Mataio 11
11
Ko nā Kavefekau mai ia Ioane te Papatiho
(Luk 7.18-35)
1Kua uma te fai e Iehu o nā fakatonuga iēnei ki ona hoko e toka hefulu lua, oi na fano kehe ai ma kinā, kua fano oi akoako ma folafola atu i nā kakai e tafapili ki te koga tēnā.
2I te lagonaga e Ioane te Papatiho i loto o te falepuipui nā mea kua fai e Keliho, oi na uga ai e ia iētahi o nā hoko o ia ke fehili kia Iehu. 3Kua lea atu kilātou kia Iehu, “Ko koe nei te tino na folafola e Ioane e hau, pe e iei hētahi tino e fakatalitali kimātou ki ei?”
4Kua tali mai ia Iehu, “Olo oi taku kia Ioane nā mea e koutou lagona e tautatala ai ia tagata, ma nā mea e kitea e outou mata: 5kua pupula ia mata o tāuaho, kua hāvavali ia pipili, kua fakamamā#11.5 fakamamā Kikila ki te 8.2 kilātou e maua i nā tauale kino o te kili, kua logo ia taliga o tutuli, kua toe fakatutū nā tino na oti, ma ko te Tala Lelei kua folafola ki tagata mātitiva.#Iha 35.5-6; 61.1 6Amutia nā tino e hē māhalohalo mai kia te au!”
7Ka koi olo kehe atu nā hoko o Ioane, kae kua kāmata oi tautala ia Iehu ki te kaifenua e uiga kia Ioane, kua lea vē atu, “I te koutou ologa kia Ioane i te vao, heā te nae fia kikila koutou ki ei? He lau mutia e āgina i te matagi? 8Heā te na olo koutou ke kikila ki ei? He tamāloa e lākei i ni lākei uiga kehe te gali? Ko nā tino e lākei i nā lākei vēnā e nonofo i nā fale o nā tupu! 9Lea mai ake, heā te na olo koutou ke kikila ki ei? He pelofeta? Io e hako, ka ko te tino na kitea e koutou e hili atu tona tāua i lo he pelofeta. 10Auā ko Ioane te fakatatau ki ei te tuhituhiga paia e vē mai: ‘Na vāgana te Atua, ka uga atu e au taku kavefekau ke muamua atu ia te koe, ke ia hāunia te auala mo koe.’#Mal 3.1 11E takutino atu e au kia te koutou, o nā tino kua fānanau mai ki te lalolagi, e hēai he tino e hili atu tona tāua i lo Ioane te Papatiho. Kae ko te tino e pito hili ona hē tāua i te Mālō o te lagi, e hili atu la tona tāua i lo Ioane. 12Mai nā aho na tālaki ai e Ioane tana fekau ke pa mai ki te taimi nei, ko te Mālō o te lagi kua āfāina i nā fakahāuāga,#11.12 āfāina i nā fakahāuāga pe kua āfāina i nā faiga a nā tino e fofou ke fakavae fakamālohi te pule a te Atua ma nā tino fakahāuā e taumafai ke kilātou pukeagia fakamālohi.#Luk 16.16 13Ka ko hēki pa ki te vāitaimi o Ioane, ko te Mālō nae vavaka e te kau pelofeta ma te Tūlāfono a Mohe; 14kāfai e talitonu koutou ki te lātou fekau, ko tona uiga la ko Ioane ko Elia, tēia na vavaka e hau.#Mal 4.5; Mat 17.10-13; Mlk 9.11-13 15Kāfai e iei ni outou taliga, fakalogo mai la!
