मत्ती 5
5
येसुलो डान्डाटा उसिछ्या
लुका ६:२०-२३
1येसुये भ्या मीरंलाई र:ङडे डान्डाटं उपुलुव, होकाम येसु उचुङोपान्ट्रा उसिसरं ओछ्योकं याराव। 2होकाम येसुये उसिसरंलाई ऐवार्डे ओपोयोरं,
भाग्यमानि मीरं
3“आत्मालं करेनेरं भाग्यमानिरं ची,
कडालेकं स्वर्गटा राज्या नोराईज़।”
4सोगो डोनेरं भाग्यमानिरं ची,
कडालेकं नोरं सान्ति डैने लेरं।
5सहिडुनेरं भाग्यमानिरं ची,
कडालेकं नोराई प्रिठीबीलं अढिकार डैने लेरं।#भजनरं ३७:११
6सहि ये:न डोनेलो लागिटं आतिनेरं भाग्यमानिरं ची,
कडालेकं नोरं सोन्टोको टानेलेरं।#यसैया ५५:१-२
7डया डोनेरं भाग्यमानिरं ची,
कडालेकं नोराई डया डैने लेरं।
8यायुङ चोखो लेवरं भाग्यमानिरं ची,
कडालेकं नोराई परमेस्वरलाई र:ङने लेरं।
9मीरंलाई मिलैनेरं भाग्यमानिरं ची,
कडालेकं नोरं परमेस्वरलो ओज़ारं टानेलेरं।
10सहि ये:नलो ओलागिटं सहटैसिवनि:नेरं भाग्यमानिरं ची, कडालेकं स्वर्गटा राज्या नोराईज़।
11भाग्यमानिरं ची जे के, मीराई जेलाई ङालागिटं जेबिरोड डोने सोनो डुखं योनेलेरं, ढुटैडे पाङडे जेबिरोडलं स्यान्टै किसिमला माचाव रो: पाङने लेरं। 12हो बेलाकं रेङच्यो, होकाम बनै खुसि टाच्यो, कडालेकं स्वर्गटं घ्योव इनाम डैनेजेले। कडालेकं आव नो मान्टिनावज़ जोस्यानाव जेङाडेङा अगमबक्तारंलाई पनि नोराई ऐझैडेज़ डुखं यायोवरं।
सापी सोनो उज्यालो
मर्कुस ९:५; लुका १४:३४-३५
13जे के प्रिठीबीला सापीरं ची, सापिलो ओडार यामा:खे भने होलाई फरि कैजैडे डारो झैने? नोके पाखाङ लाङडे मीराई याखङये सिडे ख्यानेकाम उरु कडि ओये:नज़ माले। 14जे के प्रिठीबीला उज्यालोरं ची। डान्डाटं झैसिव सहर मामोसिडुये। 15काङ्काये पनि भाङ खाङडे पाठिये माकपो। बुरु ज़ी:मला स्यान्टैरंलाई उज्यालो गटाकं वार्डे भाङलाई डियाटोटं नैसिये। 16ऐझैडेज़ जेसं लेव उज्यालो पनि यहुडीरंकाम उरुका मीराई याङा:कं ओचम्किकं होकाम यहुडीरंकाम उरुका मीराई जे जेडोव चाव ये:न र:ङनेलेरं, होकाम स्वर्गटं लेने जेबाबु परमेस्वरलो ओमहिमा डोनेलेरं।
मोसालो ओन्यामलो ओबारेलं सिछ्या
17मोसाये ओरोयो न्याम सोनो अगमबक्ताराई यासिछ्यालाई फालिम झैने ङाराव वार्ने टासुन्चिच्यो। ङा नो फालिम झैने ङाराव माङ्कची, बुरु पुरा झैने ङारावची। 18कडालेकं डस्साज़ ङा जेलाई हैङाडाच्यो, जोका समं स्वर्ग सोनो प्रिठीबी खेम्डे माना होका समं स्यान्टै रो: पुरा ओम्टाडे कडि रो:टं पनि मोसाये ओरोयो न्यामटा सर्सिव मान्त्रा सोनो ओठोप्लाटाम टोबो पनि घटिने माले।