John 3
3
1యూదులేర్ హకమ్దార్ నీకొదేమ్ కజకో ఏక్ పరిసయులేవాళో వెత్తో.
2ఉ రాత్వణా యేసు ఢైఁ ఆన్ - బోధకరేవాళో తుఁ దేవే కనేతి ఆయొజకో బోధకరేవాళోకన్ హమేన మాలమ్ ఛ. దేవేర్ మదత్ నరతో, తుఁ కర్రో జకొ నిశానేర్ కామ్ కొయి సదా కర్సకేని కన్ ఓన కో.
3జనా యేసు - ఏక్ నవో జనమ్ లేలతోజ్ తపన్ ఊ దేవేర్ రాజ్ దేక్ సకెనీకన్ తోన సాసీజ్ కేరొంచుఁ కన్ కో.
4జేతి నీకొదేమ్- బూడోవేగోజకో ఆద్మీ కూఁ జనమ్ లేసకచ? దీమోవణా మాయేర్ పేటేమా జాన్ జనమ్ లేసకియక? కన్ ఓన పూచోజనా,
5యేసు హనూకో - ఏక్ పాణీతీన్, ఆత్మాతీ జనమ్ లతోజ్ తపన్, దేవేర్ రాజేమా జాసకేనీకన్ తోన సాసీజ్ కేరోఁచుఁ.
6జీవ్దార్ వడి జనమ్ లజకో జీవ్డాన్, ఆత్మార్ వడీతి జనమ్ లజకో ఆత్మాజ్ వచ.
7తమ్ నవోజనమ్ లేణో కన్ మ తోన కోజేతి అప్సోస్ నవేణొ
8వాళ్ ఓర్ ఖాతర్ ఆవ జీమ మారచ. తుఁ ఓర్ ఆట్ సామ్ళేచీ పణ్, ఊ కత్తేతీ ఆవచకో, కత్తజావచ కో, తోన మాలమ్ ఛేని. ఆత్మార్వడీతి జనమ్ లజకో హర్యేక్ సదా హన్నూజ్ ర ఛ కన్ కో.
9జేతి నీకొదేమ్ - ఏ వాతే కూఁ వేసకచ ? కన్ ఓన పూచ్తేఖమ్.
10యేసు హన్నూకో - తూఁ ఇశ్రాయేలేవాళేన బోధ కరేవాళో రేన్ సదా ఏన మాలమ్ కర్లేస్నిక ?
11హమ్ మాలమ్ కర్లిదేజకో వాతేనజ్ కేరేఁచాఁ. దీటేజేనజ్ గవాయి దేరేంచాఁ. హమార్ గవాయి తమ్ మానోనీకన్ తోన సాసీజ్ కేరోఁచుఁ.
12ఏ జగేర్ వడీర్ వాత్ మ తమేతీ కూఁతో తమ్ విశ్వాస్ నకరోతో, స్వర్గ్ లోకేర్ వాత్ తమేన కూఁతో తమ్ కూఁ విశ్వాస్ కర్ సకో చోఁ?
13ఉజ్జీ స్వర్గ్ లోకేతీ ఉత్రన్ ఆయొజకో కతో స్వర్గ్ లోకేమా రజకో ఆద్మీర్ బేటాజ్ తపన్ స్వర్గ్ లోకేన చడన్ గో జకో కుణీజ్ ఛేని.
14జంగలేమా మోషె సర్పేన కూఁ పాడోకో,
15హన్నూజ్ విశ్వాస్ కీదేజకో హర్యేక్ నాశ్ నవజుఁ ఓర్వడీతీ శాశ్వత్ జీవ్ పాలజుఁ ఆద్మీర్ బేటా ఊంపర్ ఉప్డాజావ్ణో.
16దేవ్ జగేన కత్రాయికో ప్రేమ కీదో జేతి ఊ ఓర్ ఎక్లోజ్ హుయోజే బేటాపర విశ్వాస్ రకాడజకో హర్యేక్ ఆద్మీ నాష్ నవజుఁ శాశ్వత్ జీవ్ పాలజుఁ దేవ్ ఓర్ బేటాన దీనో.
17జగ్ ఓర్ బేటార్ వడీతి రక్షణ్ పాలేనజ్ పణ్, జగేన నేవొ కరేన దేవ్ ఓన జగేమా మేలోకొని.
18ఓర్ ఉంపర్ విశ్వాస్ రకాడేవాళేన నేవొ కరేని; విశ్వాస్ కీదోకోని జకో దేవేర్ ఏక్లోజ్ బేటార్ నామేపర భరోసా రకాడోకొని, జేతి ఓన ఏర్ ఆంగజ్ నేవొ వేగో.
