Mataio 12
12
Ko te Fehili e Uiga ki te Hāpati
(Mlk 2.23-28; Luk 6.1-5)
1I te taimi tēnā, ko Iehu ma nā hoko o ia nae hāvavali kuiloto o he togā haito i te aho Hāpati. Na fia kakaia nā hoko o ia, oi na kāmata ai kua tau e kilātou nā uluhaito ma kai nā fuāhaito.#Teu 23.25 2I te kitea atuga e nā Falehaio o te mea tēnei, oi na lea atu ai kia Iehu, “Kikila, e fakahā i te tātou Tūlāfono, ke fai e nā hoko o koe te mea tēnei i te Hāpati!”#12.2 Hāpati Ko te faiga māhani, e fakataga nā tino ke tau nā ulu haito oi kai, kāfai e pili ki te auala e hāvavali ai. Kae i te kikila a nā Falehaio, ko te tau o nā ulu haito ko he gāluega, ma e hē tatau ke fai i te Hāpati
3Na tali mai ia Iehu, “E hēki faitau nei koutou ki te mea a Tavita na fai, i te mauaga i te fia kaia, ko ia ma kilātou nae fakatahi ma ia:#1 Ham 21.1-6 4i te fanoga ki loto o te fale o te Atua, ma kai nā falaoa kua uma te fakapaia mo te Atua? E fakahā i te Tūlāfono ke kakai kilātou ki ei—nā ko nā ohitāulaga oioti te nae fakataga ke kakai ki ei.#Lev 24.9 5Pe hēki faitau nei koutou ki te Tūlāfono a Mohe e lea mai, i Hāpati uma lava, ko te tūlāfono o te Hāpati e holi e nā ohitāulaga i loto o te Mālumalu kae e hē hala lele ai kilātou?#Nūm 28.9-10 6E lea atu au kia te koutou, ei kinei te mea e hili atu tona tāua i lo te Mālumalu. 7E lea mai te tuhituhiga paia, ‘Ko te alofa fakahao te fofou au ki ei, kae hē ko nā tāulaga e fai i nā manuvaefa.’ Ānei na iloa e koutou te uiga o te mea tēnei, e hēki koutou fakahalagia nā tino e hēai ni a lātou holitūlāfono; #Mat 9.13; Hoh 6.6 8auā ko te Ataliki o te Tagata, ko te pule ia o te Hāpati.”
Ko te Tamāloa e Mate te Lima
(Mlk 3.1-6; Luk 6.6-11)
9Oi na fano kehe ai ia Iehu mai kinā, ma kua fano ki he hūnako 10nae iei ai he tamāloa nae mate tona lima. Nae i kinā ai foki ma ni tino nae taumafai ke kilātou mōlia ia Iehu i hana holitūlāfono, ma na fehili vē atu ai kilātou kia te ia, “E fakataga i te tātou Tūlāfono ke fakamālōlō he tino i te Hāpati?”
11Na tali mai ia Iehu, “E vēhea kāfai he tino o koutou e iei hana māmoe e pakū ki loto o he lua loloto i te Hāpati? Ka hē tago atu nei koe ki ei oi kavake ki luga!#Luk 14.5 12Kae e hili lele atu te tāua o he tagataola i lo he māmoe! Ko te mea ia, e fakataga i te tātou Tūlāfono ke fehoahoani ki he tino i te Hāpati.” 13Oi na vāgana atu ai ia ki te tamāloa nae mate te lima, “Fakahako atu tō lima.”
Na fakahako te lima o te tamāloa ma na toe lelei ai, kua vē lava ko tētahi ona lima. 14Oi na olo ai te kau Falehaio ki fafo, ma taupulepule ki he faiga ke tāmate ai ia Iehu.
Ko te Kaukauna Filifilia a te Atua
15Kua iloa e Iehu nā taupulepulega kua fai āgai kia te ia, oi na fano kehe ai loa mai te koga tēnā; ma na taumulimuli atu foki kia te ia he kaifenua tokalahi, ma na fakamālōlō ai e ia nā tauale uma lele, 16ma na fakatonu ai e ia kilātou, ke nahe kilātou takua lele ki iētahi tino e uiga kia te ia. 17Na fai e ia te mea tēnei ke taunuku ai te kupu a te Atua na lea ai te pelofeta ko Ihaia;
18 #
Iha 42.1-4 (LXX) “Tēnei taku kaukauna kua kō filifilia,
ko ia te alofa au ki ei, ma e fiafia lahi au kia te ia.
