Mataio 21
21
Kua Ulufale ia Iehu ki Ieluhalema
(Mlk 11.1-11; Luk 19.28-40; Ioa 12.12-19)
1Ka koi āgai atu ia Iehu ma ona hoko ki Ieluhalema, na tau atu ai kilātou ki te kakai ko Petehake i te Mauga o Olive. Mai kinā, na uga ai e Iehu ni hoko e toka lua ke muamua 2ma te fakatonuga e vēnei; “Olo ki te nuku tēnā i mua atu, ma e taunuku atu lava koulua oi koulua kitea he āhini e tau ma tana punua āhini poa i ona tafa. Tatala nā āhini oi kaumai kia te au. 3Ma kāfai he tino e fehili atu oi lea ki ei, ‘Ko te Aliki#21.3 Aliki pe te tino e a ia e fofou mai ki ei’; ma ka ia tuku vave atua kia te koulua ke kaumai.”
4Na tupu te mea tēnei ke taunuku ai te kupu a te pelofeta e vē:
5“Lea ki te kakai ko Hiona,
Kikila, ko te tupu o koutou
e hau kia te koutou!
E loto maulalo ma e tiketike i luga o he āhini
ma i luga o he punua āhini poa,
te punua a he āhini.” #Hkl 9.9
6Oi na olo ai nā hoko, kua fai e kilāua nā mea e vē ona fakatonu ai kilāua e Iehu. 7Kua kaumai e kilāua te āhini ma tana punua āhini poa, ma tuku o lā kofutatao ki luga, oi na hopo ai ki luga ia Iehu. 8E tokalahi te kaifenua kua fola o lātou kofutatao ki luga o te auala, ka ko iētahi kua tatipi mai e kilātou nā lālā lākau ma fola ki luga o te auala. 9Ko te kaifenua nae hāvavali i mua o Iehu, ma kilātou nae mulimuli mai i ona tua, kua taufai kālalaga, “Ke vīkia te Ataliki o Tavita! Ke fakamanuia e te Atua ki tē e hau i te igoa o te Aliki. Ke vīkia te Atua!” #Hal 118.25-26
10I te pa atuga o Iehu ki Ieluhalema, na vevehi lahi lele te kakai kātoa ma kua lea vē nā tino, “Ko ai te tino tēnei?”
11“Ko te pelofeta tēnei ko Iehu, mai Nahaleta i Kalilaia,” kua tali vē mai te kaifenua na ōmamai fakatahi ma Iehu.
Kua Fano ia Iehu ki te Mālumalu
(Mlk 11.15-19; Luk 19.45-48; Ioa 2.13-22)
12Oi na fano ai ia Iehu ki loto o te Mālumalu ma na tuli uma e ia ki fafo nā tino nae fai a lātou fefakatauakiga koloa i loto. Kua tafuli ki lalo e ia nā laulau a nā tino huitupe, ma nā nofoa o nā tino fakatau lupe, 13ma na lea vē atu ai ia kia te kilātou, “E tūhia i nā Tuhituhiga Paia, ko te Atua na vāgana, ‘Ko toku Mālumalu ka takua he fale tatalo.’ Kae e fai e koutou ma ana o tagata kaihohoa!” #Iha 56.7; Iel 7.11
14Oi na ōmamai ai nā tāuaho ma nā pipili kia te ia i te Mālumalu, ma na fakamālōlō ai kilātou e ia. 15Kae i te kiteaga e nā ohitāulaga pule ma nā faiākoga o te Tūlāfono, nā mea ofōfogia a Iehu kua fai, ma tamaiti nae taukālalaga i loto o te Mālumalu, “Ke vīkia te Ataliki o Tavita,” oi na lagona ai e kilātou te ita. 16Ma na lea vē atu ai kilātou kia Iehu, “E kē lagona atu nā mea e lea ai nā tamaiti?”
Na tali mai ia Iehu, “E kō lagona. Kae e hēki faitau lele nei koutou ki te tuhituhiga paia e lea mai? ‘Mai gutu o nā pepe ma tamaiti kua kē hāunia ai nā vīkiga mo koe.’ ” #Hal 8.2 (LXX)
17Oi na fano kehe ai ia Iehu mai ia te kilātou, kua fano ki fafo o te kakai ki Petania, ma ko kinā na mālōlō ai i te pō.
