Romapụ 1
1
Pọl Rom Ḅụ Fịnị Mininiapụ Ma Biifamam
1Mịị diri ma irị Pọl Jizọs Krais ómóniḅọ ḅara saghịḅom, ịrị anịị Tamuno sịị́ pịghị sẹlẹakị nfịrịmaḅọ ḅẹẹ, a ori ibi oku ma dugho wásáma. 2Tamuno ori ikiakoroapụ ḅụ ḅọ́rọ́ mị ibi oku ma mini ori a túminị́ pịrịm ḅọlọmaa sáá énéné, n gịẹ kóróma ḅara Tọ́ndiri ma bie. 3Mịị oku ma Tamuno Tụ́wọ ma gbolomam, wámịna Nyánáḅọ Jizọs Krais. Ojumẹnị ḅụ ori ma anịị Deviti furotụ́wọ. 4Ori ḅo ḅara gbolomanyẹ Tamuno ma ḅara, na pịghị ori tọ́ntọ́, Tamuno opu kụrọ ḅụ diem bẹ ori anị Tamuno ma Tụ́wọ ma ori fịị ḅụ ọ saghịma sáá, Jizọs Krais wámịna Nyánáḅọ. 5Tamuno Krais ḅụ ḅọ́rọ́ tọ́rụ́kụrụkụ́rụ́ nyáná wa pịrịm sị wa sị ḅẹ́ wamịnị ḅo nfịrịmaapụ sọọ Krais ma ẹrẹ́sị, sị sẹ gonyẹ́ gonyẹ́ ḅụ wa túminị́ daá bẹ ḅara ḅẹ́ nnị ọḅụụ minini pịghị ọ bịpị pughu. 6Ọmịnị Rom ḅụ fịnịapụ ma nna ḅụ gbẹ́rẹ́apụ, Tamuno sịmáapụ ḅẹ́ nnị ḅo Jizọs Krais túminị́ sọọ.
7Anịgo a mịị diri ma gịẹ pa ọmịnị Rom ḅụ fịnịapụ mamgba fịrịmam Tamuno ma ḅẹlẹmaapụ pịghị sịmáapụ bẹ nnị ḅo ori a túminị́ sọọ.
Tamuno wámịna Daḅọ na Kị́nị́nyánáḅọ Jizọs Krais tọ́rụ́kụrụkụ́rụ́ na diin pa ọ pịrị.
Pọl Ịmịẹḅam Pa Tamuno Ḅẹm
8Parị a ịmịẹḅam pa ị Tamuno ma ḅẹm, Jizọs Krais ma ẹrẹ ḅụ ọmịnị kị́nị́mamgba sịbị go, tegó tuminikiri gbọrụ ọmịna minini gbolomanyẹ naarị. 9Tamuno, a itẹ́mẹ́ gbọrụ pa susi pịrịarịḅọ, anịị ọ Tụwọ ma gboloma ibi oku ma dugho wásáma ḅụ, ori ma anịị ị́yẹ́ onyésẹ̄ḅọ a sámámgba ọ pa biekórómáarị ḅara 10a tẹ́ghẹ̄ sa gonyẹ́ gonyẹ́. A Tamuno ma tẹ́ghẹ̄arị mị́sa ḅẹ́ ọ tọ ḅara ḅụ, kunema a ine ḅo tọ́rụ pa ọmịnị arịịbẹm.
11Ọmịnị arịị ma opuma i pụghọ tárịm, sị a ine Tamuno Tẹ́mẹ́ ma ḅara sághị ḅo karịibima die ọ pịrị, mịẹbẹnyẹ sị ọ kurosẹ tẹ́mẹ́ju ọ kụrọma bẹnyẹ. 12A dughoarị nyẹ anịị, wa dona sa, ọmịna minini mịẹbẹm sị a kurosẹ, ị́yẹ́ minini pịghị mịẹbẹm sị ọ kụrọ sẹ. 13A dọ́ghụm ḅẹ́ sị o nimi ị́yẹ́ amịnáapụ, ḅẹẹ, tọgha sa a tọmam ḅẹ́ a ḅo ọmịnị arịị, kụ́ma nyẹ sámamgba ị́kíkímam. A dọ́ghụm ḅẹ́ ọmịna ogbobie a mininiapụ nyáná ḅo bẹ ḅara, a nyáná ḅara jẹ́ Juughaapụ ma ogbobie.
