Romapụ 3
3
Tamuno Sẹ́kụrọ
1Juuḅọ sọ ma anị tẹ́ asọ ḅụ ibiḅaa Juuḅọ sọgha ma nẹ́ngị? Anịgha anị tẹ́ sọọ nyẹ so ḅẹ́ tumḅọ tumḅọ tọ́ngọ̄ pẹ́lẹ́m? 2Asọ gonyẹ́ gonyẹ́ ḅụ anị opuma ḅárasuam, ḅẹ́ Tamuno parị ori ibi oku ma saghị Juuapụ ma ḅarabie suam.
3Ḅọ́rọ́ nna ḅụ jẹ́apụ minini nyanagha, nna minini nyánágha ma anị mịẹbẹ sị Tamuno mịnị sẹ́kụrọghaḅọ sọ? 4Ọkọfịnịnyẹ ofori! Tamuno anịị o dughonyẹ mịẹarịḅọ, tuminikiri gbọrụ iruonyẹ dughoapụ sọ. Tọ́ndiri ma dugho ḅara:
Ịrị ẹ́gẹ́rẹ́ sa gonyẹ́ gonyẹ́
kị́nị́mamgba árịbẹm ḅẹ́ ị karakáram,
nnị ị sịbị ḅẹ́rẹ́kọ sa gonyẹ́ gonyẹ́
ḅẹ́rẹ́ ị ḅara ibibẹm.
5Wa tẹ́ dugho bẹ? Ḅọ́rọ́ wámịna mịẹ irima Tamuno ma karakárá ibiamịẹnyẹ ma die pághámaḅoarị, wamịnị ine dugho bẹ ḅẹ́, Tamuno irimam o fomḅara pa wa fom sa? (A tumḅọ ḅara pa gbilaarị.) 6Ọkọfịnị nyẹ ofori! Ḅọ́rọ́ Tamuno karakáragha, ọ tọrọ́ pa ḅọ́rọ́ tuminikiri sịbị ḅẹ́rẹ́kọ bẹ?
7Jẹ́apụ ine dughobẹm ḅẹẹ, <<Ḅọ́rọ́ ị́yẹ́ irima nyẹ ma mịẹm Tamuno karakárá ma ḅo báapagha, anị ḅụ ḅọ́rọ́ dụḅaḅá kuu warị o nyẹ sọọ, n tegósi pa sị tumḅọ ḅara pa i sịbị ḅẹ́rẹ́kọarị?>> 8Anịsa, o tegósi dughogha ḅẹẹ, <<O ḅo wa siinyẹ mịẹsị ibinyẹ ḅo ḅẹ́ ḅara>>? Jẹ́apụ i ḅara ḅẹ́rẹ́simaarị sa ḅẹ́ a mịma dughom, Nnị n láa na ibi ḅẹrẹ kọbẹm nna sịbị.
Karakárá Ibiamịẹnyẹ Nyanaḅọ Ofori, Gbẹ́rẹ́ḅọ So Ofori
9Anịsa, wamịnị Juuapụ ma wámịna anganyẹ ibiḅaa Juughaapụ ma nganyẹ nẹ́ngị? Ọkọfịnịnyẹ ofori! A parị dieḅọ́rọ́mamam ḅẹ́ Juuapụ na Juughaapụ na nnị kị́nị́mamgba sịị kụrọ ma sughubie imi. 10Tọ́ndiri ma dugho ḅara:
<<Gbẹ́rẹ́ ibiamịẹnyẹḅọ sọ ofori,
11Akanyaḅo nyáná gbẹ́rẹ́ḅọ so ofori,
pịghị Tamuno ma dọghụarịḅọ so ofori.
12Kị́nị́mamgba ọḅụ pa Tamuno ma gbimam,
Nnị kị́nị́mamgba irimamam;
Karakárányẹ ma mịẹarị gbẹ́rẹ́ḅọ sọ ofori,
gbẹ́rẹ́ḅọ so ofori.>>
13<<Nna bịpịbie págháḅoarị ẹ́gẹ́rẹ́ kịnịḅaarị;
Nnị nna ḅẹ́lẹ̄ pa oḅori pa kị́nị́ sịm;>>
<<Sii ododó lakpo nna
bịpị mpara sughubie imii.>>
14<<Si gbonyẹ na tẹ́mẹ́ ákụ anịị
nna bịpịbie bii nyẹ.>>
15<<Nnị sáá ngúmágha ọmbịnyẹ́ ọsụụ ḅụ;
16nnị mú ngá mú ngá nnị túminị́
gulugulumam pịghị nnị pa tọ́rụ́siarịma,
17nnị pịghị bẹnyẹ bẹnyẹ mịẹbịgha
sị diin akuoo nna jẹ́apụ ogboku.>>
18<<Tamuno ḅáláfa sọ
nna ḅụbie ofori.>>
19Mị́sa wa nimim ḅẹ́ ólóghó diri ma bie nnị gịẹnyẹ gonyẹ́ gonyẹ́, n gịẹ pa nnị go ólóghó ma suaapụ pịrịm, túminị́ ḅara ọlọnyẹ nyánábịgha ḅara, sị tuminikiri gbọrụ Tamuno ḅẹ́rẹ́kọ ma sughubie fịnị bẹ ḅara. 20Tamuno toruku gbẹ́rẹ́ḅọ sọ karakáragha ólóghó ma koko ḅụ, ólóghó ma mịẹarịnyẹ anịị mịẹsị túminị́ nimi ḅẹ́ nnị siinyẹ mịẹmam.
