Daniyɛl 13
13
A Suzan bʋʋdo
1Ned n da be Babilon, n boond tɩ Zoakim. 2A ra yii kãadem ne a Elkiya biig a Suzan; yaa pag sẽn tar neerem la sẽn zoet Naaba-Wẽnde. 3A ba rãmba da yaa nin-sõma la b ra wuba b biiga wala a Moyiiz noora sẽn date. 4A Zoakim da yaa rakãagre, a yira ra me n yegla a zẽedo. Zʋɩf rãmba ra wata a nengẽ wʋsgo, a ra tara ziir n yɩɩd a taaba. 5B ra yãkame tɩ b na n yɩ bʋ-kaoodb yʋʋmd kãnga nin-kẽems a yiibu. La yaa neb a woto buud yelle la Soaala ra gom yã, b sẽn waa n yeel zĩig ningã: «Yel-wẽnda yii Babilon, a yii nin-kẽemse la bʋ-kaoodba sẽn zãad buuda nengẽ.» 6Dɩlla nin-kẽems a yiibã me ra wata a Zoakim yirã la neb niyns sẽn da tar-b bʋʋd ne taaba ra wat n segd-b-la be. 7Sã n da mii n ta wĩnto-sʋka tɩ neba fãa looge, a Suzan wata a sɩda zẽedẽ n kokd pemsem. 8Nin-kẽems a yiibã ra yãet-a-la beoog-beoog fãa t'a gõod zẽedẽ wã la a Suzan yamleoog waa n yõk-b lame. 9B yam waa n menemame tɩ b yĩm yĩngri Wẽndã ne b bʋʋd tɩrsa yelle. 10Yaa bãmb b yiiba fãa la tʋlsem wẽnga ra namsda, la ned da ka rat t'a to wa bãng ye. 11B yiiba fãa da rata pagã la wilg rẽndã f tũud-n-taag ra yaa yãnde. 12La daar fãa, dabaar ka be b sẽn ka maane n paam n yãend paga ye. 13Daara a ye nin-kẽemba welga taaba n yetẽ: «D kul d yiri tɩ rɩɩb wakat taame.» Tɩ b bak taaba, tɩ ned kam fãa dɩk a sore. 14B yaool n pa zãag ye la ned kam leba a poorẽ, ned kam leba zẽedẽ wã. Woto b le tuka taaba. La b sẽn sok taaba, b bãnga raab wẽng ning sẽn da be ned kam fãa sũurẽ la b yaool marsã n bao wakat ning b sẽn na n paam t'a Suzan yaa a yembre. 15Woto wã b ra gẽesda b zu-noog raare. Daar a ye, a Suzan waa zẽedẽ wa, wa rasem kam; kom-pugli a yiib bala n da yãagd-a. Zĩig sẽn da wɩng yĩnga a tʋlgame n so koom zẽeda pʋga. 16Ned da ka be be n paase, sã n ka nin-kẽems a yiibã sẽn da solg n gũusdẽ wã ye. 17A Suzan yeela kambã: «Tɩ wa-y ne kaam la yũ-noog ka-zɛɛdem la pag-y zẽeda noore, tɩ m paam n so koom.» 18Kom-pugli wã reega noorã la b paga zẽedã, n tũ noor sẽn be kɩrenga, n kẽ zakẽ, n na n wa ne a Suzan sẽn wilgã. Kom-pugli wã ka yãend nin-kẽemsa sẽn da solga ye. 19Kom-pugli wã sẽn looge la bãmb sẽn wẽneg n yik n babs a Suzan, 20n yeel-a: «Zẽeda noor pagame, ned ka ne tõnd ye. Tõnd dat-f lame, sak tɩ d bãng-fo. 21F sã n zãgse, d na yeele tɩ d yãe-f-la ne bi-bɩɩga, la yaa rẽ yĩnga la f sẽn kɩt tɩ f kamba zãagã.» 22T'a Suzan wẽed siri la a yetẽ: «Ade, b gũbg-m-la goabg la rɩtgo, m sã n sake, m ki yã! M sã n zãgse, m kõn põs-y ye. 23La yãmb sẽn na n kʋ maam tɩ m ka sak yãmba n são m sẽn na tõdg Naaba-Wẽnd sẽn ne-ma.» 24A Suzan kaasame, tɩ nin-kẽemba me na n wẽ no-bɩnga. 25B nin-yend wudgame n tɩ pak zẽeda noore. 26Sẽn da be-b zakẽ wã wʋma bʋʋra zẽedẽ wã n wudg n tũ kɩreng noorã n na n ges yaa bõe n maande. 27Nin-kẽemba sẽn togs n sɛ, yãnd yõka sõgen-kambã. B ra zɩ n wʋm tɩ b gom wẽng a Suzan poorẽ yẽ.
