မဿဲ 16
16
နိမိတ်လက္ခဏာကိုတောင်းဆိုခြင်း
1တစ်နေ့သ၌ ဖာရိရှဲများနှင့် ဇဒ္ဒုကဲတို့သည် ကိုယ်တော်ယေရှုအား စမ်းသပ်လို၍ ကိုယ်တော့်ထံလာပြီး ရွှေမြို့တော်မှ အံ့ဖွယ်နိမိတ်လက္ခဏာတို့ကို ပြသရန် တောင်းဆိုကြ၏။
2ကိုယ်တော်ကလည်း “ညနေခင်းချိန်ရောက်သောအခါ ကောင်းကင်သည် အနီရောင်သန်းနေသောကြောင့် သင်တို့သည် ရာသီဥတုသာယာလိမ့်မည်ဟု ဆိုကြ၏။ 3ထို့အပြင် မနက်စောစောတွင်လည်း ကောင်းကင်သည် နီမြန်းပြီး အုံ့မှိုင်းနေလျှင် သင်တို့သည် မိုးရွာလိမ့်မည်လို့ဆိုကြ၏။ သင်တို့သည် ကောင်းကင်၏ပုံပန်းသွင်ပြင်ကိုကြည့်၍ ရာသီဥတုကိုခန့်မှန်းနိုင်သော်လည်း ဤအချိန်မှာရှိသော နိမိတ်လက္ခဏာတို့ကိုကြည့်ပြီး သင်တို့ ခန့်မှန်းနိုင်မည်မဟုတ်ပေ။ 4ယုတ်ညံ့သူနှင့် ယုံကြည်မှုကင်းမဲ့သူများသည် အံ့ဖွယ်နိမိတ်လက္ခဏာများကို မြင်ချင်ကြသော်လည်း ယောန၏နိမိတ်လက္ခဏာမှလွဲ၍ အခြားမည်သည့်နိမိတ်လက္ခဏာကိုမှ ပြသမည်မဟုတ်” ဟုမိန့်တော်မူပြီးနောက် ကိုယ်တော်သည် သူတို့ထံမှ ထွက်ခွာသွားတော်မူ၏။
ဖာရိရှဲနှင့် ဇဒ္ဒုကဲတို့၏တဆေး
5တပည့်တော်တို့သည် ဂါလိလဲအိုင်တဖက်ကမ်းသို့သွားသောအခါ မုန့်များကို ယူဆောင်ရန် မေ့လျော့ခဲ့ကြ၏။ 6ထိုအခါ ကိုယ်တော်ယေရှုသည် သူတို့အား “ဂရုစိုက်ကြလော့၊ ဖာရိရှဲနှင့် ဇဒ္ဒုကဲတို့၏တဆေးကို သတိထားကြလော့” ဟုမိန့်တော်မူလေ၏။
7သို့သော် တပည့်တော်တို့က “ငါတို့သည် မုန့်များကို မယူလာမိခြင်းကြောင့် ကိုယ်တော်က ဤသို့မိန့်တော်မူခြင်းဖြစ်မည်” ဟု အချင်းချင်း တိုင်ပင်ပြောဆိုကြ၏။
8ထိုသို့ပြောဆိုကြသည်ကို ကိုယ်တော်ယေရှု သိတော်မူလျှင် “ယုံကြည်မှုအားနည်းသူတို့၊ မုန့်မပါခြင်းကို ဘာကြောင့် သင်တို့ အချင်းချင်းငြင်းခုန်နေကြသနည်း။ 9သင်တို့ နားမလည်ကြသေးသလော။ မုန့်ငါးလုံးကို လူငါးထောင်အား ကျွေးသောအခါ တောင်းမည်မျှရသည်ကို သင်တို့မမှတ်မိကြသလော။ 10မုန့်ခုနစ်လုံးကို လူလေးထောင်အား ကျွေးသောအခါ တောင်းမည်မျှရသည်ကို သင်တို့မမှတ်မိကြသလော။ 11ငါသည် မုန့်အကြောင်းကို ပြောဆိုနေခြင်းမဟုတ်သည်ကို သင်တို့အဘယ်ကြောင့်နားမလည်နိုင်သနည်း။ ဖာရိရှဲနှင့် ဇဒ္ဒုကဲတို့၏တဆေးကို သတိထားကြလော့” ဟုမိန့်တော်မူ၏။ 12ထို့နောက် သူတို့သည် ကိုယ်တော်သည် မုန့်ထဲမှ တဆေးကို သတိထားရန်ပြောနေခြင်းမဟုတ်ဘဲ ဖာရိရှဲနှင့် ဇဒ္ဒုကဲတို့၏သွန်သင်မှုများကို သတိထားရန်ပြောနေခြင်းဖြစ်ကြောင်း နားလည်သွားကြလေ၏။