#लुका १६:१७ 19हैजैडेज़ जोये आव आग्यारंलाम स्यान्टै भन्डा आलिज़ालाई मामानिव, होकाम मीरंलाई पनि हेटावज़ पोयोरं, स्वर्गटा राज्यालं हो स्यान्टैराई भन्डा आलिज़ा टानेले। हैजैडे जोये नो आग्यारं मानिव होकाम पोयोरं, हो स्वर्गटा राज्यालं घ्योव टानेले। 20कडालेकं ङा जेलाई हैङाडाच्यो, जेडोव सहि ये:न, मोसालो ओन्याम पैनेरं सोनो फरिसीराई भन्डा भ्या माटाखे भने जोज़ जेडोनि पनि स्वर्गटा राज्यालं नाव जेम्डै।
रिसलो ओबारेलं सिछ्या
21जे जेठोयो ले, “डोङ्का मीरंलाई हैडासिवरं लेव, ‘नङ हत्या टाडो, जोये हत्या डोव, निया ओटाकं होये डन्ड डैनेले।’#बाने २०:१३; न्याम ५:१७ 22हैनि पनि ङा जेलाई हैङाडाच्यो, जोये ओडाज्यु सोनो ओभाइसं रिस डोव होये डन्ड डैने ले, होकाम जोये ओडाज्यु भाइलो उबिज्यात झोयो, हो घ्योव कचरिलं जुवाप याने टाने ले। होसोनो जोये ओभाइलाई ‘नङ मुर्ख ची हैडोव, हो नर्गला मे:लं नाने टानेले।’ 23हैजैडे नङ ठानटं भेटी नचरैकं नभाइलो उयुङलं नबिरोडलं कडि रो: उलिज़्याव नचेटैखे भने 24नभेटी ठानलो ओछ्योकं नै, होकाम नाडे नभाइसं मिलिचिन, होकाम राडे नभेटी चरै।” 25नमिन्ट मुड्डा झाने मीसं अड्डालं ननाकं येमकंज़ मिलिचिन, मानि होये नङलाई निया डोने मीलो उकुइटं सुम्पीसोनोके होकाम निया डोने मीये हाकिमलो उकुइटं होकाम नङ झ्याललं नानेनंले 26डस्साज़, ङा जेलाई हैङाडाच्यो, जे स्यान्टै पैसा जेम्फोया समं होलाम जेम्हाइसिडु।
ब्यभिचार बारेलं सिछ्या
27“जे एटाव पाङसिव जेठोयो ले, ‘नङ ब्यभिचार टाडो।’#न्याम ५:१८; २०:१४ 28हैनि पनि ङा जेलाई हैङाडाच्यो, जोये कोइ मेमालाई र:ङडे ब्यभिचार डोने युङ डोव, होये ङा:डेज़ ब्यभिचार ओडोव टाये। 29हैजैडे वो:रटा नमिलङये नङलाई पाप डोव यापरि:ङसोनोखे भने नोलाई हाइडे ख्या, कडालेकं स्यान्टै नक्याङ नर्गलं नाने भन्डाके नक्याङटं टोबो नमिलंङ मालेव नङलाई चाव टाये।#मत्ती १८:९; मर्कुस ९:४७ 30वो:रटा नकुइये नङलाई पाप डोव यापरि:ङसोनोखे भने नोलाई पल्डे ख्या, कडालेकं स्यान्टै नज्यु नर्गलं ओनाज्याव भन्डाके नक्याङटं टोबो नकुइ मालेव नङलाई चाव टाये।”
ज्यारि भासिने बारेलं सिछ्या
मर्कुस १०:११-१२; लुका १६:१८
31“ऐटाव पनि हैवार्सिवले, ‘जोये ओज्यालाई रा:व होये नोलाई भर्पाइ सर्डे ओयोवकं।’#न्याम २४:१-१४; मत्ती १९:७; मर्कुस १०:४ 32हैनि पनि ङा जेलाई हैङाडाच्यो, जोये ओज्यालाई ब्यभिचार काम उरु कारनये रा:व नोये होलाई ब्यभिचार डोने झोयो, होकाम जोये हो रा:सिव मेमासं बिहेँ डोव, होये पनि ब्यभिचार डोवये।”#मत्ती १९:९; मर्कुस १०:११,१२; लुका १६:१८; १कोरन्ठी ७:१०-११
