Fịrị Ḅara 10
10
Kọnịlọsị Fịrịma Pita Sịịm
1Gbẹ́rẹ́ owitụ́wọ imi Sizariya ḅụ, Kọnịlọsị pa sịḅọ sịbịdá Rom sọ́nọ́ a sị ọ́mụ́gbiapụ pịrịḅọ. Ịtalị ḅụ sághị ḅo ọ́mụ́gbi ogboapụ anịị nna ẹrẹ. 2Ọ Tamuno nimim pịghị o dighi ḅáláfaa, ọ wárị gbọrụ sọ susi Tamuno pịrịm ọ pịghị opuma ḅárásua nyána Juu igonyiapụ ma pịrịm, ọ pịghị sámámgba tẹ́ghẹ̄ Tamuno pịrịarị. 3Tẹ́rẹ́ énékịẹnyẹ biri énéḅaa, ọ múnogha dáwọkọm sị gbẹ́rẹ́ Tamuno sookumuḅọ arịm, sọ ḅo sị, ori ẹ́rẹ́ pa ọ sịị ḅọ, <<Kọnịlọsị!>>
4Ọ warị ḅáláfa ḅụ tọ́rụ sághị o dighi, warị o gbíla, <<Ọ tẹ́ nyẹ mọ, Kị́nị́nyánáḅọ?>>
Sookumuḅọ ma warị ọ págháraa ḅẹ́, <<Ị́yẹ́ tẹ́ghẹ̄ na ị́yẹ́ ibifịrị Tamuno tórúku lámam, pa biekórómáarị agba ḅara. 5Mị́sa túminị́ fịrịma Jọpa muu sị nnị mú Saimọn n pịghị Pita pa sị gbẹ́rẹ́ owitụ́wọ sịị ị pịrị. 6Ori mị kiri igoniḅọ, nama apara pa fịrịnwangịarịḅọ ma wárị, Saimọn anị ori ẹrẹ, posie aka anịị ori ngaa nyẹ.>>
7Ori na ẹ́gẹ́rẹ́ sookumuḅọ ma soo sa, Kọnịlọsị warị ori mmẹẹ́ a fịrịnaapụ sịị na gbẹ́rẹ́ ọ́mụ́gbiḅọ Tamuno dighi ḅáláfaḅọ, pịghị dada fịrịnwangị ọ pịrịarịapụ ḅụ gbẹ́rẹ́ḅọ. 8O dugho n pịrịm pághányẹ warị nnị fịrịma Jọpa muu.
9Éné ḅá sáá, nnị ḅo Jọpa na kikia sa, Pita, wárị osu ma tándịm éné ogbo biri sị, o tẹ́ghẹ̄ bẹ ḅara. 10Fị́nyẹ ḅo ọ tarịm sị ori ọ fị bẹnyẹ dọ́ghụm, nnị fị́nyẹ ma mịẹarị sa, o múnogha dáwọkọm. 11Warị findi so, arịị, nnị gbẹ́rẹ́ dụḅa bịtẹ pa kórómaarị tuminikiri, so ḅọ́rọ́ anị ínia ọkọlọbị ḅụ árị diri pa anị kpọm. 12Anị bie tọ́rụ́kịrịkị́rị́ ínia ḅụọ nyáná nama, tuminikiri furo pa ikiriarị nyẹ, na pịghị fíní na. 13Gbẹ́rẹ́ pụghọ warị ọ ḅẹẹ, <<Pita saghị sị ḅa pẹẹ́.>>
14Kụ́ma Pita ḅẹm, <<Inyanaḅọ ọkọfịnị nyẹ ofori, ḅẹẹ jẹ́ éné jẹ́ éné na a tọ́ntọ́ ḅụ fịnịgha nyẹẹ anịgha fíafía ḅụ fịnịgha nyẹ fịgha.>>
15Pụghọ ma pịghị sima dugho ọ pịrịm, <<Mịnị ịlọ́lị nyẹ pa Tamuno ḅẹẹ nyẹ ḅẹẹ anị fiafiam sịị ma.>> 16Mịnanyẹ ma tẹ́rẹ́ sa pa kiriakịm, nnị warị anị gbẹ́rẹ́kiri bịtẹ ma nụ́nụ́ so muu.