28Vẽkembeoogo, neba tigma paga sɩd a Zoakim yiri. Nin-kẽemba waame. B waa ne b wẽnema la b sẽn baood yaa a Suzan kũum bala. 29B yeela zãma wã: «B tall a Elkiya biiga a Suzan, a Zoakim pagã, n wa!» B waa ne-a. 30A waa ne a ba rãmba, ne a kamba, ne a zaka neba. 31A Suzan da yaa pag sẽn ya neere n sakd gesgo. 32A ra pila a nenga, la nin-yaalsa kɩtame tɩ b lak peenna tɩ b tõog n tɩg a neerma. 33A buuda ra yãbdame, sẽn da get-ba fãa ra yãbdame. 34Nin-kẽemb a yiiba yika zãma wã sʋka n tik a zug ne b nusi. 35Dẽ t'a Suzan tara yãbre, n doog a neng n tees yĩngri n teeg Soaala-Wẽnd a sũurẽ. 36Ad nin-kẽemsa sẽn yeele: «Tõnd da gõoda d yiib zẽeda pʋga; pʋg kãnga waa n kẽe ne kom-pugli a yiibu. A paga zẽeda noore, n kuls kom-pugli wã. 37Bi-bɩɩg a ye sẽn da solge kolg-a lame n gãand ne-a. 38D da be al zẽeda sɛtmẽ, la d sẽn yãe wẽng a woto buudu, d wudg n ta-b lame. 39D yãee neere tɩ b gãe ne taaba. D pa tõog n koomd bi-bɩɩga ye t'a pãng ra yɩɩda tõndo, woto wã a paka kʋɩlenga n zoe n looge. 40Sã n ya yãoa, d gãd-a lame, n sok-a sẽn ya ned ninga. 41A ka sak n togs ye. D kaset la woto.»
Zãma wã tẽ-b lame tɩ b ra yaa buud kãsem-dãmba la bʋ-kaoodba. Woto b paalga a Suzan bʋʋdo n na n kʋ-a. 42A Suzan kelma wʋsgo n yeele: «Ka-sɩng-kõn-zĩnd sɛɛb Wẽnde, yãmb sẽn mi sẽn solge, yãmb sẽn zoe n ne bũmb t'a nan ka beẽ, 43y miime tɩ yaa rõadg la b sẽn dõd maama. M na kiime, n yaool n ka maan b wẽnema sẽn dogl bũmb ning m zuga ye.»
44Naaba-Wẽnd wʋma a Suzan koɛɛga, 45la b sẽn da zoe n tar-a n dabd kʋʋbo, Soaala-Wẽnd pidsa bi-bilf a ye ne yam vẽenem. Biiga yʋʋr la a Daniyɛl 46la yẽ sɩnga porbo: «M kõn dɩ pʋg kãnga zɩɩma daagr taal ye!» 47Neba fãa wẽneg n teesa yẽnda n sok-a: «Fo goama rat n yeelame tɩ bõe?» 48A Daniyɛl zĩnda zãma wã sʋk n yeele: «Israyɛl kamba, y yika gãeemd sẽn sek a na paalg Israyɛl bi-pugl bʋʋdo n pa reng n sogs la y rɩ sɩd kaset laa?» 49Leb-y bʋʋda zĩigẽ, tɩ b sẽn togs paga poorẽ wã yaa zirẽ.