Kua Fetuku e Iehu te Mati
(Mlk 11.12-14, 20-24)
18Kua toe foki ifo ia Iehu ki te kakai i te tāeao alafaki, ma na lagona e ia te fia kaia. 19Na ia kitea atu he mati i tafa o te auala, oi na fano ai ki ei; kae kua nā ko nā lau oioti te iei. Oi na lea vē ai ki te lākau, “Ko koe e hē toe fua lele.” I te taimi lava tēnā na mamago ai ma mate te mati.
20Kua kitea e nā hoko te mea tēnei, oi na ofo lahi lele ai kilātou ma lea vē, “Na mafai vēhea nei ke vave mamago ma mate te mati?”
21Na tali atu ia Iehu, “E lea atu au kia te koutou, kāfai koutou e talitonu ma hē māhalohalo, e mafai e koutou oi fai te mea na fai e au ki te mati. E hē gata i tēnā, e mafai foki e koutou oi lea atu ki te mauga tēnei, ‘Fakamahiki ki luga oi togi ki te tai,’ ma ka vēnā lava ona fai. #Mat 17.20; 1 Kol 13.2 22Ma ko ho he mea lava e gogō atu ai koutou i te tatalo, ka vēnā lava ona maua e koutou, kāfai koutou e talitonu.”
Ko te Fehili e Uiga ki te Pule a Iehu
(Mlk 11.27-33; Luk 20.1-8)
23Kua toe foki mai ia Iehu ki te Mālumalu; ma ka koi akoako atu ia ki tagata, kae ōmamai nā ohitāulaga pule ma te kau toeaina kua fehili vē mai ki ei, “E a ai te pule e fai ai e koe nā mea iēnei? Ko ai te na ia fōki atua kia te koe te pule tēnei?”
24Na tali atu ia Iehu kia te kilātou, “Ka fehili atu foki la au, ma kāfai e tali mai koutou, oi ka taku atu ai foki e au pe a ai te pule e fai ai e au nā mea iēnei. 25Ko te pule a Ioane na fai ai tana papatihoga na hau mai fea: na hau mai te Atua pe mai tagata?”
Kua kāmata oi fai fīnauga kilātou ma lea vē tētahi ki tētahi, “Kāfai kitātou e lea, ‘E mai te Atua,’ ka lea mai nei kia te kitātou, ‘Heā la te hēki talitonu ai koutou kia Ioane?’ 26Kae kāfai kitātou e lea, ‘E mai tagata,’ ko kitātou foki e mātataku i he mea e ono fai e nā tino, auā e talitonu uma kilātou, ko Ioane ko he pelofeta.” 27Oi na tali atu ai vēnei kilātou kia Iehu, “E hē kimātou iloa.”
Oi na vāgana atu ai ia Iehu kia te kilātou, “Ka hē kō taku atua foki la kia te koutou, pe a ai te pule e kō faia ai nā mea iēnei.”
Ko te Talafakatuha o nā Ataliki e Toka Lua
28“Heā nei he koutou manatu? Nae iei he tamana ma ona ataliki e toka lua. Kua fano te tamana ki tona ataliki matua ma lea vē ki ei, ‘Toku ataliki, fano oi galue i te tōvine i te aho nei.’ 29Kua tali mai tona ataliki, ‘Ko au e hē fano.’ Kae mulimuli ake, kua toe hui tona māfaufau ma na fano ai oi galue. 30Oi fano ai foki te tamana ki tētahi ona ataliki ma lea vēnā foki ki ei. ‘Io kua lelei toku tamana,’ kua tali atu vēnā te ataliki, kae mulimuli ake e hēki fano. 31Ko ai o te toka lua tēnei na fai e ia te mea na fofou ki ei to lā tamana?”
“Ko te tino matua,” kua tali mai kilātou.
