Yawhaas 8
8
Tuz Puj Kwg Ntxaz Hluas Nrawg
1Tadsis Yexus nce muz tu pes Roos txibntoo Roj liad. 2Hnoos tod qaas thaws pud keb txoog Yexus rob qaas luz tu hub lus Tuadtseb. Muaj neeg coos coos tuaj cuag niz, ces niz nyos twsywd has qha cud. 3Cob xisfws kwg qha Vaajtswb txuj Kebcai has cob Falixais txiad coj is tug puj kwg cud ntez taw thaws niz taastod ntxaz hluas tuaj cuag Yexus, cud coj tuz puj qhai tuaj siab taasmeeg tuadtxhij. 4Cud has tu Yexus has tas, “Xisfws, muaj neeg ntez taw tuz puj na thaws niz taastod ntxaz hluas. 5Mawxes txuj Kebcai qha tu pes has tas, pes yiadtsud muas poszes ntaws tuz neeg kwg ua txhud ni tuz puj na kuas tuag. Yog ni qhai, nuad koj yiad has nyaab?” 6Cud has ni na yog cud nrhab luz nkawg Yexus, kuas cud txiad lad txid taw tu Yexus. Tadsis Yexus txiad nyo has xuas ntibtez saw hub aab. 7Thaws kwg cud tseed siab qhob qhai has noog Yexus, Yexus txiad tsaa haw hlo has has tu cud tas, “Mej cob kwg nyos qhais na, yog tuz twg yeej tsi taw ua txhud ni, tuz qhai ca ni muas poszes ntaws tuz puj na ua ntej.” 8Ces Yexus rob nyo has xuas ntibtez saw hub aab kua. 9Thaws cud hnob Yexus has ni qhai, cud tuadtxhij nyaz txiad tsib nyaz muz liad, cob lawg tsib ua ntej. Tsuas tshuab Yexus has tuz puj kwg tseed siab qhai Yexus hawb ntej nyaz. 10Yexus tsaa qhobmuag nuad has has tu tuz puj qhai has tas, “Cud kua twg taaz liad? Tsi muaj tuz twg raw txid tu koj los?”
11Tuz puj qhai tes has tas, “Tuz Tswb, tsi muaj tuz twg ni.”
Yexus has tas, “Kud yiad tsi raw txid tu koj has. Koj ca ni muz tseb, has tsi xod ua txhud ntxib liad.”]#8.11 Ntaw phaw qus has ntaw phaw kwg xus txhais liad, tsi muaj cob luz kwg nyos hub (7.53—8.11) na; lwd phaw mas muaj nyos tod qaas Yhs 21.24; lwd phaw mas muaj nyos tod qaas Luk 21.28; is phaw qus nyos tod qaas Yhs 7.36.
Yexus Yog Qhob Kaaj tu Neeg Ntajtes
12Yexus rob has tu cob Falixais has tas, “Kud yog qhob kaaj tu neeg ntajtes. Tuz kwg rias kud qaas yiad tsi tawg txuj keb kwg tsaws ntuj nti, tadsis niz yiad taw lus neej tshaab ntuj nrig.”
13Cob Falixais has tu Yexus has tas, “Tej luz kwg koj has ko, yog koj rob ua koj tuz tidkhiab nyaz; koj tej luz ko yeej tsi tseedcees daastsi.”
14Yexus tes has tas, “Tsi yog ni mej has, txiad yog kud rob ua kud tuz tidkhiab los tej luz kwg kud has yeej tsees, tu qhob kud paws has tas kud luz qhob twg luz has kud yiad muz qhob twg. Tadsis mej tsi paws xyob kud luz qhob twg luz has kud yiad muz qhob twg. 15Mej txabtxid rias ni neeg lus sas xaab, tadsis kud tsi txabtxid tu tuz twg. 16Tadsis yog kud txabtxid, kud yeej txabtxid tsees, tu qhob tsi yog kud tuas tuz nyaz; tug Vaid tuz kwg txis kud luz, niz yeej nrug kud txabtxid has. 17Ted muaj luz saw ca tu hub mej txuj Kebcai liad has tas, yog muaj os tug ua tidkhiab liad, qhob kwg ostug has qhai yeej muaj tsees tag. 18Kud yeej ua taw kud tuz tidkhiab, has leej Vaid tuz kwg txis kud luz, niz yeej ua kud tuz tidkhiab has.”
19Cud noog Yexus has tas, “Koj vaid nyos qhob twg?”
