2е Петра 3
3
Акықусяқ Атанӷым Тагилъыҳқа̄нун
1Илякумта̄мни, укут алӷӣткӣ письмолъыӷма лъпысинун. Тамаҳа̄хкынкун письмолъыӷма нықаңуҳтыснақуткамси лӣсимакыхкаҳпысиның. Сюмыҳтаӷӣсқысюгамси тама̄куның ипапиҳқылъюси. 2Лъпысинун нықамикысюганка аглыӷналӷӣт ӯкналиқистыт ӯкналиқуткыхкӣт. Нықамикысюгақалъю қылӷусяқ Атанымта Югулиӷистым а̄пқа̄ апостолыхпысигун. 3Лӣгикңўа̄ӷьяҳқақаҳси уна: киңулиӷни аӷныӷни лыгасӣӷўаҳтылгуяҳқа̄гуқ; тама̄куңӯт малиҳқутақңалӷӣт сыӷлыӷнун пиюкыхкамыхнун. Лыгасӣӷўа̄ткылъықа̄т Кияӷныӷым акықуся̄, 4хўатын пилъықут: «Иисус акықика̄гуқ тагинқихлъықнилюни. На̄гу? Има сивуныпут туқуляӷа̄тылъҳитның, паниның сяңўа̄ қамахлъюни алмысиқақа̄ нунам пӣнлилъҳаның». 5Накмӣқа̄гут авылӷасиңўа̄ӷналюку уна ипапилъық: ныӷиӷлюку Кияӷныӷым акузитмикун улимакақа̄ қиляга, улимакақа̄лъю нуна мыӷмың, мыҳқунлъю. 6Та̄хкын Кияӷныӷым мыӷмың улывыслъюку нуна на̄фқыхкақа̄. 7Иўырңа та̄хун акузиткун Кияӷныӷым афлъыңакақӣ қилягалъю, нуналъю на̄фқысяҳқа̄люки кыныҳқун. Афлъыңакңӯт кынляңа аӷныӷанун нанқихтилъҳым. Таўанилъю аӷныӷми на̄фқылъықӣ югыт авылӷасиңўа̄ӷикат лъңаның.
8Илякумта̄мни, пуйгухпына̄н уна! Атаныӷми аӷнық ата̄сиқ тысяча аюмиқулъҳыстун аюқуқ, тысяча аюмиқулъҳыт ата̄ситун аӷныҳтун аюқуқ. 9Атанық ыгна̄ңинъыӷитуқ акықусяни пияҳқа̄люку, иляңита югыт сюмыҳтаӷалъҳистун. Йыӷлыги ныкыхмытутақӣси қаюҳлъяк кина алңунак ифлъяюгунӷилъкаңа. Итупилъ тамаҳа̄н ю̄к агўитысқысюгўа̄ сыӷлыҳқылъҳитның.
10Иўырңа Аӷныӷа Атанӷым тагилъықуқ тыглыгнӣҳтытун. Таўани Аӷныӷми қиляга авӣӷусяҳқа̄гуқ ыфтуӷӯтыҳлъягмың. Сяңўа̄т қамахлъютың қилягамылңӯт кынӷым уӷухлъықӣ. Қамахлъютыңлъю нунамылңӯт паныҳлъықут. 11Қамахлъютың тама̄кут уӷугьяҳқа̄таңитның, лъпыси югни натылъыкыстык? Кияҳта̄лъыси пылюңилъит, Кияӷныӷмунлъю аюқлъит, 12утақӣмалюси Аӷныӷанун Кияӷныӷым. Пинақылъҳаҳси қамахлъюку пинитун пӣқитыки аӷнық тагирахкӣӷысқылъюку. Таўани аӷныӷми кынӷым на̄фқылъықа̄ қиляга, ма̄тныӷымлъю уӷухлъықӣ сяңўа̄т қамахлъюки қилягамылңӯт. 13Иўырңа хўаңкута утақӣңӯкут Кияӷныӷым акықусяқыхка̄ның. Пика̄гуқ нутаӷамың қилягаңлъяҳлъықнилюни нутаӷамыңлъю нунаңлъяҳлъықнилюни. Таўани ылъқуӷутңалӷӣңина̄т кияҳлъықут.
14Ынка̄ңам илякумта̄мни, утақӣмалюси таўавык Аӷныӷмун пинақылъҳаҳси қамахлъюку пылюңитыклъю, афкуйӣтыклъю Кияӷныӷым ысҳа̄малъҳани. Ныкыхмытыклъю Лъңани. 15Сюмыӷмикитыху Атанымта нуқытутилъҳа лъпысиның югулилъыңысқылъюси. Пиниқыхкамта ухпықа̄лгутымта Павелым а̄пқақӣ та̄кут ата̄сит письмоӷақңами пыҳқинылъылиӷлюни Кияӷныҳтамың. 16Письмоткыхкақӣ тама̄кут қамахлъюки посланиямикун. Налиӷныӷи Павелым посланияңан лӣгикныҳлъюгӯт. Югыт лӣгикылъыпагилңӯт, ухпықилъыпагилңӯт алъяңуҳтақӣт сямың писӣтаңи посланияңанилңӯт. Таўатынлъю пӣқӣт иляңи Акузитыт Игақыхкат ынка̄м на̄фқыңъӯт лъңитның.
17Илякумта̄мни, лӣсимакутыхпысиның ся̄қутаңи қа̄ткусигалңӯт лӣлиҳтӯсянун, кылыңатык. Аӷуляқутыстыхпынаси анахутңалӷӣнун апыҳтуӷилъҳитнун. Таўатын пикуфси малӷуклъина̄нӷитуси ухпықыхкаҳпысиның. 18Иўырңа нагныҳтык ўатақа̄ӷақ лӣсимаклъюку Иисус Христос, Атаныҳпут, Югулиӷистывут, нагныҳтыклъю ўатақа̄ӷақ пиниқылъҳакун. Ынка̄м Христос усюқылътыху, қӯлва̄лътыху ма̄тын, қӯнпырухлъяклъю! Аминь.
Селектирано:
2е Петра 3: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.