14A Kị́nị́nyánáḅọ ibi oku dugho wásáma sáá ọlọm kị́nị́mamgba ḅara, tọ́rụ́ findimaapụ ḅara na pịghị tọ́rụ́ findighaapụ ḅara, dirinimiapụ na pịghị diri nímighaapụ. 15Anịgo anị kpọma i tárịm ḅẹ́ a ibi oku ma dugho wásáma ọmịnị Rom ḅụ fịnịapụ ma sọ pịrị. 16Krais ibi oku ma i ḅụgịrịrịmagha, tegó anịma anịị Tamuno kụ́rọ ma, mininiapụ gonyẹ́ gonyẹ́ duaḅọ́rọ́maarị nyẹ, parị Juuapụ ma na pịghị Juughaapụ. 17Tegó ibi oku ma die pághámaarị Tamuno túminị́ akuo karakárá ibiamịẹnyẹ ḅụ su ori na nnị na, mịma anịị minini ḅụ ḅọ́rọ́ parị ákị mú kunema láa, tọ́ndiri ma dugho ḅara, <<Karakárá ibiamịẹnyẹḅọ ma dumabẹm ori minini ḅụ ḅọ́rọ́.>>
Tamuno Bieoḅu Túminị́ Ḅụ
18Tamuno sobie bieoḅu túminị́ pịrịarị n mịẹrị sii gosi, n pịghị kuu pa ọ pịrịgha ḅara n pịghị nna sii pa Tamuno ma karakárá gbẹarị ḅara. 19Tamuno n dighi bieoḅum tegó Tamuno gboloma sị tumḅọ ine nimibẹnyẹ, anị ibima n tọ́rụ́ pághám, tegó Tamuno ma mịẹm sị anị n tọ́rụ́ pághá. 20Tamuno tuminikiri ma tẹ́mẹ́ sa éné éné, o gboloma sị túminị́ ine tọ́rụ́ pa arịbịgha nyẹ, mị́sa ḅo pághámam túminị́ tọ́rụ́ ḅụ, mịnanyẹ ma anịị Tamuno ma gbámásó kụ́rọ na pịghị ori fịnị ḅara. Anịgosi n ḅara pụ́nụ́nyẹ nyánágha n mịẹnyẹ ḅụ.
21Nnị Tamuno ma nimim kụ́ma nnị ọ láa kuu pa ọ pịrịgha anịgha Tamuno ma ḅẹẹ ịmịẹḅam. Anịmanakaragha, nnị nyẹ kórómaarị sa nna kóróma mịnị ḅẹnyẹ ḅẹnyẹ ḅụ ofori, kánákáná warị nna oḅori kúkúbie ma bii. 22Nnị dughoarị ḅẹẹ nnị nyẹ nimim kụ́ma nnị ọḅọrisọmaapụ 23nnị susi fịịfịịgha Tamuno ma pịrịbẹ nakaragha, nnị susi fịị bẹ túminị́ kịka sị nnị kárányẹ pịrịm anịgha a fíní kịkanyẹ anịgha nama kịkanyẹ anịgha furo pa ikiri nwángịarị nyẹ.
24Anịgosi Tamuno warị nna ḅụ ḅárási, sị nnị nna tẹ́mẹ́bie biiarị ịlọ́lị nyẹ ma mịẹ, sị nnị jụghọ jụghọ na oju ma dighi terema yáakuu ḅụ ofori nwángị kọọ. 25Nnị Tamuno gboloma karakárányẹ ma mini dọghụgha nnị mú epele miniakịm, nnị susi nnị tẹ́mẹ́nyẹ ma pịrịm pịghị anị osii Tẹ́mẹ́ḅọ ma nakaragha, n túminí mú gbámásó la bẹḅọ. Anị ọkọ fịnị.
26Túminị́ mịma mịẹm gosi Tamuno nna ḅụ ḅárásim sị nnị nna oju ma tarịarị ḅụ́gịrịrịmanyẹ pịrịm. Ẹ́rẹ́ámáapụ ma sọ nna jẹa ẹ́rẹ́ámáapụ na múnoarị. 27Anị gbẹ́rẹ́ ḅara ma owiapụ ẹ́rẹ́ámáapụ mangima mú nna jẹa owiapụ na múnoarị. Owiapụ jụghọ jụghọ na ḅụ́gịrịrịma nyẹ mịẹarị, anị ḅụ ḅọ́rọ́ nlá na ibi fomḅara akuo nna ḅụ pịrị nna irima mịẹnyẹ gosi.
28Mịná túminị́ ma Tamuno gboloma sị tumḅọ ine nimibẹnyẹ, nnị anị sịghịm gosi nna kóróma ḅụ, Tamuno nna ḅụ ḅárási mịnị tụghụgha kóróma pịrịmam, na nnị mịẹna ibighaa nyẹ ma mịẹ. 29Tọ́rụ́kịrịkị́rị́ nyẹ pa kịnịlama, siiamịẹnyẹ, oputọrụ, kịnịtárigha, jughonyẹ mọnị, anịị nna duma bie bii nyẹ, kị́nị́ḅáa, owu soo, oḅori pa kị́nị́ sị, na jẹ́apụ sii dọghụ. Nnị jụghọ jụghọ pa bịpị ḅẹ́lẹ́maarị, 30jụghọ jụghọ dughosima, Tamuno lila, jụghọ jụghọ wiri, opuamịẹnyẹ, bịpịkpọ, sámámgba n kórómaarị nnị ḅọ́rọ́ siiamịẹnyẹ mịẹ ḅẹ́ jẹ́ jẹ́ asọ, nyingi na daa na osigha, 31nnị sịbịbie nyánágha, nnị n dughonyẹ mịẹgha, nna kúkúbie nna ọḅụdụ, nnị lolomakúkúbie nyanagha. 32Nnị nimim Tamuno ologho ma dughonyẹ ḅẹẹ, nwọfịnị duma kọọapụ fịị anịị nnị na gbẹ́ẹ̄ nyẹ, anị so n pa anịma nẹ́ngịma siiamịẹnyẹ mịẹarị, pịghị anị siiamịẹnyẹ ma miẹrịapụ túminíarị.
Одоогоор Сонгогдсон:
Romapụ 1: IBY
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©2024 Luke Initiative for Scripture Translation