Oi na vāgana atu ai ia Iehu kia te kilātou, “Ko au e lea moni atu kia te koutou, ka muamua oi olo nā aolāfoga ma fafine talitāne ki te Mālō o te Atua, i lo koutou. 32Auā na hau ia Ioane te Papatiho kia te koutou ma fakahino atu te ala tonu ke hāvavali ai, kae e hēki mafai koutou ke talitonu kia te ia; kae na talitonu nā aolāfoga ma fafine talitāne. Na kitea foki lava e koutou te mea tēnei, kae e hēki toe hui ai outou māfaufau mulimuli, ma talitonu kia Ioane.” #Luk 3.12; 7.29-30
Ko te Talafakatuha o nā Nofolihi i te Tōvine
(Mlk 12.1-12; Luk 20.9-19)
33Oi na lea atu ia Iehu, “Fakalogo mai ki tētahi talafakatuha. E iei he tino na fano oi totō he tōvine e o ia. Kua ati fakatāmilo e ia he pa, ma keli he pū mo te fātānoa tatau fuāvine, ma fau he fale ke leoleo ai te tōvine. Oi na tuku ai e ia te tōvine ke lihi e ni nofolihi, kae kua fano i hana malaga ki hētahi atunuku. #Iha 5.1-2 34Kua pa ki te taimi e tau ai te tōvine, oi na uga ai e ia ana kaukauna ki nā nofolihi, ke kaumai tona vāega o te helehelega. 35Kua puke e nā nofolihi nā kaukauna ā ia ma kini tētahi, tāmate tētahi, kae fetogi tētahi. 36Ma na toe uga ai e ia iētahi kaukauna e toka lahi atu i lo nā kaukauna na uga muamua, ma na toe fai foki e nā nofolihi ki nā kaukauna iēnei te mea na kilātou faia ki nā kaukauna muamua. 37Mulimuli ake, na uga e ia tona ataliki ma na vē ifo i tona loto, ‘E tatau lava ke amanakia e kilātou toku ataliki’ 38Kae i te kitea atuga e nā nofolihi te ataliki, na lea vē ai tētahi ki tētahi, ‘Ko te ataliki tēnei o te tino e o ia te tōvine. Ōmamai tātou olo oi tāmate ma ka maua ai e kitātou tona fenua!’ 39Oi na puke ai e kilātou te ataliki, kua togi ki fafo o te tōvine ma tāmate.”
40Oi na fehili atu ai ia Iehu vēnei, “Kāfai la te tino e o ia te tōvine e hau, heā nei ta ia e ono fai ki nā nofolihi?”
41Na tali atu kilātou, “E mautinoa lava ka tāmate e ia iēnā tino agahala, oi lihi ai te tōvine ki ni iētahi nofolihi e mautinoa e kilātou totogi akea tona vāega, i nā taimi o te helehelega.”
42Oi na vāgana atu ai ia Iehu kia te kilātou, “E hēki faitau nei koutou ki nā tuhituhiga paia e lea mai:
‘Ko te fatu na tīaki e nā faufale e hē aogā
kua kavea ma fatu e pito hili ona tāua.
Ko te mea tēnei na fai e te Aliki;
kai te mānaia i te kikila ki ei.’ ” #Hal 118.22-23
43-44Kua toe vāgana atu ia Iehu, “Ko te mea ia e lea atu ai au kia te koutou, ko nā fakamanuiaga e maua mai i te pule a te Atua ka kave kehe mai ia te koutou, ma fōki ki nā mālō e kilātou faia te finagalo o te Atua.”#21.43-44 Ko iētahi tuhituhiga e fakaopōpo ki ei te fuaikupu 44: Ma ko ai lava e pakū ki luga o te fatu tēnei, ka tipi likiliki tona tino; ma kāfai te fatu e pakū ki luga o he tino ka nuti momoia lele te tino tēnā Kikila ki te Luk 20.18
45I te lagonaga e nā ohitāulaga pule ma te kau Falehaio nā talafakatuha a Iehu, oi na iloa ai e kilātou ko nā talafakatuha e fakatatau ake kia te kilātou, 46ma na taumafai ai loa kilātou ke puke ia Iehu. Kae nae mātataku i te kaifenua, auā ko nā tino nae talitonu ko Iehu ko he pelofeta.
Селектирано:
Mataio 21: TOKU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bible Society New Zealand Charitable Trust