Fịrị Ḅara 20
20
Pọl Masidoniya Na Girisii Múm
1Silé ma yaghúu fama sáá, Pọl mininiapụ ma sị kobirim, sị biekụ́rọ́ma ẹ́gẹ́rẹ́kọọ n pịrị ḅẹ́, ọmịnị ibima fịnịị ọ warị nnị wáriso sị soo Masidoniya muu. 2Ori anị párángáa ḅụ ḅọ́rọ́m warị tọgha biekụ́rọ́ma ẹ́gẹ́rẹ́kọọ túminị́ ma tẹ́mẹ́ kụ́rọ́maá. Ọ warị anịsáa ḅọ́rọ́ ḅo Akaya láa, 3ọ tẹ́rẹ́ akalụ́ fịnịngaa. Ọ tẹ́lẹ́maarị ọ ḅara warị Siriya muu bẹ ḅara, o ḅo nimiḅo sáá ḅẹ́ Juuapụ imi diatughu ọ pịrịmáapụ ọ warị Masidoniya ḅụ ḅọ́rọ́ pịghịma sọọ. 4Sopata, Piirus tụwọ, Beriya ḅụ saghị ḅoḅọ ọ nana múm, anịị pịghị Tẹ́salonaika ḅụ saghị ḅoapụ Aristakọs na Sekondọs, Gayọs Derbe ḅụ saghị ḅoḅọ, Tisikọs na Trofimọs Esiya ḅẹrẹtọ angaá ḅụ sághị ḅoapụ, na pịghị Timoti nnị na muu ḅara. 5Nnị tárị múm wámịna ḅụ sị mú Troas ḅụ wa kúru. 6Wa Filipai ḅụ árụ́ sim, n Yisti bie Ofori Fịturu Álálị ma fị so sáá, sọ́nọ́ a dii ḅo ḅọ́rọ́ sáá, wa ḅo nnị na donam Troas ḅụ, warị anị angaá sọ́nọ́ma dii fịnịị.
Pọl Utikọs Saghịmam Fịị Ḅụ Troas Ḅụ
7Ịnyọ́sárá Éné ma ḅupiri, wa kobirim mịẹgbólóma fị́nyẹ ma gosi, Pọl ẹ́gẹ́rẹ́ kọọ túminị́ ma pịrịm, warị pịghị ẹ́gẹ́rẹ́ ma kọọ warịị dii ogbo láa, tegó ori anị ama ma warịsoarị anị ḅụ éné ḅáa. 8Tọgha tọndọ kọrịarị ọgọnọ wárị ma ḅụ, wa kobiri fịnịbie ma bie. 9Gbẹ́rẹ́ ásátụ́wọ Utikọs pa sịḅọ wándere ma ḅụ kpọrọfịnịarị, Pọl pa ẹ́gẹ́rẹ́arị sa Utikọs warị sághị singi, múno warị anị ḅụ ḅọ́rọ́ o dighiákị, ọ warị tẹ́rẹ́ kárámá ọ́gọ́nọ ma ḅụ sághị sóghóró kóró kiri. Nnị oku saghị sáá, ọ fịịmam. 10Kụ́ma Pọl kóró mú ọ ḅụ pa ọ ḅụ gbim sị o ḅolo, ọ warị n ḅẹẹ, <<Ọ báláma, duma pa ó ḅụ imii!>> 11Ọ warị tándị ọgọnọ mú, sị fịtúrú puu fịị. Ọ sa fama wamịnị na ẹ́gẹ́rẹ́ fama sáá, akị muu ịrụa saghị saghị sa láa, Pọl anị ngaa ma warịsom. 12Nnị warị owitụ́wọ ma dighi so duma ḅụ na opuma bie diin ḅụ.
Troas Ákị Mú Milẹtọs Láa
13Wamịnị, wa sịbị pa árụ́ ma fịnịngaa dam, warị anị ngaa sua págháma Asọs muu, wa muu Pọl sẹ akị angaá. O dugho wa pịrịm ḅẹ́ wa ọkọ mịẹ tegó ori ḅụọ pa ḅọ́rọ́ anị ngaa ma múumam. 14Ọ wamịnị na dona sáá Asọs ḅụ, wamịnị ọ sẹakim sị ọ nana mú Mitilene láa. 15Wamịnị anị ngaa suapagham sị anị ḅụ énéḅa mú Sios na dama dama angaá sọmaa. Anị duama éné anịị wa ḅo Samọs láanyẹ, anị ḅụ jẹ́ éné ḅa, wa ḅo Milẹtọs láa. 16Pọl ọ tẹ́mẹ́bie tọ ḅọ́rọ́mamam ḅẹ́ nnị Ẹ́fịsọs agbabịgha, ọ sa ngumabịgha ḅara Esiya ḅẹrẹtọ yọ, tegó ori álálaarị o Jerusalem láa bẹ ḅara, ọ ḅọ́rọ́ inéné ori anị ngaa láa, Sịmgbọlụ Sughu Álálị ma éné ma na kiriakịgha sáá.
