Mataio 20
20
Ko nā Tino Gālulue i te Tōvine
1Kua toe vāgana atu ia Iehu, “Ko te Mālō o te lagi e fakatuha vēnei. E iei he faitōvine na uhu i te tāeaopō, oi hakili ni tino ke gālulue i tona tōvine kae totogi. 2I te mauaga o he māliliega fakatahi ma nā tino faigāluega ke ia totogia kilātou i te totogi māhani, e fokotahi te tupe hiliva i te aho, oi na uga ai e ia ke gālulue i tona tōvine. 3Na toe fano ki te māketi i te iva i te tāeao, ma na toe kitea ai foki e ia iētahi tino e tutū tauānoa e hēai ni a lātou mea e fai. 4Oi na lea vē atu ai kia te kilātou, ‘Olo oi gālulue i te tōvine kae totogi koutou e au i te totogi e fetaui.’ 5Oi na olo ai nā tino oi gālulue. Na toe fai foki e ia te mea tēnei i te hefulu lua ma i te tolu i te afiafi. 6Kua tāli ta te lima oi na toe fano ai foki ki te māketi, ma na ia kitea ai iētahi tino koi tutū lava i kinā. Oi na lea vē atu ai kia te kilātou, ‘Heā te tutū tauānoa ai koutou i kinei i te aho kātoa e hēai ni mea e faia?’ 7Na tali mai nā tino, ‘Auā e hēai he tino e fofou ke fakafaigāluega e ia kimātou.’ Oi na lea atu ai te faitōvine, ‘Olo la oi gālulue i te tōvine.’
8“Kua pa ki te afiafipō, oi na lea atu ai te faitōvine ki te pule o te kau faigāluega, ‘Fakamāopōpo mai loa te kau faigāluega ma fōki ki ei o lātou totogi. Totogi muamua nā tino na kāmata mulimuli, oi fātoā totogi ai nā tino na kāmata muamua.’ #Lev 19.13; Teu 24.15 9Ko nā tino na kāmata gālulue i te lima na totogi i te taki tahi tupe hiliva. 10Kua pa nei ki te taimi e totogi ai nā tino na gālulue muamua, oi na ōmamai ai ma o lātou manatu e lalahi atu o lātou totogi ka maua; kae na taki tahi foki ia tupe hiliva na totogi ai kilātou. 11Kua kave o lātou totogi ka kua kāmata oi mūimui e kilātou te faitōvine. 12Kua lea vē kilātou, ‘Ko nā tino na gālulue mulimuli e fokotahi oioti te itūlā na gālulue ai, ka ko kimātou iēnei na gālulue i te aho kātoa i te vevela o te lā—kae kua fakatutuha e koe o lātou totogi ma kimātou!’
13“Na tali atu te faitōvine ki hētahi o kilātou, ‘Te uho, fakalogo mai koe. E hēai haku mea piko kua fai kia te koe. E hēki mālilie fakatahi nei ki tāua ke totogi koe i te totogi māhani e fokotahi te tupe hiliva i te aho? 14Kave la tō totogi ma fano ki tō kāiga. Ko te mea e fofou au ki ei, ke tutuha te mea e fōki e au ki te tino na galue mulimuli, ma te mea e fōki atu e au kia te koe. 15E hē ia te au nei te pule ke fakaaogā ai aku tupe ki te mea e fofou au ki ei? Pe ko koe e loto kino auā ia au e kaimakoi?’ ”
16Kua fakauma te akoakoga a Iehu oi na lea vē atu ai, “Ko te mea ia, ko kilātou e mulimuli ka kavea ma muamua, ka ko kilātou e muamua ka kavea ma mulimuli.” #Mat 19.30; Mlk 10.31; Luk 13.30
Ko te Fakatolu oi Tautala ia Iehu e Uiga ki Tona Mate
(Mlk 10.32-34; Luk 18.31-34)
17Ka koi malaga atu ia Iehu āgai ki luga ki Ieluhalema, na fakamāopōpo mai ai e ia ona hoko e toka hefulu lua nā ko kilātou, ma na tautala atu ai ki ei kae hāvavali fakatahi i te auala. 18Na lea vēnei atu ia kia te kilātou, “Kikila, ko kitātou e olo ki Ieluhalema. Ko kinā ka tukulima atu ai te Ataliki o te Tagata ki te pule a nā ohitāulaga pule ma nā faiākoga o te Tūlāfono. Ka kilātou fakahalagia ia i te oti, 19ma tukulima atu ki tagata nukukehe, ma ka fakatauemu kilātou kia te ia, ma kini, ma fakahātaulo; ma ka toe fakatū mai ai ia i te oti, i tona tolu o aho.”