16“Heā nei te ka fakatuha e au ki ei nā tino o tēnei tupulaga? E vē kilātou ko nā tamaiti e nonofo i te māketi ma e taukālalaga atu tētahi vāega ki tētahi, 17‘Nae ta e kimātou i te fagufagu nā pehe fiafia mo koutou, kae nae hē hihiva koutou! Nae uhu e kimātou nā haumate, kae nae hē faitatagi koutou!’ 18I te hauga o Ioane, nae fakalāina ma hēki inu ki te uaina, kae na lea vē nā tino, ‘E ulufia e he tēmoni!’ 19I te hauga o te Ataliki o te Tagata, nae kai ma inu ki te uaina, oi na lea vē ai nā tino, ‘Kikila ki te tagata tēnei! E kai fakaatuatuvale ma konā i te uaina, he uō a nā aolāfoga ma iētahi tino inohia!’ Ka ko te poto o te Atua e fakaalia te moni, i ana gāluega.”
Ko nā Nuku hē Talitonu
(Luk 10.13-15)
20Ko nā tino i nā kakai nae fai ai te lahiga o nā vāvega a Iehu, na hēki liliu kehe mai a lātou agahala, oi na tautala mālohi ai ki ei ia Iehu ona ko to lātou hē halamō. 21“Heāloa koe Kolahini! Heāloa koe Petehaita! Auā moinei ake nā vāvega na fai i loto o nā kakai o koulua na fai i Tulo ma Haitonu, e vēnei ake ko nā tino i kinā kua leva te fai o lātou kofutaga ma lūlū ki o lātou luga te lefulefu, ke fakailoa ai to lātou halamō.#Iha 23.1-18; Ehk 26.1—28.26; Ioe 3.4-8; Amo 1.9-10; Hkl 9.2-4 22Kae e takutino atu e au kia te koutou, kāfai e pa ki te Aho Fakamahino, ka hili atu te alofa o te Atua ki tagata o Tulo ma Haitonu i lo kia te koutou. 23Ma ko koe Kapenaumi, nae iei nei hō manatu ko koe e mafai ke hiki ake ki luga ki te lagi? Hēai, ko koe ka togi ki lalo ki Heoli. Ānei ake nā vāvega nae fai i loto o koe na fai i Hotoma, e vēnei ake koi tūmau lava ia Hotoma ke pa mai ki te aho nei. #Ken 19.24-28; Iha 14.13-15 24E talitonu mai koutou kāfai e pa ki te Aho Fakamahino, ka hili atu te alofa o te Atua kia Hotoma i lo kia te koutou.”#Mat 10.15; Luk 10.12
Ōmamai kia te Au e Mapu ai Koutou
(Luk 10.21-22)
25I te taimi tēnā, na lea vē ake ai ia Iehu, “Te Tamana, te Aliki o te lagi ma te lalolagi! Ko au e fakafetai atu kia te koe auā kua fakailoa e koe kia te kilātou e hēki akoakogia, nā mea kua kē mumunia mai ia te kilātou e popoto ma kua akoakogia. 26Io, te Tamana, ko te mea lava tēnei na fofou koe ke fai.
27“Kua fōki mai e toku Tamana kia te au nā mea uma lele. E hēai he tino e ia iloa te Ataliki vaganā te Tamana, ma e hēai foki he tino e ia iloa te Tamana vaganā te Ataliki ma kilātou kua filifilia e te Ataliki ke fakailoa ki ei. #Ioa 3.35; 1.18; 10.15
28“Ōmamai kia te au koutou uma e fītatā i nā kavega mamafa, ko au e mapu ai koutou. 29Kave taku amo#11.29 amo He fakaliliuga o te kupu Eleni ko tona uiga, ko te lākau e tuku ki te ua o te pōvi e takitaki ma fakatonutonu ai i nā gāluega e fakaaogā ki ei. Ko te amo ko te fakailoga tēnā o te uhitaki kātoatoa ma te galue mālohi. Kikila ki te Gāl 15.10; Kal 5.1; 1 Tim 6.1 oi tuku ki outou luga ma fakatakitaki mai kia te au, auā ko au e agamalū ma loto maulalo; ma ka maua ai e koutou he mapu.#Iel 6.16 30Auā ko te amo ka fōki atu e au e faigōfie, ko te kavega foki ka fakaeke atu e au ki luga o koutou e māmā.”
Селектирано:
Mataio 11: TOKU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bible Society New Zealand Charitable Trust