Yexus tes has tas, “Mej ted tsi paws kud, mej yiad ua nyaab paws kud Vaid. Yog mej paws kud, mej yeej yiad paws kud Vaid has.”
20Yexus has tej luz na thaws niz qha hub lus Tuadtseb, hub chaab kwg tso tej phijxaas raws nyaj, tsi muaj tuz twg ntez Yexus, tu qhob tseed tsi taw txug niz lus sijhiad.
Mej Muz tsi Taw Qhob kud Yiad Muz
21Yexus rob has ntxib tu cud tas, “Kud yiad muz; mej yiad nrhab kud, tadsis mej yiad tuag vid mej tej keb txhud. Qhob kwg kud yiad muz, mej muz tsi taw.”
22Yog ni qhai, cob Yudais tej nudtswb has tas, “Niz has tas qhob kwg niz yiad muz qhai pes muz tsi taw. Tsi yog niz yiad muas niz tua laidtaa los?”
23Yexus tes has tas, “Mej yog neeg ntajtes, tadsis kud luz saw ntuj luz. Mej nyos hub lus ntajtes na, tadsis kud tsi nyos hub lus ntajtes na. 24Ted yog vid ni qhai, kud ha qha tu mej has tas, mej yiad tuag tu mej tej keb txhud. Yog mej tsi ntseeg has tas, ‘Kud Yog tuz kwg kud Yog,’ mej yeej yiad tuag tu mej tej keb txhud.”
25Cud noog Yexus has tas, “Koj yog tuz twg?”
Yexus tes cud has tas, “Kud yog tuz kwg kud ted qha tu#8.25 kud yog tuz kwg kud ted qha tu; lossis Vid nyaab kud ha yiad qha txhua yaad na tu mej? mej thaws chibthiaj luz liad. 26Kud muaj ntaw zaaj kwg has txug mej has txabtxid tu mej. Tuz kwg txis kud luz, niz yog tuz tsees, tej kwg kud qha tu neeg ntajtes, kud tsuas qha rias ni tej kwg niz kuas kud qha nyaz.”
27Cud tsi totaws has tas Yexus qha cud has txug leej Vaid ni. 28Yog ni qhai, Yexus has tu cud tas, “Thaws twg mej muas Neeg Leej Tus dlai liad, mej ha yiad paws has tas ‘Kud Yog tuz kwg kud Yog’; has mej yiad paws has tas kud tsi ua is yaad daastsi rias ni kud lus sas, tadsis kud tsuas has tej kwg leej Vaid kuas kud has nyaz. 29Has tuz kwg txis kud luz yeej nrug kud nyos; niz tsi tso kud tseg is zag ni, tu qhob kud ua txhua yaad rias ni niz lus sas nyad nyaz.”
30Cob neeg kwg hnob Yexus tej luz muaj coos tuz luz ntseeg Yexus.
Qhob Tsees Yiad Tso Mej Kid
31Yog ni qhai, Yexus has tu cob Yudais kwg ntseeg niz has tas, “Yog mej ua rias ni tej luz kwg kud qha, mej ha yog kud cob thwjtid tag. 32Mej yiad paws qhob tsees, has qhob tsees qhai yiad tso mej kig.”
33Cud tes has tas, “Pes tuadtxhij puabtsig yog Anplahaas cob xeesntxwz, has pes yeej tsi taw ua tuz twg qheb ni. Lu luz kwg koj has tas, ‘Mej yiad kig’, yog koj has nyaab?”
34Yexus has tu cud tas, “Kud qha tsees tu mej has tas, tuadtxhij kwg ua txhud puabtsig ua txuj keb txhud qheb. 35Tuz kwg ua lag qheb yeej tsi nrug is tseb neeg nyos muz taaz sidneej, tsuas yog leej tus ha yiad nyos nyaz. 36Yog leej Tus tso mej kig, ces mej yeej yiad kig tag tag ni. 37Kud paws has tas mej yog Anplahaas cob xeesntxwz. Tadsis mej pheej nrhab kud tua laidtaa, tu qhob mej tsi ntseeg tej luz kwg kud qha. 38Kud has rias ni tej luz kwg kud Vaid qha tu kud, tadsis mej ua rias ni tej luz kwg mej vaid qha tu mej.”
39Cud tes Yexus has tas, “Pes vaid yog Anplahaas.”
Yexus has tu cud tas, “Yog mej yog Anplahaas cob minyuas tag, mej yeej yiad ua#8.39 Yog mej yog … mej yeej yiad ua; tej phaw qus has tas Yog mej … ua. mej lus neej is yaad ni Anplahaas lus. 40Kud tsuas qha tu mej rias ni qhob tsees kwg Vaajtswb kuas kud qha nyaz, tadsis mej pheej nrhab kud tua laidtaa. Anplahaas tsi ua ni mej ua. 41Mej ua is yaad ni mej vaid taw ua liad.”
