KEJADIAN 38
38
Yehuda inowen iyamalhe fam siyahon tibag ane
1Ari tibag li hun Yehuda ino ori embeselug o Adulam ahun Hira men welaruhuk ulug ambeg wirig atfag. 2O inowen yet harukmu o Kanaan hilani umalik tuhumon Syua ahaloho ino yet hibareg hilibag. Hilibareg at men nohorukmen 3malik ahummu atfagma welatfareg ap umalik indag tibag. Indag tibareg unuk Er suwalfag. 4Welatfareg malik eke ap umalik indag tibareg unuk Onan suwalfag. 5Nin welatfareg amloho eke indag tibareg unuk Syela suwalfag. Ikni Yehuda ino o Kezib weregma Syela ino indag atfag.
6Welatfareg Yehuda inowen amloho wandabon Er fahet hiyap unuk Tamar og itfag. 7Og itfag angge famen Yehuda amloho wandabon Er inowen Ninikni Allah olohotma olok ane eneg turuken Ninikni Allahn ware fisibag. 8Ware fisibagma Yehuda inowen Onan fam ele uruk lit, ”Wene amulik nunumbasiyen turuk latfahon hikit toho haren oho hiyap howeyen lin isarisiyon tu hilamihinteg noholihipmu aren malik howe ubalmangge eke enderuhu,” ulug hiyag itfag. 9Hiyag itfag angge famen Onan inowen indimu wenggel haruk lit malik enderuhukon anden tohon am fug angge nowe unuk fam indag amuhup tohon ulug uhe oweyen lin isibahon men nohoruk lit ahaluwe kinangma hik isaruk latfagma malik ahummu atfag fug. 10Ari roho turuk lit Ninikni Allah olohotma olok ane turuken Ninikni Allahn Onan oho ware fisibag. 11Ware fisibagma Yehuda inowen indimuwen wenggel haruk lit owesi piren war atusa hag toho namloho Syela oho war aruhu rohon pibareg iyamalhe Tamar fam hiyag utuk lit, ”Hiyap yuwog atikin angge re hikni ibam lamihinteg weregman eneg an namloho Syela ebe su aruhureg hat og habuhu,” ulug hiyag itfag. Hiyag itfag ane hikit toho Tamar ino ikni ibam libareg welatfag.
12Welatfagma Syua ahaloho Yehuda uhe ino war atfag. War atfagma Yehuda ino fong waroho welatfareg notsiyen nambohom oruk paltuk ambeg lahul ulug are o Adulam ahun unuk Hira men ambiyeg o Timna lahibag. 13Hat hiyamalen nambohom oruk paluhuk ulug o Timna kalemma lahik waharuk urukon hol hibareg 14Tamar inowen Syela ebe su atisi angge famen an at uhe atikik fug peruk lit fong watuk li sum wan turuk latfahon ino nonggoloho embelug norohole yet niyahup tohon ulug orohole sum fam saloho laruk lit kalem o Timna fil laharuk ke libareg o Enaim kuruk ambeg hur arik libag. 15Heriyeg lit weregma Yehuda inowen at yet hibareg orohole saloho welatfag ane ino fahet hiyap tu yaying turuk hiyap pibag. 16Ari peruk lit Yehuda ino at iraham libareg ubam ele uruk lit, ”Ambiyeg nohulen ma,” ibag. Ibahon ari tu an niyamalhe ulug apeleg toho ibag. Ibagma, ”Nohulon fahet onggo nungge angge og nitmihin?” ibagma 17aren hebeloho hiyag utuk lit, ”An nambohom kambing arimano famon umalik eke og hirik wamuhup,” ulug hiyag itfag. Hiyag itfagma og nirik wam fug nowen pibareg, ”Hat hanggengge eke og nitmihinmu wam ino og nirik waruhun sambil ino hebeloho og huruhuken og nimin,” ibag. 18Ibagma Yehuda inowen, ”An nanggengge nungge angge og hitmin?” ulug kapal hibagma hiyap inowen, ”Sulanggen hamigmu hele fam ilang toho wan teg lahenon hunuk haharehon ino men huwanggun men og nitmihin,” ulug hiyag itfag. Hiyag itfag ane hikit toho Yehuda inowen og itfareg hiyap ino men nohibag. Nohibagma hiyap ino malik fet talug latfag. 19Ino sambil hiyap ino libareg sum orohole saloho wan turuk latfahon embeselug fong watuk lit wan turuk latfag asum ino nin hebeloho wan tibag.
