К Римлянам 13
13
Қа̄ткылъюки А̄ңўа̄ӷыт Иглыӷутилӷӣт
1Тамаҳаӷми қа̄ткусяҳқа̄гуқ а̄ңўа̄ӷуҳтыканун иглыӷутистынун. Кина алңунак иглыӷутистыңуна̄нӷитуқ ўыткуқун Кияӷныӷым иглыӷутистыңуҳтыстыкумигу. Иглыӷутистыңӯт қаюҳлъяк Кияӷныӷым ныкыхтыкақӣ иглыӷутисқылъюки. 2Китум алңунак қа̄ткынӷилъкумики иглыӷутистыт, қа̄ткигатӣ Кияӷныӷым накмикыхкӣ. Ынка̄м аӷью̄ҳтыслъықуқ. 3Пинитун пикаюгыт аликигатӣт иглыӷутистыт, иўырңа сыӷлытун пикаюгыт аликсяҳқақӣт. Аликсюнӷилъкуфсики иглыӷутистыт, пинитун пикатык, ынка̄м усюқылъықӣси. 4Иглыӷутистыт Кияӷныӷым қыпҳаҳтыкӣ аныӷныҳқылъыҳқаҳпысинун. Иўырңа сыӷлытун пикуфси, аликнакыси, қаюҳлъяк Кияӷныӷым қылӷумӣ аӷью̄ӷысқылъюки сыӷлытун пикат. Кияӷныӷым қыпҳаҳтыкӣ, аӷью̄ӷистыкӣлъю сыӷлытун пилӷӣнун. 5Тама̄кын апалъюқлъюку қа̄ткитыки иглыӷутистыт. Қа̄ткитыки қаюҳлъяк Кияӷныӷмун аӷью̄ҳтысюнӷилңӯси. Иўырңа та̄наңинақ апалъю̄нӷитуқ. Қа̄ткитыки қаюҳлъяк лӣсимакаҳси қа̄ткутылъық ылъқуӷутңа̄қ.
6Та̄куклъю апалъюқлъюкык лъивикақаси налогыси, қаюҳлъяк иглыӷутистыт қыпҳа̄гут Кияӷныӷмун қыпҳақатын пиныӷмыхтыки. 7Ынка̄ңам налогыт асыңыси қамахлъюки лъивикитыки иглыӷутыстыхпысинун. Сӣвакитыкилъю, қӯлваҳтыкилъю қамахлъюки.
Пиниқлъюки Иляси
8Асыңыхпына̄ң китумың алңунак, иўырңақун пиниқылъыҳси асыңыкңинаҳтыху иляхпысинун. Китум алңунак пиниқыхкумики юлгутни қа̄ткыңъўӣ ӣңунӣта Лӣлиҳтӯсят. 9Игақңа̄т Лӣлиҳтӯсяни хўатын:
«Гылгаӷнӣҳпынаң, Юхтаҳпынаң, Тыглыхпынаң, Қилӣқытиқыхпынаң».
Қа̄ткылъықатын та̄кут қылӷусят, алңунаклъю қылӷусят, қа̄ткыхкувгу уна қылӷусяқ:
«Пиниқлъюку юлгутын пиниқылъыҳпытун лъпынун».
10Кина алңунак пиниқикуми юлгутминың, сыӷлытун пина̄нӷитӣ. Пиниқилъыӷмикун қа̄ткутңӯқ ӣңунӣтнун Лӣлиҳтӯсят.
11Тама̄кут пикатыки қаюҳлъяк лӣсимакаҳси пилъыҳқақ ка̄сима̄қ. Қавалӷӣстун аюқуси иўырңа ма̄тын таҳтуӷьяҳқа̄ҳтуси. Югулилъыҳпут туӷа̄ҳтуқ ухпыӷьюха̄лъымнъың. 12Унук алъпагьяҳтуҳтуқ, хўа̄ аҳсяҳтуңыстаӷа̄. Та̄қылътыкиңам атуқныӷмың сыӷлыӷыт югыт пӣқыхкаңит мамлыгми. Ынка̄м тугулътыки пилъюўа̄сиҳқат ниӷугми. 13Пинитун кияҳтылъта катам югыстун кияҳлъыҳӣт ниӷугани аӷныӷым. Сыӷлытун тыӷигниқыфқа̄мта, сю̄мыфқа̄мта, алңунак алңунасыӷафқамта, пилъюўатыфқа̄мта, ақинатыфқа̄мта. 14Итупилъ акулӷа̄ӷыстун а̄тыху Атанық Иисус Христос, сюмыҳтаӷа̄ткыфқӣталъю атуқналюки югусиҳпыси пиюкылъҳит.
Селектирано:
К Римлянам 13: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.