Cud tes has tas, “Pes tsi yog minyuas tsaws, pes muaj tuas leej vaid nyaz, pes vaid yog Vaajtswb.”
42Yexus has tu cud tas, “Yog Vaajtswb yog mej vaid tag, mej yeej yiad hlus kud, tu qhob Vaajtswb yog tuz kwg txis kud luz has nizna kud ted nrug mej nyos qhais na. Tsi yog kud luz kud nyaz, tadsis yog Vaajtswb txis kud luz. 43Ua nyaab mej tsi totaws tej luz kwg kud has na? Mej tsi totaws tu qhob mej tsi xaab noog tej luz kwg kud qha. 44Daag Ntxwgnyoog yog mej vaid, has mej yeej nyad ua rias ni mej vaid lus sas. Txij thaws chibkees luz Daag Ntxwgnyoog yeej yog tuz tua neeg has tsi muaj qhob tseed nyos hos niz, tu qhob niz tsi nyad qhob tsees. Tej luz kwg niz has, niz has daag nyaz, tu qhob niz yeej yog tuz nad daag has niz yog tuadtxhij kwg daag leej vaid. 45Ted yog vid kud qha qhob tsees, mej ha tsi ntseeg kud tej luz. 46Mej cob tuz twg ntez taw kuas kud leez keb txhud? Tej luz kwg kud has, kud yeej has tsees nyaz, ua nyaab mej tsi ntseeg kud? 47Tuz kwg luz qhai Vaajtswb luz yeej noog Vaajtswb luz. Mej tsi yog luz qhai Vaajtswb luz, mej ha tsi noog Vaajtswb lug.”
Yexus has Anplahaas
48Cob Yudais noog Yexus has tas, “Lu luz kwg pes has tas koj yog neeg Xamalis has rawg daas qhai, pes has tsi yog los?”
49Yexus tes cud has tas “Kud tsi rawg daas. Kud yeej fwd kud Vaid, tadsis mej nuad tsi tawz kud. 50Kud tsi taw nrhab meej mod tu kud, muaj is Tuz nrhab kud lug meej mod tu kud has niz yog tuz kwg yiad txabtxid. 51Kud qha tsees tu mej has tas, tuz kwg ua rias ni kud tej luz qha, tuz qhai yiad tsi tuag ni.”
52Cob Yudais has tu Yexus has tas, “Nizna pes paws has tas koj rawg daas liad, Anplahaas los tes tuag, has cob ceb Vaajtswb luz los tes tuag taaz hubtsig liad, tadsis koj tsua has tas tuz kwg coj rias ni koj tej luz qha tuz qhai yiad tsi tuag ni. 53Koj has tas koj tseed ceeg kua pes vaid Anplahaas kwg tes tuag liad has los? Cob ceb Vaajtswb luz cud ted tuag taaz hubtsig liad. Koj tseed khaab has tas koj yog tuz twg?”
54Yexus tes has tas “Yog kud rob qhuas kud nyaz, ceg kud lug meej mod yeej tsi muaj qaashaw daastsi ni. Kud Vaid yog tuz kwg qhuas kud, niz yog tuz kwg mej hu has tas yog mej tuz Vaajtswb. 55Mej yeej tsi paws niz, tadsis kud paws niz. Yog kud has tas kud tsi paws niz, kud yog tuz kwg has daag is yaad ni mej. Tadsis kud yeej paws niz, has kud ua rias ni niz tej luz. 56Mej vaid Anplahaas zoo sas has tas niz yiad pud hnoos kwg kud luz; niz ted pud liad, niz zoo sas heeb ni.”
57Cob neeg Yudais has tu Yexus has tas, “Koj hnoosnyood ted tsi taw muaj tsib cawd xyoos, ua nyaab koj has tas, koj pud Anplahaas?”#8.57 ua nyaab koj has tas, koj pud Anplahaas?; tej phaw qus has tas Anplahaas ted pud koj has los?
58Yexus tes cud has tas, “Kud qha tsees tu mej has tas, ‘Ua ntej tsi taw muaj Anplahaas, ted muaj kud liad.’”
59Cud txiad khiad poszes yiad ntaws Yexus, tadsis Yexus tsib nkawd has tiad hub lus Tuadtseb muz liad.
Селектирано:
Yawhaas 8: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.