Ko te Talohaga a he Mātua
(Mlk 10.35-45)
20Oi na hau ai te mātua o nā ataliki o Hepetaio kia Iehu, fakatahi ma ona ataliki, kua tōtuli i mua o Iehu ke lea atu ki ei i he mea e fofou ia ki ei.
21“Heā te fofou koe ki ei,” na fehili atu ki ei ia Iehu.
Na tali mai te fafine, “Takutino mai kō kia te au, kāfai e pa mai tō Mālō, ko oku ataliki iēnei e toka lua, ka fakanofo e koe tētahi i tō itū taumatau, ma tētahi i tō itū tauagavale.”
22Kae na tali atu ia Iehu ki nā ataliki, “E hē koulua iloa te mea tēnā e lea mai ai koulua. E koulua mafaia moni oi inu ki te ipu o nā puapuagā ka inu e au?”
Na tali mai kilāua, “E ki mā mafaia.”
23Oi na lea atu ai ia Iehu kia te kilāua, “E moni ko koulua ka inu ki taku ipu, kae e hē ia te au te pule e filifili ai pe ko ai te ka nofo i toku itū taumatau ma toku itū tauagavale. Ko nā nofoaga iēnei e mo kilātou kua filifilia e toku Tamana ke nonofo ai.”
24I te lagonaga e iētahi hoko e toka hefulu e uiga ki te mea tēnei, oi na feita lahi lele ai ki te uho e toka lua. 25Oi na fakamāopōpo uma mai ai e Iehu ona hoko, ma na lea vē atu ai kia te kilātou, “E koutou iloa ko nā tupu o nā mālō o tagata nukukehe, e pūlea fakamālohi e kilātou ia tagata, ma ko o lātou takitaki, e kātoatoa te lātou pule. #Luk 22.25-26 26Kae ko koutou e hē vēnā; ko ai lava o koutou e fia kavea ma pule, e tatau te tino tēnā ke fai ma kaukauna ki iētahi o koutou; #Mat 23.11; Mlk 9.35; Luk 22.26 27ma ko ai lava o koutou e fia kavea ma muamua, e tatau te tino tēnā ke fai ma tāvini a iētahi tino— 28e vē ko te Ataliki o te Tagata, e hēki hau ke kaukauna ake ia tagata kia te ia, kae na hau ke kaukauna ki tagata ma tuku atu tona ola ke togiola ai ia tagata e tokalahi.”
Kua Fakamālōlō e Iehu nā Tāuaho e Toka Lua
(Mlk 10.46-52; Luk 18.35-43)
29I te olo kehega o Iehu ma nā hoko o ia mai Ieliko, na mulimuli atu kia te kilātou he kaifenua tokalahi. 30E toka lua ia tamāloa tāuaho nae nonofo i tafa o te auala. I te lagona atuga e kilāua ko Iehu kua kui mai i te mea nae iei kilāua, oi na kāmata ai oi tau kālalaga vē atu ki ei, “Te Ataliki o Tavita, alofa mai kō kia te kimāua!”
31Kua munaia e te kaifenua te toka lua, ma lea ki ei ke nahe piha, kae na ātili ai te tau kālalaga leo lahi vē atu o kilāua, “Te Aliki, te Ataliki o Tavita, alofa mai kō kia te kimāua!”
32Oi na tū ai ia Iehu ma kalaga vē atu ki te toka lua, “Heā te fofou koulua ke kō faia mo koulua?”
33Na tali mai kilāua, “Te Aliki, ko kimāua e fofou ke fakapupula e koe nā mata o kimāua.”
34Na lagona e Iehu te alofa kia te kilāua ma na tago ai ki o lā mata; ma ko te taimi lava tēnā na mafai ai ke kitea e o lā mata, oi na mulimuli ai kilāua kia Iehu.
Селектирано:
Mataio 20: TOKU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bible Society New Zealand Charitable Trust