17Pita pa sịbịbie Kịẹ ori arị nyẹ pịrịarị sáá ḅẹẹ anị tẹ́ dughoarị, Kọnịlọsị fịrịmaapụ ma gbíla pághámaḅomam Saimọn wárị fịnị angaá, sị mị́sa sẹ́fịnịarị opu ḅụ́pọ́ ma tórúku. 18Nnị warị kị́nị́ sị gbíla ḅẹẹ, <<Saimọn n pịghị Pita pa sịḅọ mịngáá imii?>>
19Pita pa asọ dọghụarị ori múnogha dáwọ ḅụ árịnyẹ ma akanyaḅo Tẹ́mẹ́ ma warị ọ ḅẹẹ, <<Tẹ́rẹ́ owiapụ mịnga imi, ị dọghụarịapụ. 20Anịgo, ịḅụ tẹ́lẹ́ma sị nnị na muu, sáá ngúmá ma, irị nnị fịrịmam.>>
21Pita warị mú owiapụ ma na dona, warị n ḅẹẹ, <<Irị anị́ị́ ọ dọghụarị ḅọ ma. Ọ tẹ́ go ḅo?>>
22Nnị warị págháraa ḅẹẹ, <<Sọ́nọ́ a si ọ́mụ́gbi sịbịdáḅọ Kọnịlọsị wa fịrịmam ori anịị karakárá ibiamịẹnyẹḅọ pịghị Tamuno dighi ḅáláfaarịḅọ, Juuapụ mamgba pịghị opuma osigha pa ọ pịrịm. Gbẹ́rẹ́ sookumuḅọ ọ ḅẹm ḅẹẹ, ori ị́ sịị ọ wárị ḅoo, sị ori ị dugho ḅẹnyẹ náa bẹ ḅara.>> 23Pita warị túminị́ ma ḅẹẹ nnị sọḅo, sị anị ngaa múno énéḅama.
Pita Kọnịlọsị Warị
Éné ḅá sáá anị́ị́ ọ tẹ́lẹ́ma nyẹ sị nnị na muu, Jọpa ḅụ fịnị jẹ́ mininiapụ sọ nnị na múm. 24Anị ḅụ éné ḅáa anị́ị́ o ḅo Sizariya láanyẹ sị muu Kọnịlọsị árị ori o kuruarị ngaa, ori na ọ sị kobiri mịna na págháa na. 25Pita wárị ma sọ sa, anịị Kọnịlọsị ọ nana dona sị sóghóro koro nyẹ ọ ḅụọ osigha ḅụ. 26Kụ́ma Pita ọ saghịmam, <<Saghị sẹ.>> Pita ọ ḅẹm, <<Irị papa tumḅọ.>>
27Pita pa Kọnịlọsị na ẹ́gẹ́rẹ́arị sáá, ọ wárị ma sọ́mum sị mú tọgha túminị́ árị n kobiri ngaa. 28Ọ warị dugho n pịrị, <<Ọmịnị sọ kọkọ ibima nimi ḅẹ́ anị ólóghó ḅụ imi ḅẹ́ Juu na Juughapụ ḅo mịẹ gbolomanyẹ nyána ma. Kụ́ma Tamuno pa i diemam ḅẹ́ a gbẹ́rẹ́ḅọ sọ árị ma ḅẹẹ n ḅọ ịlọlịm anịgha n ḅọ pilem. 29Anịgo ị fịrịma ị sịị sa, a nyẹ gbilagha pa álála ḅom. A mị́sa i gbilaarị, ị tẹ́ go fịrị ma i sịị?>>
30Kọnịlọsị warị ḅẹẹ, <<Mị́sa biri ḅọ́rọ́maa tẹ́rẹ́ a dii, a tẹ́ghẹ́arị i wárịbie, tẹ́rẹ́ énékịẹnyẹ ḅụ éné ḅáa, anị gbẹ́rẹ́kiri gbẹ́rẹ́ pị́napị́na bịtẹ sua owitụ́wọ warị ḅo itọrụku sẹ 31sị ḅẹẹ, <Kọnịlọsị, Tamuno ị́yẹ́ tẹ́ghẹ̄ naamam ị pịghị ḅara sụghụma igonyiapụ pịrịarị ḅara ma sọ ọ tórúku láamam. 32Kị́nị́ fịrịma Jọpa muu sị nnị muu gbẹ́rẹ́ owitụ́wọ Saimọn n pịghị Pita pa sịḅọ sị ị pịrị, ḅẹẹ ori mị́sa igoniḅọ Saimọn nama apara pa fịrị nwangịarịḅọ wárị, posie aka anịị ori ngaa nyẹ.> 33Anịgo, anị gbẹ́rẹ́kiri a fịrịma ị sịịm, ị pịghị ibiḅara mịẹm i ḅoo ḅara ma. Mị́sa wamịnị kị́nị́mamgba mịnga imii Tamuno tórúku, kúruarị wa náa bẹ ḅara Tamuno ị fịrịma sị ị dugho wa pịrịbẹnyẹ.>>