किऱ्या झाने बारेला सिछ्या
33“डोङका मीरंलाई हैडासिवरं रो:, हो जेलाई ठाज़ ले ‘ढुटैडे किऱ्या टाझाच्यो। होकाम स्यान्टैराई भन्डा घ्योव प्रभुसं डोसिव किऱ्या पुरा झैच्यो।’#न्याम २३:२१ 34हैनि पनि ङा जेलाई हैङाडाच्यो, किऱ्या झावज़ टाझाच्यो। स्वर्गलो उमिन्ट किऱ्या टाझाच्यो, कडालेकं नो के परमेस्वरलो उसिहासन ची। 35प्रिठीबीलो उमिन्ट किऱ्या टाझाच्यो कडालेकं नो के परमेस्वरलो ओखङ नैने पो ची, यरुसलेमलो उमिन्ट किऱ्या टाझाच्यो, कडालेकं नो राजाराई पनि याराजालो ओसहर ची। 36नङै:ट नकुइ नैडे किऱ्या टाझा, कडालेकं नङै:टा टोबो चेमलाई मोलो झैने सै पलाङो नङ नम्झैडु। 37जे जेपाङ ‘हो’ याटाखे भने ‘हो,’ ‘माङ्क’ याटाखे भने ‘माङ्क’ ओटाकं। आकाम भ्या के सैतानङाम राये।”
बडला रैने बारेलं सिछ्या
लुका ६:२७-३६
38“जे जेठोयोज़ ले, एटाव हैवार्सिव लेव, ‘मिलङलो ओपोलं मिलङ, सोनो हालो ओपोलं हा।’#न्याम १९:२१ 39हैनि पनि ङा जेलाई हैङाडाच्यो, डुस्टरासं समं-समं टाझैसिच्यो। जोये वो:रटा नबाङलाटं पो:ड्याने, होलाई टङटा नबाङला पनि ठाङड्यो। 40कोइ मीये नडौरा लाङने वार्डे मुड्डा याझावखे भने, होलाई नबरकी पनि यो। 41कोइ मीये नङलाई टकिलोमिटंर बाने कर याडानोखे भने, होसं नेकिलोमिटंर नाङन। 42नङसं नि:नेलाई यो, नङ लेवकं रिन हाइरिनेलाई माले हैटाडो।”
नसुतंरलाई मया डो
43“जे एटाव हैवार्सिव जेठोयोले, ‘नछिमेकीलाई मया डो, होकाम नसुतरलाई हेला र:ङ।’#लेबी १९:१८ 44हैनि पनि ङा जेलाई हैङाडाच्यो, जेसुतरलाई मया डोच्यो, होकाम जेलाई डुखं यानेराई यालागिटं प्रार्ठना डोड्याच्योरं। 45होकाम जे स्वर्गटा लेने जेबाबुलो ओज़ारं टानेजेले। परमेस्वरये सहि सोनो पापी नेबऱ्याङलाईज़ निमीये उज्यालो झैड्योवनि, होकाम चाव ये:न डोने मी सोनो माचाव ये:न डोने नेबऱ्याङलाईज़ नमं सवाड्योवनि। 46कडालेकं जेलाई मया डोनेरंलाईयाज़ मया जेडोरंखे भने जे कडि इनाम जेडैके ड? हो के सिरमा डुप्नेराई पनि हैज़ मालेरं डोरो? 47जे जेडाज्यु भाइरंलाईयाज़ यामान जेडोड्योरंखे भने उरुकारं भन्डा भ्या कडि जेडोखे ड? परमेस्वरलाई मासरे:नेराई पनि हैज़ मालेरं डोरो? 48हैजैडेज़ स्वर्गटा लेने जेबाबु स्यान्टै रो:टं ठीकं ओलेव मान्टि जे पनि स्यान्टै रो:टं ठीकं टाव परिये।”
Селектирано:
मत्ती 5: NTWMK25
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025