Chibkees 12
12
Vaajtswb Hu Anplaas
1Tuz Tswb has tu Anplaas has tas, “Koj ca ni tso koj lus teschias, koj cob kwbtij neejtsaa, has koj vaid lus tseb tseg, has siab keb muz tu nraaz lus teschias kwg kud yiad qha tu koj.#Tez 7.2,3; Hen 11.8 2Kud yiad pus koj muaj xeesntxwz coos, has cud yiad ua is yaad neeg tseedcees. Kud yiad food kooshmoob tu koj, kuas koj lus koos lus npe nyos nto moo lug, has koj yiad ua tu lwd leej lwd tuz taw txais kooshmoob.
3Kud yiad food kooshmoob tu tuz kwg ua zoo tu koj,
Tadsis kud yiad food tsi zoo tu tuz kwg ua phed tu koj.
Has kud yiad food kooshmoob qhais koj muz tu txhua yaad neeg kwg nyos thoos pliaz ntajtes.”#12.3 Has kud … txhua yaad neeg; lossis Txhua yaad neeg yiad thob kuas kud food kooshmoob tu cud is yaad ni kud taw food kooshmoob tu koj liad.#Kal 3.8
4Thaws Anplaas hnoosnyood muaj xyaa cawd tsis xyoos, niz txiad tsib tiad hub lus nroog Halaas rias ni tuz Tswb taw has tu niz liad, has Lawj nrug niz muz. 5Anplaas coj Xalais kwg yog niz tuz puj, has niz tuz tus xeesntxwz Lawj, has taaznrhiab ostug tej cuastaad, ostug tej tusqhe has ntxhais qheb kwg nyos hub lus nroog Halaas, has cud txiad siab keb muz tu nraaz teschias Kana-aas liad.
Thaws cud tsib muz txug tu hub teschias Kana-aas liad, 6Anplaas tawgkeb hub lus teschias qhai luz txug tu qhais tsos ntoo xees hub Mawles kwg yog qhob chia tseedcees hub lus nroog Sekhees. (Thaws lus sijhiad qhai cob neeg Kana-aas tseed nyos hub lus teschias qhai.) 7Tuz Tswb tshwd tu Anplaas pud has has tu niz tas, “Lus teschias na yog lus kwg kud yiad muas pus tu koj cob xeesntxwz nyos.” Ces Anplaas ha tees taw is lus thaaj tu qhais qhob chia qhai tu tuz Tswb kwg taw luz tshwd tu niz pud.#Hen 7.5; Kal 3.16 8Dhaw qhai, Anplaas ha txaab chia muz tu yaab qaastes qhais lus laaj roos kwg nyos qhais lus nroog Npethees saas hnoostuaj has niz tsaa tseb ntaws nyos tu qhais. Lus nroog Npethees nyos saas hnoospoos has lus nroog A-is nyos saas hnoostuaj. Thaws Anplaas nyos qhob qhai, niz tees taw is lus thaaj has pehiad tuz Tswb. 9Ces niz tsib is qho tu is qho, niz ha tsib muz nyos tu teschias Kana-aas yaab qaastes liad.
Anplaas Muz tu Nraaz Teschias Izib
10Lus sijhiad qhai muaj keb tshais nqhes nyos hub teschias Kana-aas, Anplaas ha tsib muz nyos tu nraaz teschias Izib taw is ntus. 11Thaws niz taastod muz yiad txug qhais tuz nridtes muz tu hub teschias Izib, niz has tu niz tuz puj tas, “Kud paws koj yog is tug puj kwg zoo nkawj heeb. 12Thaws cob Izib pud koj, cud yiad has tas, koj yog kud tug puj. Ces cud yiad tua kud laidtaa has tseg koj ca. 13Koj ca ni has tu cud tas, koj yog kud tuz muad nyaz; yog vid muaj koj cud ha yiad tseg kud txuj sa has ua zoo tu kud.”#Chk 20.2; 26.7 14Thaws Anplaas muz dhaw pliaz nridtes tu hub teschias Izib liad, cob Izib pud niz tuz puj zoo nkawj heeb. 15Muaj qeetuz nudtswb pud Xalais zoo nkawj heeb, cud ha muz pab qha tu Falaws, yog ni qhai, lag ha tuaj coj Xalais muz tu hub Falaws lus loog. 16Vid muaj Xalais, Falaws ha ua zoo heeb tu Anplaas has muas yaaj, tshis, nyuj, neez luab, qheb has ntxhuab pus tu Anplaas.
17Tadsis vid Falaws taw coj Xalais muz, tuz Tswb ha tso tej kaas mos phed luz rawg Falaws has cob neeg hub niz lus loog hnyaab heeb. 18Falaws ha tso neeg muz cuag Anplaas has noog niz has tas, “Vid nicaaz koj ua ni na tu kud? Ua nyaab koj tsi qha ncaaj tu kud paws tas, Xalais yog koj tuz puj? 19Vid nicaaz koj ha has tas, niz yog koj tuz muad, has ca kud coj niz muz yuab ua kud tuz puj? Koj tuz puj nyos qhais na, ca ni coj niz has tsib tiad muz!” 20Falaws saadfwd tu niz cob tusqhe, cud ha liab Anplaas tiad hub cud lus teschias, nrug niz tuz puj has coj txhua yaad kwg yog niz tis hubtsig muz.
Селектирано:
Chibkees 12: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.