللّه ينادي شعبه الفي الغُرْبة
6دَاهُو كَلَامْ اللّٰهْ:
«يَلَّا! يَلَّا!
إِنْتُو الْأَنَا شَتَّتُّكُو فِي الْجِيهَاتْ الْأَرْبَعَةْ،
عَرُّدُوا مِنْ بَلَدْ الْمُنْشَاقْ!
وَ دَا كَلَامْ اللّٰهْ.
7يَلَّا! يَا صَهْيُون!
إِنْتِ السَّاكْنَةْ فِي بَابِلْ الْمِثِلْ بِنَيَّةْ،
عَرِّدِي مِنْ هِنَاكْ!»
8مَجْد اللّٰهْ رَسَّلَانِي أَنَا زَكَرِيَّا ضِدّ الْأُمَمْ النَّهَبَوْكُو وَ دَاهُو اللّٰهْ الْقَادِرْ قَالْ:
«أَيِّ نَادُمْ الْيِلَمِّسْكُو
دَا مِثِلْ لِمِسْ وَلْد عَيْنِي.
9أَيْوَى، دَاهُو نَرْفَعْ إِيدِي ضِدُّهُمْ
حَتَّى عَبِيدْهُمْ كُلَ يَنْهَبَوْهُمْ.»
وَ بَيْدَا، تَعَرْفُوا كَدَرْ اللّٰهْ الْقَادِرْ، هُو بَسْ رَسَّلَانِي.
10دَاهُو كَلَامْ اللّٰهْ:
«زَغْرِطِي وَ أَفْرَحَيْ،
يَا صَهْيُون الْمِثِلْ بِنَيَّةْ،
أَشَانْ دَاهُو أَنَا جَايِ نَسْكُنْ فِي أُسُطْكِ.
11وَ فِي الْيَوْم دَا، أُمَمْ كَتِيرِينْ
يِنْكَرْبُوا فَوْقِي أَنَا اللّٰهْ.
وَ يَبْقَوْا شَعَبِي حَلَالِي.
وَ أَنَا نَسْكُنْ فِي أُسُطْكُو.»
وَ بَيْدَا، تَعَرْفُوا كَدَرْ اللّٰهْ الْقَادِرْ، هُو بَسْ رَسَّلَانِي لَيْكُو.
12وَ بَلَدْ يَهُوذَا تَبْقَى هِنْت اللّٰهْ حَلَالَهْ
مِثِلْ قِسْمَهْ فِي الْأَرْض الْمُقَدَّسَةْ
وَ هُو يَعَزِلْ بَتَّانْ مَدِينَةْ الْقُدُسْ.
13خَلِّي كُلَّ مَخْلُوقْ حَيّ
يَسْكُتْ قِدَّامْ اللّٰهْ
أَشَانْ هُو مَرَقْ
مِنْ مَسْكَنَهْ الْمُقَدَّسْ.
Одоогоор Сонгогдсон:
زَكَرِيَّا 2: ع.د.ت19
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
La Bible en arabe tchadien © Alliance biblique du Tchad, 2019