Pọl Ẹ́fịsọs Sẹ́nịapụ Ḅẹm Nnị Ibima Fịnịị
17Milẹtọs ḅụ Pọl oku fịrịma Ẹ́fịsọs múm ḅẹẹ sọsị sẹ́nịapụ ma ḅo ọ nana dona. 18Nnị ḅo láa sáá, ori n ḅẹm ḅẹẹ, <<O nimim a ị sáá fámá ḅara a ọ nana fịnị sáá ma ḅụ, a tarị ḅo láa éné Esiya ḅẹrẹtọ angaá ma ḅụ. 19Ḅụ sitéréma mamgba na pịghị tọ́rụ́ owu mingi anị a pa fịrịnwangị Kị́nị́nyánáḅọ pịrịarịnyẹ, a árịarị kụ́rọ daádighi bie, anị iyẹ Juuapụ biaḅọ́rọ́mamaá nyẹ nnị pa iyẹ mbasị bẹnyẹ. 20O nimim ḅẹ́ a gbẹ́rẹ́nyẹ sọ pa ọḅọghumagha a níminyẹ ḅẹ́ anị sọnyẹ ḅụ sọọ ọ pịrịbẹm, a Tamuno ẹ́gẹ́rẹ́ dugho wásámaarị ḅara pịghị anị diearị ḅara túminị́ mamgba tórúku na pịghị ọmịna wárị wárị ḅụ. 21Juuapụ akị mú Juughaapụ láa a ibima nna biri nụ́nụ́m ḅẹẹ nnị nna sii ḅụ pịghị sị Tamuno dua, sị minini nyánáa Wányánáḅọ Jizọs Krais ḅụ.
22<<Kụ́ma mị́sa, Tọ́ntọ́ Tẹ́mẹ́ ma osii ḅụ, a so Jerusalem muarị, a nimigha anị ngaa ịḅụ pághá bẹnyẹ. 23Tụ́ma a láa opu ama gonyẹ́ gonyẹ́ ḅụ Tọ́ntọ́ Tẹ́mẹ́ ma i biri nụ́nụ́arị ḅẹ́ ịkóli na ḅụḅáláḅálá na i kúruarị. 24Iyẹ duma iḅụ sọ́nyẹ sọ́gha, a binyẹ a pa ine iyẹ fịrị ma nwángị sịbị láama, si pịghị ine Wányánáḅọ Jizọs Krais pa i fịrịma fịrị ma nwángị fama, fịrịị ma anịị Tamuno tọ́rụ́kụrụkụ́rụ́ ibi oku ma dugho wásáma.
25<<Ọmịnị kị́nị́mamgba a bie ikelekelé Tamuno amadakiri oku ma dugho wásáma pịrịmáapụ mịnị jẹ́ pa i tórúku arịbịghaa. 26Anịgo mị́sa a dughofindi ọ pịrịarị ḅẹ́, faá bẹ ḅo gonyẹ́ gonyẹ́ ọmịna bie n ḅo ọmbịnyẹ́ i sịbị sẹbịgha. 27Tegó a pa ọ ḅọghuma nyẹ ofori Tamuno dọghụnyẹ mangba sị o nimii. 28Ọ tọ́rụ́ pa kiri lama ọmịna ḅụ pịrị, na pịghị Tọ́ntọ́ Tẹ́mẹ́ ma saghị ọ ḅarabie sua ánáná awọ ma pịrị. Ọmịnị ánánákúrúapụ dighi Tamuno sọsị ma pịrị, ori ọ tụwọ ọmbịnyẹ́ pa fẹ nyẹ. 29A nimim ḅẹ́ iyẹ ọḅụgbi anịị piri obiri ọmịnị ogbobie sọ bẹnyẹ, nnị pịghị ánáná áwọ ma warịsobịgha. 30Sáá ḅobẹm, jẹa túminị́ ọmịna ogbobie saghị epele tiibẹm sị mininiapụ tọ́rụ́ daa n ḅụ pịrịị. 31Anịgo ọ tọ́rụ́ kiri láa, sị biekóróma ḅẹ́ tẹ́rẹ́ a kụ́rá gbọrụ, a dii na ḅá na, a owutọ́rụ́ pa nyẹ pa o diem.
32<<Anịgo, mị́sa, a ọ saghị Tamuno ḅara suam na pịghị ori tọ́rụ́kụrụkụ́rụ́ oku, ine ọ sẹ́nịma bẹnyẹ pịghị Tamuno nyáná ori a túminị́ pịrị karịibima pa ọ pịrị. 33Na a jụghọ pị́naḅala anịgha jụghọ odoḅala anịgha jụghọ suabịtẹ mọnịghaa. 34Ọmịnị kọkọ ibima nimii ḅẹ́ a mị ḅara ma pa fịrịnwangịmam sị pa a binyẹ gonyẹ́ gonyẹ́ na i duaapụ binyẹ gonyẹ́ gonyẹ́ pịrịm. 35Nyẹ gonyẹ́ gonyẹ́ ḅụ a pa o diemam, o ḅara warị ịnyọ pa fịrịwangi sị ḅárásua ịnyọ ḅụ oforighaapụ ma pịrị, wámịna Nyánáḅọ Jizọs ẹ́gẹ́rẹ́ pa biekórómáarị, o dugho ḅara ḅẹ́, <Anị opuma Karịiḅi nyánam nyẹ pa kị́nị́ pịrị, tụ́ma kị́nị́ ḅara nyẹ nyánáḅọ.> >>
36Pọl mị ẹ́gẹ́rẹ́ ma kọọ faá ma sa, ọ warị ẹkpẹrẹkị si tẹ́ghẹ̄. 37Nnị kị́nị́mamgba owuarị nnị o ḅolo sáá warị pịghị bịpị pa o lughu nọnju, sị ibima fịnị pa ọ ḅẹẹ. 38Nna tẹ́mẹ́ opuma siim, o dughom gosi ḅẹẹ nnị mịnị jẹ́ pa ori arịbịghaa. Nnị warị ọ ḅọ́rọ́ma árụ́ ma muu.
Одоогоор Сонгогдсон:
Fịrị Ḅara 20: IBY
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©2024 Luke Initiative for Scripture Translation