Ka kō tukua toku Agaga ki ona luga,
ma ka fakailoa e ia te faimeatonu ki nā mālō.
19Ka hē tauai kupu lele ia pe taukekē,
pe lāuga leo lahi i luga o nā auala.
20Ka hē ia honafaia nā tino vāivai,
pe fakahāuā ki nā tino kua hēai he fakamoemoe.
Ka ia faia pea lava te mea tēnei ke pa ki te taimi
e manumālō ai te faimeatonu.
21Ma ka i ona luga te fakamoemoe o tagata uma.”
Ko Iehu ma Pelehepulo
(Mlk 3.20-30; Luk 11.14-23)
22Oi na kaumai ai e ni tino kia Iehu he tamāloa nae tāuaho ma gūgū, ona nae ulufia e he tēmoni. Kua fakamālōlō e Iehu te tamāloa, ma na mafai ai te tamāloa ke tautala ma kitea e ona mata. 23Na ofo lele te kaifenua uma ki te mea na fai e Iehu, ma na lea vē ai kilātou, “E hē ko te Ataliki nei tēnei o Tavita?”#12.23 E hē… o Tavita Ko te talitonuga o tagata Iutaia, ko te Mehia e hau mai he lāpuna o Tavita
24I te lagonaga e nā Falehaio o te mea tēnei, oi na tali vē atu ai, “E tuli e ia nā tēmoni ki fafo auā e fōki ki ei e Pelehepulo, te takitaki o tēmoni, te pule ke ia mafaia ai.”#Mat 9.34; 10.25
25Kua iloa e Iehu nā mea i o lātou māfaufau, oi na vāgana atu ai ki ei, “Ho he mālō e fevaevaeaki ma tauai miha lava kilātou, ka hē tūmau mataloa. Ma ho he nuku pe he kāiga e fevaevaeaki ma tauai miha lava kilātou, ka mālepelepe. 26Kāfai la he vāega e tauai miha ma hētahi vāega i te mālō o Hatani, tona uiga kua uma te vāevae vāega ma ka hē mataloa kae mālepelepe! 27Ma kāfai ko nā tēmoni e tuli e au ki fafo i te pule a Pelehepulo, e mai ia te ai la te pule e tuli ai ki fafo nā tēmoni e nā hoko o koutou? Ko nā mea e fai e nā hoko o koutou e fakamāonia ai ko koutou e hehē! 28Hēai, e hē ko Pelehepulo kae ko te Agaga o te Atua te fōki maia kia te au te pule ke tuli ai nā tēmoni ki fafo, ma e fakamāonia ai ko te Mālō o te Atua kua i kinei ia te koutou.
29“E hē mafai he tino ke fano ki loto o te fale o he tamāloa mākeke ke kaihohoa ana mea; heiloga e mua noanoa e ia te tamāloa mākeke, oi fātoā ia mafaia ai oi kaihohoa nā mea uma i tona fale.
30“Ko te tino e hē kau ma au, e teteke kia te au; ko te tino e hē fakaputu ma au, e fakatakape e ia.#Mlk 9.40 31Ko te mea ia e lea atu ai au kia te koutou; ho he agahala pe he kupu kino e mafai ke fakamāgalo, kae ko ai lava e fāifai ki te Agaga Paia, ka hē fakamāgaloa lele ia e te Atua. 32Ho he tino e fai hana kupu e teteke ai ki te Ataliki o te Tagata e mafai ke fakamāgalo; kae ko ai lava e fai hana kupu e teteke ai ki te Agaga Paia, ka hē fakamāgaloa lele ia e te Atua—i te olaga nei pe i te olaga koi hau.#Luk 12.10
Ko te Lākau ma Ona Fua
(Luk 6.43-45)
33“Ke mafai oi fua mai ni fua lelei, e tatau te lākau ke ola lelei; kāfai te lākau e ola kino, ka vēnā foki oi fua mai ai nā fua e kino. E iloa te lākau i nā fua e fua mai ai.#Mat 7.20; Luk 6.44 34Ko koutou e vē ko nā fānau a nā gata—e tautatala vēhea koutou ki ni mea lelei ka ko koutou e kino? Auā e tautala te gutu i nā mea e tumu ai te loto.#Mat 3.7; 23.33; 15.18; Luk 3.7; 6.45 35Ko te tino lelei, e fakaputu i tona loto nā mea lelei e vē ni koloa tāua, ma e tautala i nā kupu lelei mai te lahi o te lelei i tona loto; ko te tino kino e fakaputu i tona loto nā mea kino e vē ni koloa kino, ma e tautala i nā kupu kino mai te lahi o te kino i tona loto.