ကိုယ်တော်ယေရှုသည် ခရစ်တော်ဖြစ်ကြောင်းပေတရုဝန်ခံခြင်း
13ထို့နောက် ဆီဇာရီးယားဖိလိပ္ပိနယ်မြေသို့ရောက်သောအခါ ကိုယ်တော်က သူ၏တပည့်တော်တို့အား “လူတို့က လူ့သားတော်သည် မည်သူဖြစ်သည်ဟု ဆိုကြသနည်း” ဟုမိန့်တော်မူလေရာ
14တပည့်တော်တို့က “အချို့က ရေနှစ်မင်္ဂလာဆရာယောဟန်၊ အချို့က အရိယာသူတော်စင် ဧလိယ၊ အချို့က ယေရမိ သို့မဟုတ် အရိယာသူတော်စင်များထဲက တစ်ပါးဟုဆိုကြပါသည်” ဟူ၍လျှောက်ကြလေ၏။
15ထိုအခါ ကိုယ်တော်က တပည့်တော်တို့အား “သင်တို့ကမူ ငါ့အား မည်သူဟုဆိုကြမည်နည်း” ဟုမေးတော်မူသဖြင့် 16ရှိမုန်ပေတရုကလည်း “ကိုယ်တော်သည် သက်ရှိထင်ရှားရှိတော်မူသော ဘုရားရှင်၏သားတော် ခရစ်တော်ပင်ဖြစ်သည်” ဟုပြန်လည်လျှောက်တင်လေ၏။
17ကိုယ်တော်ယေရှုကလည်း “ယောန၏သား ရှိမုန်၊ သင်သည် မင်္ဂလာရှိပေ၏။ မည်သူတစ်ဦးတစ်ယောက်မှ ဤအရာကို သင့်အား မပြသခဲ့သော်လည်း ရွှေမြို့တော်၌ရှိတော်မူသော အဖဘုရားရှင်သည် သင့်ကို ပြသတော်မူခဲ့ပြီ။ 18သင့်အား ငါဆိုသည်ကား သင်သည် ပေတရုဖြစ်၏။ ပေတရုဆိုသည်မှာ ကျောက်တုံးဟု အဓိပ္ပါယ်ရ၏။ ထို့ကြောင့် ဤကျောက်တုံးပေါ်တွင် ငါ၏အသင်းတော်ကို တည်ဆောက်မည်။ သေခြင်းတရားပင်လျှင် ဤအသင်းတော်အပေါ်၌ စိုးမိုးနိုင်မည်မဟုတ်။ 19ငါသည် ရွှေမြို့တော်သာသနာတော်၏သော့များကို သင့်အား ပေး၍ မြေကြီးပေါ်၌ သင်တားမြစ်ထားသောအရာတို့သည် ရွှေမြို့တော်တွင်လည်း တားမြစ်ခြင်းကိုခံရမည်။ မြေကြီးပေါ်၌ သင်ခွင့်ပြုသောအရာတို့သည် ရွှေမြို့တော်တွင်လည်း ခွင့်ပြုခြင်းခံရမည်” ဟုမိန့်တော်မူ၏။ 20ထို့နောက် ကိုယ်တော်ယေရှုက မိမိသည် ခရစ်တော်ဖြစ်သည်ကို မည်သူ့ကိုမျှမပြောရန် မိန့်မှာတော်မူလေ၏။
အသက်ပြန်ရှင်ခြင်းအကြောင်းကို ကြိုတင်မိန့်ဆိုခြင်း
