John 2
2
1తీన్మో దాడేమా గలిలయామా రజకో కానా కన్ కజకో గామేమా ఏక్ వాయా హుయో.
2యేసుర్ యాడీ ఒత్త ర. యేసూన్ ఓర్ చేలావూన వాయాన బలామంగాయె.
3ఆంగూరేర్ రస్ ఖూడ్గో జనా యేసూర్ యాడి ఉందేన అంగూరేర్ రస్ ఛెనికన్ ఓన కీజనా.
4యేసు ఓతీ - యాడీ మాతి తోన కాఁయిఁ కామ్?, మార్ వకత్ ఉజ్జీ ఆయికొని కన్ కో.
5ఓర్ యాడి సేవా కరేవాళేన దేకన్ - ఊ తమేన కజకో కరోకన్ కీ.
6యూదూలేర్ చాలేన పక్డన్ ధోయెన పాణీ మేలజకో ఎకేకేమా దీ మణ్ తీన్ మణ్ పాణీ నావ్డజకో ఛో భాటార్ బానా ఒత్త మేలన్ ర.
7యేసు - ఓ బానావూన పాణీతీ భరోకన్ ఉందేన కేతేఖమ్, ఓ ఉందేన కనోరా లగు భరే.
8జనా ఊ ఉందేన - తమ్ అబ భర్లేతాణి వాయార్ మోటెకన లేజావోకన్ కేతేఖమ్ ఓ లేగే.
9ఊ అంగూరేర్ రస్ కత్తెతీ ఆయొకో, ఊ పాణీ భర్లేన్ లేగేజే సేవా కరేవాళేనజ్ మాలమ్ పణ్, వాయార్ మోటేన మాలమ్ ఛేని. జేతి ఆంగూరేర్ రస్ వేగో జకో ఊ పాణీ చాకే జనా, ఊ వాయార్ మోటో, వ్యాత్డూన బలాన్.
10హర్యేక్ అగ్డి ఆచో అంగూరేర్ రస్ ఘాలన్ జన్ నిసాతీ రజనా ఫికో రస్ ఘాలచ. తుఁతో అబెతాణు ఆచో అంగూరేర్ రస్ రకాడ్ మేలోచి కన్ ఓతీ కో.
11గలిలయామా రజకో కానామా యేసు ఏ అగ్డీర్ నిశానేన కరన్ ఓర్ మహిమాన దకాళో. జేతి ఓర్ చేలా ఓర్ ఉంపర్ విశ్వాస్ రకాడె.
12ఓర్పచ్చ ఊన్ ఓర్ యాడీన్ ఓర్ భాయీన్, ఓర్ చేలా కపెర్నహూమేన జాన్ ఒత్త థోడ్సేక్ దాడ రే.
13యూదులేర్ పస్కార్ తెవార్ ఢైఁ, ఆవ్తేఖమ్, యేసు యెరుషలేమేన జాన్,
14దేవళేమా బళద్, గోర్లీ, కబూతరే వేచేవాళేనన్ పీసా భంజాయెవాళ్ సే బేటే జేన దేకన్,
15బద్నాతీ చామ్టీ కరన్, గోర్లీవూనన్, బళ్దేవున సేన దేవళేమాఁయిఁతీ భడ్కాదేన్ రప్యా భంజాయెవాళేర్ రప్యా ఛణక్దేన్ ఉందేర్ మేజే పటక్దేన్,
16కబూతర్ వేచేవాళున-ఇందేన అత్తెతీ లేజావో. మార్ బాపేర్ ఘరేన వ్యాపార్ కరజె ఘరేర్ నైఁ కరోమత్ కన్ కో.
17ఓర్ చేలా, తార్ ఘరేర్ కార్ణేర్ కూంత్ మన ఖాజావచకన్ లకన్ ఛ జకో హర్దే లాల్దే.
18జేతి యూదూల్ - తూఁ ఏకామ్ కర్రోఁచి కొని కాఁయిఁ? కుణ్సి నిశాన్ హమేన దకాళేచీకన్ ఓన పూచ్తేఖమ్
19యేసు- ఏ దేవళేన పటక్దో, తీన్ దాడేమా ఓన వటాడూంచుఁ కన్ ఉందూన కో.
20యూదూల్ - ఏ దేవళేన ఛోపర్ చాళీస్ వరస్ భాందే. తూఁ తీన్ దాడేమా ఓన వటాడెచీ కాఁయిఁ కన్ కే.
21పణ్ ఊ ఓర్ జీవ్డా కజకో దేవళేర్ కార్ణే ఈ వాత్ కో.
22ఊ మర్గేజేమాఁయిఁతీ ఉటో జనా, ఊ ఈ వాత్ కోకన్ ఓర్ చేలా హర్దేలాన్ లక్ మేలేజేనన్, యేసు కోజే వాతేన విశ్వాస్ కీదె.
23ఊ పస్కార్ తేవారేర్ వక్తేమా ఊ యెరూషలేమేమా రజనా, ఓ తేవారేమా ఘణ్ ఆద్మీ ఊ కీదోజకో నిశానేర్ కామ్ దేకన్, ఓర్ ఉంపర్ విశ్వాస్ రకాడె.
24పణ్ యేసు సేన వళక్మేలో జేతి ఊ ఉందేర్ హావాల కిదో కొని. ఊ ఆద్మీర్ దల్ వళక్మేలో.
25జేతి కుణీ వతోయి ఆద్మీర్ కార్ణే ఓన గవాయి దేర్ జరూర్ రకొని.
Селектирано:
John 2: Lambadi
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2025, The Bible Society of India
All rights reserved