34Pita warị saghị ẹ́gẹ́rẹ́, ḅẹẹ, <<Mị́sa arịm bẹ Tamuno tọ́rụ́ dighi nyẹ mịẹmịẹḅọgha 35ḅẹẹ o dighi ḅáláfaapụ sị pịghị karakárányẹ mịẹ mịnaapụ ma anịị ọ daakịarịapụ, ọ balagha nnị saghị ḅo angaá. 36O nimim ọ pa Izirẹlịawọ fịrịma oku, diin ibi oku ma dugho wásámaarị, Jizọs Krais kị́nị́mamgba Nyánáḅọ ḅụ ḅọ́rọ́. 37O nimim Judiya ḅẹrẹtọ yọ gbọrụ ḅụ págháanyẹ, Galili ḅụ saghị, Jọn ori mingi sara oku ma dugho wásáma sáá. 38Ọ kọkọ Jizọs, Nazarẹtị ḅụ saghị ḅoḅọ nimi, Tamuno ori Tọ́ntọ́ Tẹ́mẹ́ na kụrọ pa ọ ḅụ sua ḅara, ọ pịghị ngaamamgba muu ḅara sị ibinyẹ mịẹarị ḅara, si pịghị ẹ́kpẹ́dua kụrọ bie fịnịapụ mamgba gwọarị ḅara tegó Tamuno ọ nana imim gosi.
39<<Wamịnị sọ onyẹsẹ́ o nwángị fịrị mamgba pịrịm Juuapụ sẹ bie na Jerusalem ḅụ, n warị ḅo ọ ḅá, nnị ọ ḅaupálị sa mgbẹsẹ sị́ ọ́gọ́nọ ḅụ, 40kụ́ma tẹ́rẹ́ dii ḅọ́rọ́ sa, Tamuno fịị ḅụ ọ saghịmam, sị mịẹ ori ọ ḅụ pa wa die. 41Kị́nị́mamgbagha ori ọ ḅụ pa dieapụ, kụ́ma Tamuno ọ ḅara na sẹlẹakịapụ ma, anịị wamịnị ọ nana fị pịghị ọ nana ḅuuapụ, ọ fịị ḅụ saghị fama sáá. 42Ọ warị tọ́ọ wa pịrị ḅẹ́, wa ori ibi oku ma dugho wásámáa túminị́ ma pịrị ḅẹẹ, ori anịị Tamuno pa ḅẹ́rẹ́kọḅọ tọ́ọ duma na fịịapụ pị́rị́máaḅọ. 43Ikiakoroapụ mamgba o gbolomanyẹ dughom ḅẹ́ ọ ḅụ mininiḅọ gonyẹ́ gonyẹ́ siiḅụḅárasi pịrị nyánábẹm, Jizọs Krais ẹrẹ ma ḅụ ḅọ́rọ́.>>
44Pita pa ẹ́gẹ́rẹ́arị sáá Tọ́ntọ́ Tẹ́mẹ́ ma warị kóróḅo o pughuuarịapụ mamgba ḅụ sọọ. 45Pita na Jọpa ḅụ saghị ḅo sị mininiapụ, anị n tọ́rụ́ daam bẹ Tamuno ori Tọ́ntọ́ Tẹ́mẹ́ dienyẹ ma, mịẹm sị Juughaapụ ma sọ anị nyáná. 46Ḅẹẹ nnị n naam, nnị jẹ́ ḅẹlẹ pa ẹ́gẹ́rẹ́kọarị sị, Tamuno ma túminíarị.
Pita warị ḅẹẹ, 47<<Mịnaapụ ma Tọ́ntọ́ Tẹ́mẹ́ ma nyánáḅomam wamịnị sọ nyáná ḅo ḅara gbẹ́rẹ́ḅọ sọ mị́sa ine nnị kikibịgha ḅẹ́ nnị mingi pa n sara ma?>> 48Ọ warị ḅẹ́ nnị mingi pa n sara Jizọs Krais ẹrẹ ḅụ. Anịsáa nnị warị Pita ḅẹẹ ọ kẹ́lẹ́ nnị na kálá dii nyẹ fịnịị.
Одоогоор Сонгогдсон:
Fịrị Ḅara 10: IBY
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©2024 Luke Initiative for Scripture Translation