21ထိုအချိန်မှစ၍ ကိုယ်တော်ယေရှုက မိမိသည် ဂျေရုဆလင်မြို့သို့သွား၍ ဂျူးလူမျိုးခေါင်းဆောင်များ၊ ဂျူးပုရောဟိတ်အကြီးအကဲများနှင့် ကျမ်းတတ်ဆရာများ၏လက်၌ ဒုက္ခဝေဒနာများစွာခံစားရပြီး အသတ်ခံရမည့်အကြောင်းနှင့် သုံးရက်မြောက်သောနေ့၌ အသက်ပြန်ရှင်ရမည်ဖြစ်ကြောင်းကို တပည့်တော်တို့အား စတင်ရှင်းပြတော်မူ၏။
22ပေတရုက “ကိုယ်တော်၊ ဘုရားရှင်သည် ကိုယ်တော်အား ဤသို့ဖြစ်စေရန် မည်သည့်အခါမျှ ခွင့်ပြုမည်မဟုတ်။ ကိုယ်တော်၌ ဤကဲ့သို့ ဖြစ်လိမ့်မည်မဟုတ်” ဟုဆိုကာ ကိုယ်တော်ယေရှုအား ဘေးသို့ခေါ်၍ ဤအကြောင်းကို ထပ်မံ၍မပြောဆိုရန် ပြစ်တင်လေ၏။
23သို့သော် ကိုယ်တော်သည်လှည့်၍ ပေတရုအား “မာရ်နတ်၊ ငါ့ထံမှထွက်သွားလော့၊ သင်သည် ငါသွားမည့်လမ်းတွင် အတားအဆီးတစ်ခုဖြစ်နေ၏။ အကြောင်းမူကား သင်သည် ဘုရားရှင်သာသနာတော်နှင့် သက်ဆိုင်သည့်အရာများကို မစွဲလမ်းဘဲ လူသားများနှင့် သက်ဆိုင်သည့်အရာများကိုသာ စွဲလမ်းနေခြင်းကြောင့်ဖြစ်သည်” ဟုမိန့်တော်မူလေ၏။
မိမိ၏လက်ဝါးကပ်တိုင်ကိုထမ်းလော့
24ထို့နောက် ကိုယ်တော်ယေရှုသည် သူ၏တပည့်တော်တို့အား “မည်သူမဆို ငါ၏တပည့်တော်ဖြစ်လိုသူသည် မိမိ၏အတ္တကိုစွန့်ပြီး မိမိ၏လက်ဝါးကပ်တိုင်ကို ကိုယ်တိုင်ထမ်းပြီး ငါ့နောက်သို့ လိုက်ရမည်။ 25အကြောင်းမူကား မည်သူမဆို မိမိအသက်ကိုမိမိ ကယ်တင်လိုလျှင် ဆုံးရှုံးရမည်ဖြစ်ပြီး ငါ၏အတွက်နှင့် မိမိအသက်ကိုမိမိ အဆုံးရှုံးခံနိုင်သောသူသည် ကယ်တင်ခြင်းခံရမည်ဖြစ်၏။ 26လူသည် ကမ္ဘာမြေတစ်ခုလုံးကို ရရှိသော်လည်း မိမိ၏အသက်ကို ဆုံးရှုံးရလျှင် ထိုသူအတွက် မည်သည့်အကျိုးရှိမည်နည်း။ မိမိ၏အသက်ကို မည်သည့်အရာနှင့် လဲနိုင်မည်နည်း။ 27အကြောင်းမူကား လူ့သားတော်သည် နတ်ဒေဝါတို့နှင့်အတူ အဖဘုရားရှင်၏ဘုန်းအသရေတော်ကို ဆောင်ပြီး ကြွလာလိမ့်မည်။ ထို့နောက် သူသည် လူတိုင်းအား သူတို့၏ လုပ်ဆောင်ချက်များအတွက် အကျိုးအပြစ်များကို ပေးတော်မူလိမ့်မည်။
28သင်တို့အား ငါအမှန်ဆိုသည်ကား ဤနေရာ၌ ရပ်နေသူများထဲမှအချို့သည် လူ့သားတော်က ရှင်ဘုရင်အဖြစ် အုပ်စိုးရန် ကြွလာသည်ကို မမြင်ရသေးခင် သေဆုံးမည်မဟုတ်” ဟုမိန့်တော်မူ၏။
Одоогоор Сонгогдсон:
မဿဲ 16: TPV-RV
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.