50B leba ne yãgbo, bʋʋda zĩigẽ, la nin-kẽemba yeela a Daniyɛl: «Wa zĩnd tõnd sʋka n togs tõnd fo sẽn tagsde, tɩ Wẽnd kõ-f-la ziir ninga kʋʋlem sẽn wat ne a soabã.» 51T'a Daniyɛl na n yeele: «Welg-y neb a yiibã ne taaba sõma, tɩ m sok-ba.» 52B zãag-b-la ne taaba, t'a Daniyɛl kɩt t'a ye kolge, t'a yeel-a: «F kʋʋla ne wẽnem, la ad f sẽn maan f vɩɩma pʋgẽ sẽn yik n na n paalg-fo. 53F ka bʋ bʋ-tɩrs ye, f ra paaglda sẽn ka tar b toorẽ yelle n yaool n basd yɛla rãmba, n yaool n mi Soaala-Wẽnd sẽn yeele: ‹Da kʋ ned sẽn ka beeg ye, da kʋ nin-tɩrg ye.› 54Ade, f sã n gesa neere, wilg tõnd sẽn ya tɩɩg ninga tẽngre la f yãend-b ne taaba?» T'a leoke: «Sɩɩg tẽngre!» 55A Daniyɛl yeel-a lame: «Sɩd ne sɩda, f zirẽ lɛɛg n lʋɩ-la f zugu, ad Wẽnd malɛka wʋma Wẽnd sẽn yet tɩ b maan-f bũmb ninga t'a wat n na n sɩɩg-fo.» 56A kɩtame tɩ yẽ looge, tɩ b wa ne a to wã, t'a yeel-a: «Fo ka a Zɩɩda buud ned ye, fo yaa Kanaã rãmb buud neda. Paga neerem menesa f yam, tɩ raab wẽng golem f sũuri! 57Yãmb da maanda woto ne Israyɛl kom-pugli n kẽesd-b rabeem tɩ b sakd y wɩɩbdo. La ade, sã n ya ne Zɩɩda bi-pugla, a ka sak y yãnda ye. 58Woto wã togs maam marsã sẽn ya tɩɩg ning tẽngre la fo yãend-b ne taaba, yẽnda ne bi-bɩɩgã!» T'a leok: «Yaa pusg tẽngre!» T'a Daniyɛl yeele: «Sɩd ne sɩda, foom me, f zirẽ-beebda lɛɛg n lʋɩta f zugu. Ad Wẽnd sẽn yɛs ne sʋʋga b nugẽ, la sʋʋga na n pusga f pʋga, n yaa n sɛ ne yãmba.» 59A Israyɛl zãma wã naaga taaba n tãse, n pẽg Wẽnde, tɩ b fãagda sẽn teegd-b bãmba. 60Dẽ poore b wẽnemd n teesa nin-kẽems a yiibã. A Daniyɛl kɩtame tɩ b togs ne b meng noore tɩ b yaga zirẽ. Woto wã beed ning b sẽn da rat ne a Suzana la b tʋm bãmba. 61Wala a Moyiiz noor sẽn datã, yaa sɩbgr ning b sẽn da rat tɩ b sɩbg pagã, la b sɩbg bãmba; b kʋ-b lame, la woto, baraare, yɩɩ nin-sõng zɩɩm la b pa tõog n daage. 62A Elkiya ne a paga pʋʋsa Wẽnnaam barka, b biig a Suzan yĩnga. B naaga a Zoakim, a Suzan sɩdã ne a zaka gilli n pẽg Wẽnde b sẽn ka yãend a Suzan nengẽ bũmb sẽn ya wẽngã.
63Badaare tɛka a Daniyɛl lebga nin-kãseng buuda taoore.
Одоогоор Сонгогдсон:
Daniyɛl 13: SSDC98
Тодруулга
Хувилах
Харьцуулах
Хуваалцах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
SEBR SÕNGO © Alliance Biblique du Burkina Faso, 1998.