От Иакова 3
3
Улю
1Ухпықа̄лгутымни, алъюлъюси апыҳтуӷистыңуҳтыфқа̄фси Кияӷныӷым Акузитаңаның, қаюҳлъяк лӣсимакаҳси хўаңкута апыҳтуӷистыни нанқихтыңъўа̄ӷатаӷаӷьяҳқа̄гукут. 2Қамахлъюта анахутаӷаныҳтуҳлъяхтукут. Кина алңунак ю̄к акузилъыӷмикун анахусигалңуқ ылъқуӷутңапыста̄ӷӯқ. Югым ылъқуӷутңалӷӣм талўа югусинилъю агӷиткылъюку аюқсяҳқақа. 3Сявикынӷа̄ҳа̄т сянитмун аюқлъюки кӯнит қа̄нӷитнун канаҳтақапут қа̄ткысқылъюта ынка̄м хўаңкута иглыӷутақапут. 4Сюмыҳтаӷа̄ткаҳтыкиқунлъю аңьяҳпахлъягыт; ақӯтасқувыгаҳа̄м қӣфтақӣ аңьялгым пиюкылъҳанун талўа ануқатыҳлъягьяӷңа̄н. 5Улюлъю мыкыста̄ҳа̄гуқ иўырңа а̄ңа̄югныҳлъягӯқ.
Кынҳа̄м уқфилӷутыҳлъягыт кумаҳсяҳқақӣ! 6Улюлъю кынӷыстун аюқуқ. Ыслъықңа̄қ сыӷлыҳқылъыӷмың ынка̄м сыӷлыҳқумалъҳа миңиткаюгӯқ югусимун. Ынка̄м на̄фқӣкаюгӯқ кияҳта̄лъымнъың қаюҳлъяк геенам кынӷан кумаҳтақа̄.
7Алъя̄ҳӣна̄т тыӷикусят, қаўа̄гыт, нымыӷьят, мыӷым тыӷикусӣ қимухтыкаюгӯт, а̄қун югым қимухтақӣ 8иўырңа китум алңунак қимухна̄нӷита̄ улю. Ныклъыгигалңӯгуқ, сыӷлыӷӯқ, ыслъықңа̄қ туқуналӷӣмың ядымың. 9Улю усюқусиқақаҳпут Атанымнъун Атамун. Нақам сыӷлыӷмың ныӷьюхтаӷа̄сиқақаҳпут юлгутымнъун, Кияӷныӷым улима̄ӷитнун лъмисюгнилъюки. 10Усюқилъықлъю, сыӷлыӷмыңлъю ныӷьюхтаӷалъық а̄ныхкаюгӯк ата̄симың қаныӷмың. Ухпықа̄лгутымни, таўатысяҳқа̄нӷисяҳтуқ. 11Пинилӷӣлъю, сыӷлықлъю мық ма̄қыхкаюўа̄к ата̄симың сыңъумың? 12Ухпықа̄лгутымни, смоквам уқфига пӣтыстина̄нӷитуқ маслинымың. Таўатыҳпигақ виноградым лозаңа пӣтыстина̄нӷитуқ смоквамың. Талўа мыҳтаӷвик таӷьюӷнилңуӷмың мықылӷӣ пинилӷӣмың мыӷитуқ.
Пыҳқинылъық
13Кина акулыхпысинита пыҳқинылӷӣ, лӣгикималӷӣлъю? Таўатытылъыни кылгулъигу пинитун кияҳта̄лъыӷмикун, аныӷныҳқилъыӷмикунлъю қусывыгңаӷми. 14Иўырңа илюхпысигун ақинаңакуфсилъю, лъңӣна̄югныӷукуфсилъю иқлъыңиқуткыхпына̄н ипапиҳқылъық, қаӷьялъыҳпысигун лӣсиманилюси. 15Таўатылңуқ пыҳқинылъық қиляхта̄нӷитуқ, нунамың пиңӯқ. Кияӷныӷым Таӷныӷахкының пиңунӷитуқ, туӷныӷаӷмың пиңӯқ. 16Нани алңунак ақиналъылгунӷанилъю, лъңина̄юхлъылгунӷанилъю та̄ўа кипулъхина̄лъылўа̄қуқ, сяңўа̄тлъю алъя̄ҳӣна̄т сыӷлыӷыт таўантақут. 17Иўырңа пыҳқинылъық қиляхтақ кияң пылюңитуқ. Амалъықа ныкыхмытуқ, кавьюгитуқ, малиҳқутақиңа̄қ, наңлъыхтаҳтуқ, пинистаҳӣнатун пикаюгӯқ, танӣлъҳитуқ, юпӣнӷӯқ. 18Ныкыхмылъық пӣтутыстун аюқуқ. Тама̄кут ныкыхмылъыӷмун қыпҳақаюгыт пӣтысиӷаӷақӣт, ынка̄м сяӷна̄қут ылъқуӷңалӷӣмыңлъю, пинилӷӣмыңлъю кияҳта̄лъыӷмыхни.
Селектирано:
От Иакова 3: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.