Romapụ 12
12
Wa Duma Kọọ Bẹ Ḅara Sị Fịrịnwangị Tamuno Pịrị
1Anị ẹrẹ́sị, mịnaapụ, Tamuno ma nyáná wa pịrị opu lolomakúkúbie gosi, a ọ tẹ́ghẹ̄m ḅẹ́ ọmịnị ọmịna ḅụ pa duma igwagwaá Tamuno pịrị, n fófóoma ori fịrị pịrịnyẹ na pịghị ọ ḅẹlẹma nyẹ. Mịma anịị ọmịnị pa ọ pịrịbẹ tụ́ma susi. 2Mịnị tuminikiriapụ dua nnị nyẹ mịẹmịẹ ḅara pa nyẹ mịẹma, kụ́ma wárịso Tamuno biebẹ ọ dima, anịị káara ḅara pa ọmịna kúkúbie dima. Anịsa, o nimibẹm Tamuno ma tọ́nyẹ, ibi nyẹẹ, ọḅụ ḅẹ́lẹ́nyẹ pịghị kpain nyẹ.
3Tamuno ma ori tọ́rụ́kụrụkụ́rụ́ ḅụ ḅọ́rọ́ pa die i pịrịnyẹ gosi, a dugho ọmịnị kị́nị́mamgba pịrịarị ḅẹ́ gbẹ́rẹ́ḅọ sọ kóróma ma ḅẹ́ n ḅọ opuma duḅamam, n ḅọ ọkọ fịnịgha sa, anịmanakaragha ḅụsímínímá ị́yẹ́ kóróma ḅụ, pịghị ḅẹ́rẹ́kọ ịḅụ pịrị Tamuno ma pa ị pịrị minini láa ḅara ḅụ. 4Ọ́rụ́ḅọ ọ́rụ́ḅọ gbẹ́rẹ́ oju nyanam oju ma pịghị mụmbụ mụmbụ nyanam, mụmbụ mụmbụ ma pịghị nna kịrịkị́rị́ fịrị nyanam. 5Anị gbẹ́rẹ́ ḅara ma, karakárányẹ ḅẹẹ, wamịnị mánámánáapụ, kụ́ma wamịnị gbẹ́rẹ́ ḅụ ḅụ imii Krais bie, wa jụghọ jụghọ na ḅolom, gbẹ́rẹ́ oju ma mụmbụ mụmbụ ḅụ. 6Anịgo ọ́rụ́ḅọ ọ́rụ́ḅọ n ḅọ nyáná dienyẹ ma pa fịrịnwangị, Tamuno ma ori tọ́rụ́kụrụkụ́rụ́ ḅụ ḅọ́rọ́ pa n pịrịnyẹ. Tumḅọ dienyẹ ḅọ́rọ́ ikiakoro, ikiakoro ị́yẹ́ minini láa ḅara. 7Ḅọ́rọ́ pa fịrịnwangị, n ḅọ fịrịnwangịị, ḅọ́rọ́ pa nyẹ́die n ḅọ nyẹ́die; 8ḅọ́rọ́ kị́nị́ tẹ́mẹ́ kụrọma, n ḅọ ọkọ mịẹ. Nyẹ die jẹapụ pịrịarịḅọ gonyẹ́ gonyẹ́ ḅara findi ma pịrị, ḅọ́rọ́ sịbịdá anị ị́yẹ́ dienyẹ i Tẹ́mẹ́ mamgba pa anị mịẹ, ḅọ́rọ́ lolomakúkúbie bieḅẹlẹ pa anị mịẹ.
Ḅẹlẹma Gboloma Dienyẹ
9Karakárá ḅẹlẹma nyáná, siinyẹ ḅẹlẹmama, ibinyẹ ma ọlọ sẹ maá. 10Ọ mịnaapụ ḅara pa jụghọ jụghọ ḅẹlẹma, osigha pa jụghọ jụghọ pịrị ọ́ ḅụ nẹ́ngịma. 11Ịnyọ faá mịẹma, kụ́ma ịnyọ pa fịrịnwangịị. Ị tẹ́mẹ́ gbọrụ pa fịrịnwangị Kị́nị́nyánáḅọ ma pịrị. 12Ị́yẹ́ tọ́rụ́ dighinyẹ ịbieḅẹ́lẹ́ma, ingịrịma nyáná ị́yẹ́ ḅụḅáláḅálá mamgba ḅụ, tẹ́ghẹ̄ sámámgba ḅụ. 13Ị nyánányẹ pa nyẹ́ḅụ kụ́rọ mịnaapụ ma na die, pịghị ḅụ́pọ́ findi igoniapụ pịrị.
14Tamuno ḅara bii ḅẹ́ ori ị pa tọ́rụ́siarịmaarịapụ ma karịibima, bii ori nnị karịibima, sị ori nnị gbo ma. 15Bieḅẹlẹ́arịpụ dua bieḅẹlẹ, owuarịapụ dua owuú. 16Diin ḅụ kị́nị́mamgba na ngaa. Opuamịẹnyẹ mịẹma, kụ́ma mịẹkụ oforiapụ ma na nangwọ mịẹ. Nyẹ́nimiḅọ ḅara pa ịḅụ arịma.
17Ḅọ́rọ́ tumḅọ ị mịẹ irimam, irima nyẹ pa n ḅọ gbẹ́ẹ̄ ma. Arịị ḅẹẹ, ị karakárányẹ ma mịẹm kị́nị́mamgba toruku. 18Ị́yẹ́ ịnyọ láa ḅara mịẹsị kị́nị́mamgba na diin ḅụ fịnịị. 19Súghúbima, ị́yẹ́ nangwọapụ, kuma wárịso Tamuno ma igani anị mịẹ, n gịẹ kóróma ḅara tọ́ndiri ma bie, <<Súghúbi inyee, a nna gbẹfịnyẹ pa pịrịbẹm, anịị Kị́nị́nyánáḅọ dugho ḅara.>> 20Anịmanakaragha, Tọ́ndiri ma bie n gịẹ kóróma ḅara:
<<Ḅọ́rọ́ ḅuru ị́yẹ́ iruonaḅọ tarịarị,
fị́nyẹ pa ọ pịrị fịị;
Ḅọ́rọ́ ọ pụghọ sámụ́nọ́m,
nyẹ pa ọ pịrị ḅuu;
Ị mịma mịẹarị sa, ị dọghụarị anyị mgbọ́lụ pa ọ sịbị gbánāarị.>>
21Minima siiamịẹnyẹ ị sọ́ḅa, anịmanakaragha ibi pa siinyẹ gbẹ́ẹ̄.
Одоогоор Сонгогдсон:
Romapụ 12: IBY
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©2024 Luke Initiative for Scripture Translation