36“E takutino atu e au kia te koutou, i te Aho o te Fakamahinoga, ka tōlaulau ai e koutou nā kupu hē māfaufau uma na tautatala ai koutou. 37Ko au kupu na tautala ai koe ka toe fakamahino ai lava koe—ka iloa ai pe hala koe pe hēai.”
Ko te Fakatagi mo he Fakailoga Ofōfogia
(Mlk 8.11-12; Luk 11.29-32)
38Oi na lea atu ai iētahi faiākoga o te Tūlāfono ma ni tino o te kau Falehaio kia Iehu, “Te Faiākoga, ko kimātou e fia kikila ki he fakailoga ofōfogia mai te Atua ke fakamāonia ai nā mea e lea ai koe.”#Mat 16.1; Mlk 8.11; Luk 11.16
39Kae na tali mai ia Iehu kia te kilātou, “Kai te kino ma te hē talitonu ki te Atua o tagata o nā aho nei! Ko koutou e lea mai ke fai he fakailoga ofōfogia? Hēai! Oioti lava te fakailoga e fai mo koutou, ko te fakailoga ofōfogia o te pelofeta ko Iona.#Mat 16.4; Mlk 8.12 40E vēia ona i loto ia Iona i te manava o te tafolā i nā ao ma nā pō e tolu, ka vēnā foki oi iei i te loloto o te kelekele, te Ataliki o te Tagata i nā ao ma nā pō e tolu.#Ion 1.17 41I te Aho Fakamahino, ka tutū mai ia tagata o Nineva ma mōlia koutou, auā na liliu kehe kilātou mai a lātou agahala i te kilātou lagonaga o te tālakiga a Iona; ma e lea atu au kia te koutou, kua i kinei he mea e hili atu te tāua i lo Iona!#Ion 3.5 42I te Aho Fakamahino, ka tū mai te Tupu fafine o Heepa ma mōlia koutou, auā ko ia na malaga mamao mai tētahi itū o te lalolagi ke fakalogo ki te poto o te Tupu ko Holomona; ma e takutino atu e au kia te koutou, kua i kinei he mea e hili atu te tāua i lo Holomona! #1 Tup 10.1-10; 2 NT 9.1-12
Ko nā Mea e Kino ka Hili atu te Kino
(Luk 11.24-26)
43“Kāfai he agaga kino e fano ki fafo o he tino, e kui atu i nā kogāfenua mātūtū, ma taukikila ki he mea ke mapu ki ei. Kāfai e hē ia maua he mea, 44oi ka lea vē ai kia te ia lava, ‘Ko au ka toe foki ki toku fale, te mea na hau ai nei au.’ Oi toe foki ai ma maua atu e ia te fale e gāogao ma mamā ma kua toe hāuni lelei. 45Oi fano ai oi kaumai iētahi agaga e fitu e hili atu te kino i lo ia, ma nonofo ai i kinā. E iku ake, kua hili atu te kino lahi o te tūlaga kua pa ia ki ei, i lo te mea nae iei ai muamua. E vēnei foki lava te mea ka pa ki ei nā tino kino i nā aho nei.”
Ko te Mātua ma nā Taina o Iehu
(Mlk 3.31-35; Luk 8.19-21)
46Koi tautala atu ia Iehu ki nā tino kae taunuku mai tona mātua ma ona uho. Kua tutū atu kilātou i fafo kae kave te lātou faifekau kia Iehu ko kilātou e fia faitala ake kia te ia. 47Oi na lea atu ai he tino nae i kinā kia Iehu, “Kikila, ko te mātua ma nā uho o koe e tutū i fafo, e fia faitala atu kia te koe.”#12.47 Ko iētahi tuhituhiga e hē i loto ai te fuaikupu 47
48Na tali mai ia Iehu ki ei, “Ko ai toku mātua? Ko ai oku uho?” 49Oi na tuhi ai tona lima ki nā hoko o ia ma lea vē atu, “Kikila, iēnei oku mātua ma oku uho! 50Ko ai lava e faia te finagalo o toku Tamana i te lagi, ko toku uho tēnā, ko toku tuafafine tēnā ma toku mātua.”
Селектирано:
Mataio 12: TOKU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bible Society New Zealand Charitable Trust