Gl 5-ын алдартай Библийн эшлэлүүд

Хуваалцах

Qalaĝaja ñe'me Lepaqal ñe'me Dios qo'mi noqopitaĝanaĝaneque jogaa'me qadaqaya'olqa, nach'e eta't jouaqataue da'me qo'mi made'tape nataq'aen jouaqataue da'me qat'emaĝac da'me jouaqa'tajopa gaa'me qadaqaya'. Qo'mi e'n ñapogaĝadenaq nataq'aen qo'mi qopitaĝanaqataqayaqa, nataq'aen nach'e eta't 'noota ga'me je'etaĝaque jogaa'me qadaqaya', jep'iyaqa ñe'me Dios. Qo'mi joĝodayaqa, nataq'aen jayatenaq da'me ñomata' gaa'me ch'e qadamaico. Qom naq'aeta da'me qat'oyaĝac, qama'le ja qoyouetaque ga'me namaĝajoĝonaĝac.

Qo'che' ami jaqateque da'me auoqochiiya ñe'me Dios Lepaqal qama'le ja auauoyi lamaic ga'me ja no'en ta'le a'vichi.

Ta'le ñe'me Dios Lepaqal yadalaĝat da'me loec da'me qat'oyaĝac, 'noota qom yema joqochaĝa.

Qama'le qo'mi da'me joote jouaqa'tot ñe'me Jesucristo joote jenaĝa yeleualegue jaga'me sodoso da'me qanejiyaĝauayaĝac loecoyaĝac nataq'aen gaa'me ja 'noe'n lamaico.

Qaya'te laqalaic nale qoyec'ate'n gaa'me quetapegue'to daa'me lapa'che lamaico; ja yataĝalegue da'me 'lonáĝac, 'uo ga'me lequejeguetaĝa, nataq'aen yauapiye gaa'me paĝachiguilo ja 'noe'n namanaĝanaĝaco. Netamenoto gaa'me qop'iya'alo 'me ja ejoda, napaĝagueta da'me 'uo ga'me napinec qaedi pi'yoĝo'n nataq'aen ja yeuote'n gaa'me laqaya'. Mach'egaua deloiquitapega't, c'alaĝanaĝayaqa nataq'aen gamachaqaega yalemataĝanaĝa'n. Mach'e niyamaĝadetapela'ajalo, nach'e eta't necotayapega't, nataq'aen jogaa'me chiyaqayilo da'me male onolqa'tape uo'oe naa'me mach'e tayapegue'galo. Yataqachiñe p'aguenataĝanaĝayaqa jogaa'me, chayovida'a yala't gaa'me laqaya'; yacota ga'me lataĝa qama'le taĝayaqa, nale yovita ga'me nolo' da'me yauote ga'me netonaĝa'j qama'le yacota ga'me laláĝa'j na'le deualaĝai'tape, nataq'aen qayoĝode' gaa'me ja 'noe'n yauo'oe. Ami jaqatalo, naq'aeta ga'me joote ami janema ca'li, da'me gaa'me jo'ne naq'aeta ga'me yauote qama'le ja yaqanate't ta'le tadoue da'me lejaliaĝa ñe'me Dios.

Ami yaqaya'olqa, Dios ami yiyaĝanalo qaedi ami uojotedañi. Qalaĝaja ena'te aueñetapela't adoĝochi da'me ami uojotedañi ta'le taue q'aen da'me a'vichi ga'me ja no'en. Dite da'me anecochiyapega't qa'a 'uo da'me adoqopich'ii.

Qa'a gaa'me ja 'noe'n lamaico yataqata ja yauaĝa ga'me yepaquetapega ñe'me Dios Lepaqal, nataq'aen ñe'me Dios Lepaqal ja yauaĝalo gaa'me ja 'noe'n namaico. Chane'eja ami ja auaqanachichi ta'le auauoyi ga'me yepaquetapega da'me anejiyaĝauayaĝaqui.

Qa'a onolec ga'me lamaĝajoĝonaĝac ñe'me Dios yemata'a't yema gaa'me namaĝajoĝonaĝaco: “Adoqopitalo jogaa'me adaqaya'olqa nach'e naq'aeta na'le anoqopitela't.”

'Noota qom ja qo'mi 'te 'yoĝodenaĝayaqa, ena'te qo'mi chiyaqayilo da'me 'uo ga'me yalemataĝanaĝatac uotaĝa 'uo da'me lep'aguenataĝanaĝac ga'me qadaqaya, qom jenaĝa qadelnataĝac da'me qo'mi 'noote' ja jenaqa'am ga'me qadaqaya.

¡Yataqachiñe eja da'me male qo'mi uojotedañi, qa'a nach'eñe ñe'me Jesucristo qo'mi yejodegue! Chane'eja ena'te oquiya'e da'me dojo' ami qoyejodegue, uotaĝa ta'le a'viyelaqaiya da'me yitaĝa ami lelataqa daa'me namaĝajoĝonaĝaco.