Romapụ 10
10
1Mịnaapụ, tẹ́mẹ́bie a bii nyẹ na a tẹ́ghẹ̄ Tamuno pịrịarị tẹ́ghẹ̄ Izirẹlịawọ gosi ánị ḅẹ́, nnị ine dụaḅọ́rọ́ma nyáná. 2A onyẹsẹ́ n pịrịm ḅẹ́ nnị ibima dọghụarị nnị Tamuno ma tẹ́ghẹ̄, kụ́ma nna ibima Tamuno tẹ́ghẹ̄ dọghụma anị tụ́ma níminyẹ ḅụ gbánāgha. 3Nnị Tamuno ḅara saghị ḅo karakárá ibiamịẹnyẹ ma nimigha sa warị asọ dọghụ nna nganyẹ pụ́úpágháma ḅo, anị ḅara ma nnị mịnị sịbị tughú Tamuno ma karakárá ibiamịẹnyẹ pịrịgha. 4Krais anịị ólóghó ma kunema sị minini ḅo gonyẹ́ gonyẹ́ karakárá ibiamịẹnyẹḅọ sọ.
5Mịma anị Mosis gịẹ kórómanyẹ ólóghó ma ḅụ saghị ḅo karakárá ibiamịẹnyẹ gbolomanyẹ: <<Ḅọ́rọ́ tumḅọ ólóghó ma dughonyẹ mịẹ, n ḅọ ólóghó ma ḅụ ḅọ́rọ́ dumabẹm.>> 6Kụ́ma Tọ́ndiri ma bie n gịẹ kórómanyẹ, minini ḅụ ḅọ́rọ́ ḅo karakárá ibiamịẹnyẹ ma gbolomanyẹ: <<Mịnị ị tẹ́mẹ́bie dugho ma ḅẹẹ, <Tụọ iwóo so mú ḅẹ́?> (Anịị mú Krais akuo ḅo.) 7Anịgha gbíla, <Tụọ koro duaama mú bẹ?> (Anịị Krais ma saghịma fịị ḅụ).>> 8Kụ́ma anị tẹ́ dugho: Tamuno oku ma i nana kikiam; ị bịpịbie na ị tẹ́mẹ́bie imi, anịị wa dugho pághámaarị minini ẹ́gẹ́rẹ́ ma. 9Ḅẹẹ ḅọ́rọ́ ị bịpị ḅụ dugho págháma ḅẹ́ Jizọs Krais anịị Kị́nị́nyánáḅọ ma pịghị minini ị tẹ́mẹ́bie ḅẹ́ Tamuno ọ saghịmam fịị ḅụ, ị dụaḅọ́rọ́ma nyánábẹm. 10Wámịna minini ḅụ ḅọ́rọ́ anịị wa ḅọ́rọ́ karakárá ibiamịẹnyẹapụ sọnyẹ Tamuno tórúku; wámịna bịpị ḅụ dugho pághámá nyẹ ḅụ ḅọ́rọ́ anịị wa dụaḅọ́rọ́ma nyánányẹ. 11Tọ́ndiri ma bie n gịẹ ḅara ḅẹẹ, <<Ọ ḅụ mininiḅọ gonyẹ́ gonyẹ́ ḅụgịrịrịbịgha.>> 12Ḅẹẹ kịrịnyẹ ofori Juuapụ na Juughaapụ bie Tamuno ori anịị kị́nị́mamgba Nyánáḅọ ọ pịghị ibiḅara pa ọ sịapụ mamgba boma bomam. 13Ḅẹẹ Kị́nị́nyánáḅọ ma ẹ́rẹ́ sịḅọ gonyẹ́ gonyẹ́ dụaḅọ́rọ́ma nyánábẹm.
14Nnị tọ́rọ́ pa na nnị ḅụ mininighaḅọ ma sị bẹ? Nnị pịghị tọrọ́ pa na nnị o gbolomanyẹ naaghaḅọ ma ḅụ minini bẹ? Nnị pịghị tọ́rọ́ pa náa bẹ ḅọ́rọ́ kị́nị́ oku ma dugho wásáma nnị pịrịgha? 15Nnị tọ́rọ́ pa oku ma dugho wásáma bẹ ḅọ́rọ́ nnị n fịrịmagha? Nnị gịẹ kóróma ḅara Tọ́ndiri ma bie, <<Anị opuma ḅụ́gbérépumam ḅẹ́ ibi oku ma akuoarịapụ ma ḅoarị.>>
16Izirẹlịawọ mamgbagha ibi oku ma daákịmáapụ. Aizaya kọkọ dugho ḅẹẹ, <<Kị́nị́nyánáḅọ, tụọ wámịna oku ma minini ma?>> 17Anịgo, minini ḅo ḅom oku ma náa ḅụ, oku ma ḅo ḅom Krais gboloma oku ma dugho wásáma ḅụ. 18Kuma a gbilam: Anị tụ́manyẹ ḅẹ́ nnị oku ma naagha? Karakárányẹ dugho ḅụ n nam: Nnị gịẹ kóróma ḅara Tọ́ndiri ma bie ḅẹ:
<<Nna ẹ́gẹ́rẹ́ pụghọ ma
tuminikiri gbọrụ mamgba lam;
Nna ẹ́gẹ́rẹ́ tuminikiri
kunema ngaa ma lam.>>
19A sima gbilaarị, Izirẹlịawọ ma nnị akanyaḅogha? Mosis anị parị pagharaa ḅọ:
<<A nyẹ ḅụ ófórigha sẹ pa
ọ mịẹbẹm sị ọ nyẹ́mọ́ni;
A akanyaḅo nyanagha sẹ pa ọ mịẹbẹm ọ bieoḅu.>>
20Aizaya ḅáláfaghaa ḅara pa dughom o dugho sa,
I dọghụghaapụ anịị
i dọghụ pághámaḅoapụ;
I gbilaghaapụ anịị
a ḅụ pa dieapụ.
21Kụ́ma Izirẹlị gbolomanyẹ o dughom ḅẹẹ,
<<Éné gbọrụ a i ḅara sụghụma
bịpị pughugha na
sịbị kụrọapụ pịrịm.>>
Одоогоор Сонгогдсон:
Romapụ 10: IBY
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©2024 Luke Initiative for Scripture Translation