ᓴᑲᕅᐊᐅᑉ ᐊᒡᓚᖏᑦ 8
8
ᐊᑕᓂᐅᑉ ᐊᖏᕐᓂᖓ ᔨᕉᓴᓕᒥᒃ ᐅᑎᕐᑎᑦᓯᔪᒪᓪᓗᓂ ᐱᐅᓯᕆᓚᐅᕐᑕᖓᓄᑦ
1ᓱᓕ ᐊᑕᓂᐅᑉ ᐊᔪᒐᖃᖏᑦᑑᑉ ᐅᖃᐅᓯᖓᑕ ᑎᑭᓚᐅᕐᐹᖓ. ᐅᖃᕐᓗᓂ; 2ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, “ᐊᖏᔪᐊᓗᖕᒥᒃ ᓯᕐᓈᕋᒪ ᓮᐅᓂ ᐱᑦᔪᑎᒋᓪᓗᒍ; ᐊᑭᕋᖏᑦ ᓯᕐᓈᕐᕕᒋᒐᒃᑭᑦ ᓇᒡᓕᖕᓂᕋ ᐊᖏᔪᐊᓘᖕᒪᑦ ᓮᐅᓂᒧᑦ. 3ᐃᒫᒃ ᐊᑕᓂᖅ ᐅᖃᕐᐳᖅ, ᓮᐅᓂᒧᑦ ᐅᑎᕐᓂᐊᕐᐳᖓ ᔨᕉᓴᓕᒥᓗ ᐃᓂᖃᓕᕐᓗᖓ. ᓄᓇᓕᒡᔪᐊᑦ ᑕᕝᕙᓂ ᑍᔭᐅᓕᕈᒫᕐᐳᑦ ᓱᖁᓯᔪᐃᑦᑐᒥᒃ, ᖃᖅᑲᕐᓗ ᓄᓇᓖᑦ ᐃᓂᒋᔭᖓ ᑍᔭᐅᓕᕈᒫᕐᐳᖅ ᐊᑕᓂᐅᑉ ᖃᖅᑲᖓᓂᒃ ᐃᑦᔪᕐᓁᑦᑐᒥᒃ. 4ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ; ᐃᓄᑐᕾᑦ ᓂᖏᐅᑦ ᐃᑦᑐᐃᓪᓗ ᔨᕉᓴᓕᐅᑉ ᐊᖅᑯᑎᖏᑕ ᓯᓚᑖᓂ ᐃᒃᓯᕚᕈᓐᓇᕐᓯᔪᒫᕆᕗᑦ, ᐊᔭᐅᑉᐱᐊᑎᒡᓗ ᑎᒍᒥᐊᕐᓗᒋᑦ ᐃᓄᑐᖃᐅᓗᐊᕐᓂᕐᒧᑦ. 5ᓄᓇᓕᒡᔪᐊᓪᓗ ᐊᖅᑯᑎᖏᓐᓂ ᓄᑲᑉᐱᐊᑦ ᓂᕕᐊᕐᓵᓪᓗ ᐱᓐᖑᐊᕐᑐᑦ ᑕᑯᒃᓴᐅᓕᕈᒫᕆᕗᑦ.”
6ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ: “ᑕᒪᓐᓇ ᐃᓱᒪᒋᓗᒍ ᑲᒪᓇᕐᑐᐊᓘᒐᔭᕐᐳᖅ ᒫᓐᓇ ᐊᒥᐊᑰᓪᓗᑎᒃ ᐃᓅᔪᓄᑦ, ᐅᕙᓐᓄᑦ ᑕᒪᓐᓇ ᐊᔪᕐᓇᕋᔭᕆᕚ? ᐊᑕᓂᖅ ᖁᑦᓯᖕᓂᕐᐹᖅ ᐅᖃᕐᐳᖅ. 7ᐃᒫᒡᓗ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕆᕗᖅ: ᐃᓄᖁᑎᒃᑲ ᓴᐳᑎᔪᒫᕐᐸᒃᑲ ᓯᑭᓂᐅᑉ ᓄᐃᕕᐊᓃᑦᑐᑦ ᓂᐱᕕᐊᓃᑦᑐᓪᓗ. 8ᐅᑎᕐᑎᑦᓱᒫᕐᐸᒃᑲ ᔨᕉᓴᓕᒥ ᐃᓂᖃᓕᖁᓪᓗᒋᑦ ᓯᕿᓂᐅᑉ ᓄᐃᓕᕐᕕᐊᓂᑦ ᓂᐱᕕᐊᓄᑦ; ᐃᓄᖁᑎᒋᔪᒫᕐᐸᒃᑲ, ᐅᕙᖓᓗ ᓱᖁᓯᔪᐃᑑᓗᖓ ᐃᖅᑲᕐᑐᐃᑦᓯᐊᕐᓗᖓᓗ ᑖᒃᑯᓄᖓ ᒎᑎᒋᔭᐅᔪᒫᕐᐳᖓ.”
9ᐃᒫᒡᓗ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕆᕗᖅ: “ᐃᓕᑦᓯ ᒫᓐᓇ ᐅᖃᐅᓯᕐᓂᒃ ᑐᓴᕐᑐᓯ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᓐᓂᑦ ᐅᖃᐅᓯᐅᕙᓚᐅᕐᑐᑦ ᐊᑦᔨᖏᓐᓂᒃ ᐊᑕᓂᐅᑉ ᐃᒡᓗᖓᑕ ᑐᓐᖓᕕᖏᑦ ᓴᓇᔭᐅᕙᓪᓕᐊᑦᔪᑎᒃᓴᖏᓐᓄᑦ, ᐊᒡᒐᓯ ᓴᓐᖏᔫᑦᓯᐊᕐᓕᑦ ᑐᒃᓯᐊᕐᕕᒡᔪᐊᖅ ᓴᓇᔭᐅᔪᓐᓇᖁᓪᓗᒍ. 10ᑍᑦᓱᒪᓂ ᑕᒪᑐᒪ ᓯᕗᕐᖓᓂ ᐃᖅᑲᓁᔭᕐᑐᖃᕈᓐᓇᓚᐅᓐᖏᓚᖅ ᐃᓄᖕᒥᒃ ᓂᕐᔪᑎᒥᒡᓘᓐᓃᑦ. ᑭᓇᓘᓐᓂᑦ ᓯᕘᕋᖏᓪᓗᓂ ᐱᓇᓱᐊᕈᓐᓇᓚᐅᓐᖏᓚᖅ ᐊᑭᕋᓂ ᐱᑦᔪᑎᒋᓪᓗᒋᑦ, ᐃᓄᓕᒫᑦ ᐃᓅᖃᑎᒥᖕᓂᒃ ᐊᑭᕋᕐᑐᕐᑎᓚᐅᕋᒃᑭᑦ. 11ᒫᓐᓇᓕ ᐃᓄᐃᑦ ᐊᒥᐊᒃᑰᔪᑦ ᐱᓇᓱᐊᕐᕕᒋᓂᐊᕐᐸᒃᑲ ᑍᑦᓱᒪᓂᑐᑦ,” ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ. 12“ᐱᕈᕐᓯᐊᒃᓴᓂᒃ ᐱᕈᕐᓰᕕᖕᒥᖕᓄᑦ ᐃᓕᐅᖅᑬᔪᒫᕐᐳᑦ ᓯᕘᕋᖏᓪᓗᑎᒃ. ᕔᓂᒃᓴᖁᑎᖏᓪᓗ ᐱᕈᕐᕕᐅᑦᓯᐊᕈᒫᕐᐳᑦ, ᓄᓇᒥᓗ ᐱᕈᕐᓯᐊᖏᑦ ᓂᕿᒃᓮᑦ ᐱᕈᑦᓯᐊᓗᕐᑎᒃ, ᓯᓚᓗᖃᑦᑕᑦᓯᐊᕐᓗᓂᓗ, ᑕᒪᒃᑯᐊ ᑍᒫᒃ ᐱᓇᓱᐊᕈᒪᕙᒃᑲ ᐃᓄᐃᑦ ᐊᒥᐊᒃᑯᑦ ᑭᖑᕐᖑᑦᔨᖁᓪᓗᒋᑦ ᑕᒪᑐᒥᖓ. 13ᔫᑕᒥ ᐃᓴᕆᐊᓕᒥᓗ ᓄᓇᖃᕐᑐᓯ ᐃᓅᖃᑎᒌᒡᔪᐊᓂᑦ ᓇᕐᕈᓇᕐᓂᕋᕐᑕᐅᕙᒃᐳᓯ ᐱᐅᖏᑦᑐᐊᓘᓂᕋᕐᑕᐅᕙᒡᓗᓯᓗ, ᑍᒤᒻᒪᑦ ᓴᐳᑎᔪᒪᕙᑦᓯ, ᓮᒻᒪᕐᑕᐅᑦᔪᑎᒃᓴᐅᓕᕈᒫᕐᐳᓯ ᐊᓯᑦᓯᓐᓄᑦ, ᑲᑉᐱᐊᓱᓐᖏᓕᕆᑦᓯ ᓯᕘᕋᓇᓯᓗ.”
14ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ: “ᑲᑉᐱᐊᓇᕐᑐᓄᑦ ᑎᑭᑕᐅᓂᐊᕐᓂᕋᕐᓗᒋᑦ ᓯᕗᓕᓯ ᓂᑲᒋᓇᒋᑦ ᐅᖃᐅᑎᕙᓚᐅᕋᒃᑭᑦ ᐅᕙᓐᓂᒃ ᑲᒪᔪᒪᖏᓐᓂᖏᓐᓂᒃ ᓂᓐᖓᒍᑎᖃᓚᐅᕋᒪ. 15ᒫᓐᓇᓕ ᐱᐅᔪᒥᒃ ᐱᔪᒪᓕᕆᕗᖓ ᔨᕉᓴᓕᒧᑦ ᔫᑕᒧᓪᓗ. ᑍᒤᒻᒪᑦ ᓯᕘᕋᓇᓯ. 16#ᐃᐱᓯ 4:25.ᐃᒫᒃ ᑕᕝᕙ ᐃᓕᑦᓯᓐᓄᑦ ᐱᐅᓯᕆᔭᐅᖁᔭᒃᑲ: ᓱᓕᔪᒥᒃ ᐃᓕᑦᓯᓐᓄᑦ ᐅᖃᐅᓯᖃᖃᑦᑕᕐᓗᓯ. ᐃᖅᑲᕐᑐᐃᕕᖕᓂᓗ, ᓱᓕᑦᓯᐊᕐᑐᒥᒃ ᓮᒻᒪᕐᓮᔪᒥᒡᓗ ᐃᖅᑲᕐᑐᐃᖃᑦᑕᕐᓗᓯ. 17ᐃᓅᖃᑎᑦᓯᓐᓄᑦ ᐱᐅᖏᑦᑐᒥᒃ ᐱᓂᐊᕐᕕᖃᕈᒪᓗᓯ ᐃᓱᒪᒃᓴᕐᓯᐅᕐᓂᐊᕐᓇᓯ, ᐊᖏᕐᑎᑕᐅᓯᒪᓗᓯᓗ ᓴᒡᓗᑎᖃᕐᓂᐊᕋᓯ. ᑕᒪᒃᑯᐊ ᑍᒤᓕᐅᕐᓃᑦ ᐆᒥᒋᕙᒃᑲ,” ᐊᑕᓂᖅ ᐅᖃᕐᐳᖅ.
