К Римлянам 12
12
Уңувалӷӣт Аҳқутыт
1Ухпықа̄лгутымни, Кияӷнық наңлъыхтапихтутаңаның, ынңа̄талъ кайымамси тӯнысқылъюки югусиси Кияӷныӷмун уңувалӷӣңулюки аҳтутыт. Пылюңилъит, тугуклъиӷьюгнаӷлитлъю Кияӷныӷмун. Та̄наңӯқ манигӯтылъыпихси. 2Ӯм нунам югатун кияҳтыхпынаси. Йыӷлыги Кияӷныӷмун алъяңуҳтыстык нутаҳтыслъюки умьюгаси. Та̄хкын лӣгикылъықаҳси пиюкылъҳа Кияӷныӷым пинилӷӣ, тугуклъиӷьюгналӷӣ, қамахтӣңўа̄ӷңалӷӣлъю.
3Кияӷныӷым тӯныхкақутаңаның тунусямың апостолыңулюңа, тамаҳаҳпысинун пӣңа: Сюмыҳтаӷа̄ткыхпынаси лъпысиның пиниӷатаӷаӷнилюси аюқылъыҳпысиның. Йыӷлыги ипапиҳқылъюси сюмыҳтаӷа̄ткақитык ухпықилъыҳтулыхпысигун Кияӷныӷым тӯныхка̄кун лъпысинун. 4Югусипут налиӷныҳтупихтут, тамаҳаӷми налиӷнық алъятун сяяҳқа̄гуқ. 5Угляӷьяӷңа̄мта, ата̄сигукут Христосым югусӣн. Ынка̄м хўаңкута налиӷныӷни хўаңкунъың пикутукут. 6Қамахлъюта алъякулъҳӣның тунусялгӯкут Кияӷныӷым тӯныхка̄ның наңлъыхталъыӷмикун. Тунусяҳпут уңипақиңукан Кияӷныӷым уңипа̄мың, уңипақилъта ухпықилъыҳтуталымтыстун. 7Тунусяҳпут қыпҳа̄тиңукан, қыпҳа̄тилъта, апыҳтуӷиңукан, апыҳтуӷилъта; 8кайымиңукан илямың, кайымилъта; тӯниңукан, иӷлыхпына̄мта тӯнилъта; иглыӷутиңукан, сягиқлъюта иглыӷутилъта; наңлъыкиңукан, қуякусиқлъюку наңлъыкилъта.
9Пиниқитык ипапиҳқылъюси. Угумиклъюку сыӷлық, пиюкумаңинаҳтыху сяңўа̄ пинилӷӣ. 10Пиниқутутык аңлыгуткулъҳӣстун. Қӯлва̄тутақитык пакихулъюку қӯлвӣсқысюлъыҳпысиның. 11Та̄куңинаҳа̄гның қыпҳаҳтык, иҳсянифқа̄фси. Сягиқулъюку қыпҳа̄тақитыху Атанық қамакын илюхпысиның. 12Қуяңатык қаюҳлъяк сиӷималъылгӯси, нуқытақитык ныкыхмылъюси сыӷлылӣныҳпысини, юӷаӷақитыклъю ӣўлың. 13Ухпықа̄лгутыхпысинун аклъюлӷӣнун тӯнӣқитык, упуӷатӣқитык кинкуның алңунак.
14Юӷа̄ткақитыки амьюқыта̄ткистыси Кияӷныӷмун қуястысқылъюки, нака̄н ақниҳтысқылъюки. 15Қуялгусиӷақитыки тама̄кут қуялӷӣт, қиялгусиӷақитыки тама̄кут қиялӷӣт. 16Кияҳтык ныкыхмытулъюси. Қука̄юхтыхпынаси йыӷлыги илякитыки укаванталӷӣт. Сюмыҳтаӷа̄ткыхпынаси пыҳқинӷунилюси иляхпысиның.
17Китум сыӷлытун пикаңиси, акитыхпынаки сыӷлытун. Пӣқитыки пинилӷӣт тугуклъиӷьюгналӷӣт тамаҳа̄нун. 18Пияҳқа̄кан, пӣқитыху сяңўа̄ пияҳқаҳси кияҳтысқылъюси ныкыхмылъюси тамаҳа̄нун. 19Пиниқыхкамни, акинӣӷнақыхпынаки сыӷлытун пистыси, итупилъ пыхтыки Кияӷныӷым сякша̄лъҳанун. Акузитни Игақыхкани игақңалӷӣ хўатын:
«Хўаңаңӯқ аӷью̄ӷияҳқақ,
хўаңаңӯқ акинӣӷьяҳқақ, пӣқ Атанық».
20Игақңа̄қлъю Акузитни Игақыхкани:
«Аңуягын игата̄ңукан ныӷыснакын,
мықсюгукан мыҳсинакын.
Таўатын пикувгу на̄сқўакун маюҳфикылъықан кумаңалӷӣмың кӯлямың».
21Кая̄лъқыстыхпынаси сыӷлыӷмун, итупилъ кая̄лъқитыху сыӷлық пинитун пилъыҳқун.
Селектирано:
К Римлянам 12: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.