Karakárá Ibiamịẹnyẹḅọ Sọọ
21Kụ́ma mị́sa Tamuno diepághámamam túminị́ ḅara warị karakárá ibiamịẹnyẹapụ sọ ḅẹ́ ḅara nnị anị diepághámamam. Anị ólóghó ma na mịẹnyẹ nyanagha, anịsọnị Mosis ólóghó ma na ikiakoroapụ ma onyẹsẹ́ anị pịrịm. 22Tamuno túminị́ mịẹm nnị karakárá ibiamịẹnyẹapụ sọ, nna minini Jizọs Krais ḅụ ḅọ́rọ́. Tamuno mịma mịẹ Jizọs Krais ḅụ mininiapụ gonyẹ́ gonyẹ́ pịrịm, tegó kịrịnyẹ sọ ofori, 23kị́nị́mamgba siinyẹ mịẹmam anịgosi Tamuno ipine nna ḅụ ḅọlọ angaá ḅụ imii. 24Tamuno ọ ḅụ na wa mịẹ karakárámamam Krais ḅụ ḅọ́rọ́ wámịna dụapághámaḅo, ọ papa die wa pịrịnyẹ. Túminị́ karakárá ibiamịẹnyẹapụ sọm Krais Jizọs ḅụ ḅọ́rọ́, nna duapághámaarịḅọ. 25Tamuno ọ saghị pịrịm, ḅẹ́ ori ọ sụụ ọmbịnyẹ́ ma ḅụ ḅọ́rọ́, na pịghị túminị́ ọ ḅụ nyáná minini ḅụ ḅọ́rọ́, n siiḅụḅarasi nyáná bẹ ḅara. Tamuno mịma mịẹm pa die ḅẹ́ ori karakárá ibiamịẹnyẹḅọ. Ḅọ́rọ́maa sa ori inema nyánam sị nna sii dighi tọ́rụ́si; kụ́ma mị́sa ma ḅụ mịnị nna sii dighi tọ́rụ́sigha sị ori karakárá ibiamịẹnyẹ ma diepágháma. 26Ọ mịma mịẹm pa ori ibi ḅẹ́rẹ́kọ die mịị sa ma ḅụ, ọ karakárá bẹ ḅara ori ma anị pịghị Jizọs ḅụ mininiapụ mịẹ karakárámaarịḅọ.
27Anịsa, wa tẹ́ pa bịpịkpọ bẹ? Bẹnyẹ ḅẹ́ nyẹ́gha! Wa tẹ́ go mịma mịẹarị? Anịị ḅẹ́ wamịnị ólóghó ma kokoarị? Ọkọ fịnịgha, kụ́ma wa mininim. 28Wa dughoarị bẹ tumḅọ karakárá ibiamịẹnyẹḅọ sọm minini ḅụ ḅọ́rọ́, ólóghó bịpị ma warịgha ḅụ. 29Tamuno ma ori Juuapụ ma ngéré Tamuno? Ori ma Juughaapụ ma sọ ori nna Tamunogha. 30Gbẹ́rẹ́ Tamuno ngéré anịị fịnịnyẹ, ọ mịẹm si Juuapụ ma karakárá ibiamịẹnyẹapụ sọ nna minini ḅụ ḅọ́rọ́ pịghị Juughaapụ ma pa karakárá ibiamịẹnyẹapụ so nna minini ḅụ ḅọ́rọ́. 31Mịma anị dugho ḅẹ́ mị minini ma gosi wa ólóghó ma gbibuuma? Ọkọfịnịnyẹ ofori; anịmanakaragha wamịnị ólóghó ma mịẹ kụ́rọ́máarị.
Одоогоор Сонгогдсон:
Romapụ 3: IBY
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©2024 Luke Initiative for Scripture Translation