18ᓱᓕ ᐊᑕᓂᐅᑉ ᐊᔪᒐᖃᖏᑦᑐᑉ ᐅᖃᕐᕕᒋᕚᖓ. ᐅᖃᕐᓗᓂ: 19“ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᓂᕆᑦᑍᓕᕖᑦ ᑕᖅᑮᑦ ᓯᑕᒪᖓᓐᓂ, ᑕᖅᑮᓪᓗ ᑕᓪᓕᒪᖓᓐᓂ, ᑕᖅᑮᓪᓗ 7ᖓᓐᓂ. ᑕᖅᑮᓪᓗ 10ᖓᓐᓂ, ᑖᒃᑯᐊ ᖁᕕᐊᓇᕐᓗᑎᒃ ᓯᕆᓂᐅᓕᕐᓗᑎᒡᓗ ᓇᓪᓕᐅᓐᓂᕐᓯᐅᕐᕕᐅᔪᒫᕐᐳᑦ ᔫᑕᒥ ᓄᓇᖃᕐᑐᓄᑦ. ᑐᑭᖃᕐᓗᑎᒃ ᓇᒡᓕᖕᓂᕐᒥᒃ ᓱᓕᑦᓯᐊᕐᓂᕐᒥᒡᓗ ᖃᓄᐃᖏᑦᓯᐊᕐᓂᕐᒥᒡᓗ.
20“ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ; ᓇᓪᓕᐅᑎᔪᒫᕐᐳᖅ ᐃᓄᐃᑦ ᐅᓄᕐᑐᑦ ᑎᑭᑦᓱᒫᕐᒪᑕ, ᓄᓇᓕᖕᓂᑦ ᐅᓄᕐᑐᓂᑦ ᐱᓯᒪᔪᑦ. 21ᓄᓇᓖᑦ ᐃᒡᓗᒐᓴᒡᔪᐊᕐᒥ ᐊᑕᐅᓯᕐᒥ, ᓄᓇᓖᑦ ᐊᓯᖏᓐᓄᑦ ᐅᐸᒍᑎᔪᒫᕐᐳᑦ, ᐅᖃᕐᓗᑎᒡᓗ, ᑐᐊᕕᕐᓗᑕ ᐊᑕᓂᐅᑉ ᓵᖓᓄᑦ ᑐᒃᓯᐊᕆᐊᕐᑐᓕᕐᑕ, ᕿᓚᖕᒥᐅᖔᓴᒡᔪᐃᑦ ᐊᑕᓂᖓᑦ ᕿᓂᕐᓗᒍ: ᐊᑕᓂᖅ ᐅᖃᕆᕗᖅ ᐅᕙᖓᑦᑕᐅ ᕾᔪᒪᒋᕗᖓ. 22ᐃᓄᐃᑦ ᐅᓄᕐᑐᑦ ᐃᓅᖃᑎᒌᒡᔪᐊᓪᓗ ᓴᓐᖏᔪᑦ ᕾᔪᒫᕐᐳᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᕿᓂᕈᒪᓪᓗᒍ ᔨᕉᓴᓕᒥ, ᑐᒃᓯᐊᕐᓗᑎᒡᓗ ᐊᑕᓂᐅᑉ ᓵᖓᓂ. 23ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫᒃ ᐅᖃᕐᐳᖅ; ᐅᓪᓗᓂ ᑍᒃᑯᓇᓂ ᐃᒫᒃ ᐱᔪᖃᕈᒫᕐᐳᖅ, ᐊᖑᑎᑦ ᖁᓕᑦ ᐃᓅᖃᑎᒌᒡᔪᐊᓂᑦ ᐅᖃᐅᓯᖃᑎᒌᖏᑦᑐᑦ, ᔫᑎᒥᒃ ᐊᓐᓄᕌᖓᒍᑦ ᑎᒍᓯᔪᒫᕐᐳᑦ ᐅᖃᐅᑎᓗᒍᓗ, ‘ᑍᑯᓐᖓᖃᑎᒋᓚᐅᕐᓚᑦᑎᒋᑦ ᑐᓴᐅᒪᒐᑦᑕ ᒎᑎᐅᑉ ᐃᓚᒋᖕᒪᓯ.’”
Одоогоор Сонгогдсон:
ᓴᑲᕅᐊᐅᑉ ᐊᒡᓚᖏᑦ 8: EAIB
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Eastern Arctic Inuktitut Bible © Canadian Bible Society, 2012, 2021-2023.