20Weregma Yehuda inowen wam kambing umalik eke wibareg are o Adulam ahun ino hiyag utuk lit, ”Wam tu hiyap ino og irik lamihinmu aren an nubamangge anden inggikmu emberikik angge og hitmisimu walug watmihin,” ulug hiyag itfag. Hiyag itfagma Adulam ahun ino hiyap tam heriyeg latfag ambeg itano larukmen hiyap ino eleg latfag. 21Eleg latfagma ap inowen o Enaim inap unubam, ”Hiyap yaying turukon o Enaim kalemma ariya heriyeg latisiyon ino kema larisi?” ulug kapal isibagma iren te, ”Hiyap yaying turukon tuma re wereg eleg,” ibag. 22Ibagma Adulam ahun ino hebeloho Yehuda ambeg libareg hiyag utuk lit, ”Hiyap ino elegma lahi. O ino inaben oho hiyap yaying turukon tuma wereg eleg ehesa,” ulug hiyag itfag. 23Hiyag itfagma Yehuda inowen ele uruk lit, ”Imbisin-a, nit inda yag nenebuhup tohon ulug anden angge ino at inggikmu welamag. Anden wam umalik og hitmin irikik ane hikit toho tihi angge famen hat hiyap ino men ambiyeg ahep fug,” ibag.
24Welatfareg pikalem hinahan libagma ap ekeyen Yehuda hiyag utuk lit, ”Hiyamalhe Tamar inowen yaying turuk lit malik ahummu atisi,” ibagma Yehuda inowen, ”Hiyap ino walug lalihipteg indokma yaltihip,” ibag. 25Ibag ane ari hikit toho Tamar ino walug larukmu Tamar inowen enehangge tam iyamalen og itfag angge ino wibareg ap hiyag isaruk lit, ”Enehangge tu niyamal ambeg walug lalihipteg hiyag irik lalihibon tu: Sulanggen hele fam ililohon unuk haharehon tu men wanggun tu men san tohon ulug pen hamihin. Hiyamalhe inowen te, ’Enehangge tu og nitisi ahunen malik nahummu emberisi,’ ehek ulug hiyag itlihip,” ulug mon enepfagma libag. 26Enehangge Tamar inggikmu og itfahon ino suhuloho Yehuda ambeg walug libagma Yehuda inowen pen hibareg ele uruk lit, ”Hiyap inowen we fano ane turuk latisi angge famen anden namloho Syela inowen hilahu ulug sali irikikmen og um fug angge alem siyahon tirikik,” ibag. Ibareg wereg lit hiyap ino men nohuk fug angge welatfag.
27Hiyap inowen malik indag ta reg li indimuwen malik piren nahummu wereg peruk latfag. 28Ari peruk lit weregman malik indag arik oho sambil ino malik misihen inggik tam wilibig waharukmu malik indag eneptuk hiyap inowen inggik seneg lit tu wandabon ulug inggikmu hele huluwon pug tibibag. 29Pug tibibag angge famen malik ino abirangge indag am fug angge inggik nin lisoho wibagma ot tam indag atfag. Indag atfagma malik indag eneptuk hiyap inowen ele uruk lit, ”Wilip atmin ulug hine roho tehen,” ulug malik ino unuk Peres#Peres: Ibrani enele fam Ine roho Wilip Atukon uruk. suwalfag. 30Ari tibagma malik inggikmu hele enehangge pug tibibahon ino fobik indag atfagma unuk Zerah suwale fibag.
Одоогоор Сонгогдсон:
KEJADIAN 38: YLI
Тодруулга
Хувилах
Харьцуулах
Хуваалцах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
@ LAI 2018