19ఊ నేవొ ఈజ్. వజాళో జగేమా ఆయో పణ్ ఉందేర్ కావతే ఖారాబ్ రజేర్ కార్ణే ఆద్మీ వజాళేన ప్రేమ్ నకరజూఁఅందారేనజ్ ప్రేమ్ కీదే.
20ఖరాబ్ కామ్ కరేవాళో హర్యేక్ వజాళేన ద్వేష్ కరచ. ఓర్ కామ్ ఖరాబ్ కామేర్ నైఁ నదకావజుఁ వజాళె కన ఆయేనీ.
21సత్తేతీ బంచెవాళో వతో ఓర్ కామ్ దేవేర్వడీతి కర్మెలోకన్ దకావజుఁ వజాళె కన ఆవచ.
22ఓర్ పచ్చ యేసు ఓర్ చేలాఁవుతీ సదా యూదయ మల్కేన ఆన్ ఒత్త ఉందేతీ దాడ్ కాడ్తో బాప్తీసమ్ దేతోర.
23సలీమే కన రజకో ఐనోన్ కజకో జాగేమా పాణీ ఘణో రజేతి యోహాన్ సదా ఒత్త బాప్తీసమ్ దేతోర. జన్ ఆన్ బాప్తీసమ్ లేల్దే.
24యోహానేన ఉజ్జీ జేలేమా ఘాలెకొని.
25పవిత్తర్ కరేర్ చాల్ చల్గటేర్ కార్ణే యోహానేర్ చేలావున ఏక యూదా వాళేతి తక్రార్ హుయో.
26జేతి ఓ యోహానే కన ఆన్- బోధకరేవాళో, కూణ్ యోర్దానేర్ పర్లేవ్డి తార్ సాత్ రోకో, తూఁ కేర్ కార్ణే గవాయి దీనోకో, ఇదేక్, ఊ బాప్తీతీసమ్ దేరోచ. సే ఓర్ కన చలె ఆవచ కన్ ఓన కే.
27జేతి యోహాన్ హనూకో - ఓన స్వర్గ్ లోకేతీ దతోజ్ పణ్ కుణీ సదా కాఁయిఁజ్ లేసకేనీ.
28మ క్రీస్తు కొనికన్ ఓర్ ఆంగ మేలో జకోజ్ ఛూఁ కన్ మ కోజుఁ తమజ్ మార్. గవాయి.
29నవ్లేరివాళోజ్ వ్యాత్డూ; పణ్ హుబ్రేన్ వ్యాత్డూర్ వాత్ సామ్ళేవాళో దోస్తీదార్. వ్యాత్డూర్ ఘోగ్ సామ్ళన్ ఊ ఘణ్ ఖుషీ పావచ. ఈ మార్ ఖుషీ భర్పూర్ వేగీ చ.
30ఊ బడేవాళో ఛ. మ ఘట్ జాయెవాళోఛుఁ.
31ఉంపరేతీ ఆయెవాళో సేతీ ఉంపర్ ఛజకోన్. ధర్తీ మాఁయితీ ఆయెవాళో ధర్తీర్ సంబంధి జేతి ధర్తీర్ బారేమా వాతేకరచ. స్వర్గ్ లోకేతీ ఆయెవాళో సేర్ ఉంపర్ రేన్,
32ఊ దీటో జేర్ వడీతీన్ సామ్ళోజేర్ వడీతి గవాయి దచ. ఓర్ గవాయిన కొయి మాన్లే నీ.
33ఓర్ గవాయి మానేవాళో దేవ సత్తేవాళో కన్ కజేవాతేన మోర్ మార్మేలోచ.
34కసెన కతో దేవ్ ఊ మేలోజేన కమ్ నకరజుఁ ఆత్మాన దచ. జేతి ఊ దేవేర్ వాతేజ్ కచ.
35బాప్ బేటాన ప్రేమ్ కర్రోచ. జేతి ఓర్ హాతేమా సొగ్ళీ హవాలె కర్మేలోచ.
36బేటాపర విశ్వాస్ రకాడ జకోజ్ శాశ్వత్ జీవ్ పాయెవాళో, బేటార్ వాత్ నమానేవాళో శాశ్వత్ జీవ్ దేకేని పణ్ దేవేర్ అంఘార్ రీస్ ఓర్ ఉంపర్ థమన్ రచ.
Селектирано:
John 3: Lambadi
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2025, The Bible Society of India
All rights reserved