2е Петра 2
2
Апыҳтуӷистысиӷўа̄ӷыт
1Сивунӷани агани ӯкналиқистысӣӷўа̄ӷыт акулңитнисяҳтут Кияӷныӷым югитни, катам апыҳтуӷистысиӷўа̄ӷыт акулыхпысинилъықут. Налъюныҳпысини апыҳтуҳлъықӣси иқлъыңамың на̄фқынъалюки ухпықилъыси. Қайўа Христосым Пилӣтыстыңита тукфиқақыӷңӣстың итымунъалюки сыӷлыҳқылъҳитның, паниның пикнаниҳлъықӣт. Ынка̄м нӯскаган лъңитның на̄фқыслъықут. 2Юлӷутыт малигулъықут апыҳтуӷистысиӷўа̄ӷнун кайңуналӷинун кияҳта̄лъҳитнун. Ынка̄м югыт сыӷлықӯҳлъықӣт апыҳтӯсяпигыт атупут. 3Пакихтылъыӷмыхтыхун апыҳтуӷистысиӷўа̄ӷыт аклъюңиӷиюхлъықут лъпысиның. Ынка̄м апыҳлъықӣт апыҳтӯсяңлъяқатың маниңналютың лъпысиның. Има ныӷиҳа̄ның Кияӷныӷым Нанқихтистыңатлъю, На̄фқӣстыңатлъю қавӣгатуқ аӷью̄ӷьяқлъыгуҳлъюки аюқӣ.
4Кияӷныӷым аӷью̄ӷумаңинъыӷитӣ яқулгыт сыӷлыҳқақңата, иўырңа милю̄ткақӣ геенамун. Таўани писяҳтӣҳлъягми қӣпшаӷусиӷңа̄т, утақӣлӷӣт Аӷныӷанун Нанқихтилъҳым. 5Ныӷиӷлюку Ной кияҳтыңъулюку, Кияӷныӷым аӷью̄ӷумаңинъыӷитӣ югыт авылӷасиңўа̄ӷикат лъңаның, ынка̄м улывыстыкақа̄ нуна. Иўырңа югуликақа̄ Ной, иляңилъю ма̄ӷраӷвинлык югыт. (Ной уңипаҳтыңука̄гуқ ылъқуӷутңалӷӣмун кияҳта̄лъыӷмун.) 6Кияӷныӷым аӷью̄қақа̄клъю ныҳлъягык Содомылъю, Гоморрамлъю. На̄фқыхкақа̄к кыныҳқун кынляңа пепелыңуҳтылъҳыхкынун. Ынка̄м успута̄ҳтыкақа̄к сяяҳқа̄таңи югыт авылӷасиӷўа̄ӷикат Кияӷныӷмың. 7-8Лот ылъқуӷутңалӷӣңуяҳтуқ ю̄к кияҳтыкақ акулңитни тама̄куни сыӷлыӷыт югыт. Аҳутаңа тамаҳа̄н сыӷлылӣӷуткыҳлъякақӣ уңувасиӷмикун ысҳапаглюки, нагалъюки сыӷлытун кияҳта̄лъҳит, нуқытыхпынатыңлъю блудылъӷит. Ынка̄м Атанӷым югуликақа̄. 9Та̄ўа лӣтаҳпут, Атанық лӣсимакуқ натын югулилъыҳқамың ылъқуӷутңалӷӣт югыт, нанӷӣҳсяӷалъыңынӷата. Кылыңакңўӣлъю сыӷлыӷыт югыт аӷью̄лъыңылъыӷмылңӯт, утақӣмалюки Аӷныӷанун Нанқихтилъҳым. 10Та̄на аӷью̄лъық кияң тама̄кунун аюқуқ малигулъҳӣнун югусимың сыӷлытун пиюкылъыҳлъягитнун, қа̄ткусюгигалңуӷнунлъю китумун алңунак.
Тама̄кут апыҳтуӷистысиӷўа̄ӷыт тытугигатутлъю, лъмиңуюгныӷӯтлъю. Алиңыхпынатың сыӷлықӯӷақӣт ниӷугракыхтат. 11Яқулгыт икнақатаӷаҳтут, аҳтуӷьяҳқа̄нӷитаӷаҳтут та̄куның ниӷугракыхтаның, паниның сивуңани Атанӷым анахусиманина̄нӷитӣт ниӷугракыхтат. 12Иўырңа тама̄кут апыҳтуӷистысиӷўа̄ӷыт сыӷлықӯӷақӣт сяңўа̄т лӣгикыхпынаки. Тыӷикусястун сюмыҳтаӷаҳпагниңилңӯгут. Туқутылъыңылъықут тыӷикусястун алъхыӷлютың тыӷихтуӷлюки туқутка̄т. 13Углялӷӣт икфиқыстақӣт ынка̄м Кияӷныӷым икфиқыслъықӣ. Талўа аӷныра̄ӷинаӷми мыӷӯтыҳлъягақут, югусимыңлъю сыӷлыӷыт пиюкылъҳит атуқақӣт. Кайңусяӷа̄тыҳлъягақут нықынӷаҳқылгусӣмалюси, ынка̄м акулыхпысини нукыхнаҳқыхкастунлъю, лъмӣгуткастунлъю аюқут. 14Ысҳаныӷмыхтыки аӷнат қилӣқақӣт. Сыӷлыҳқысюныҳтӯт иўырңа сыӷлыҳқылъылӷутаңита кыпсюҳсигатңўа̄ӷӣт. Маниӷақӣт югыт пӯҳнықыхтат сыӷлыҳқысюгысқылъюки, пакигныпихтутлъю. Тама̄кын апалъюқлъюку Кияӷныӷым аӷью̄ӷьяҳқақӣ! 15Тама̄кут апыҳтуӷистысиӷўа̄ӷыт ухпықнаниқақӣт апыҳтӯсяпигыт. Ынка̄м аӷуляқыхка̄гут Валаамым пилъҳатун пиналютың. (Иӷнықсяқаңа Веорым.) Қуя̄қуқ югыт акилыҳтунӷатни сыӷлытун писқылъюку. 16Иўырңа осёлым акузипагниңилңӯм, югым мыңакун иныҳтыкақа̄ Валаам. Ынка̄м аӷулӣҳтыкақа̄ ӯкналиқиста сюмыӷныӷӣлъиқылъҳаның.
17Тама̄кут апыҳтуӷистысиӷўа̄ӷыт па̄тқастун сыңъустун аюқут, қилягўа̄ӷыстунлъю аюқут ануқыҳлъягым тыңтыкаңи. Кияӷныӷым ныкаҳқаңлъя̄ткақӣ писяҳтӣҳлъягми. 18Аҳся̄ӷмикамың а̄ңа̄юхтақут тымңитхўамың акузиткылъютың. Пӣқут итагнаӷнилюку малиҳқутақылъыҳқақ сыӷлыӷнун югусим пиюкылъҳанун. Ынка̄м югыт та̄қақутлъю таўатын кияҳтылъыӷмыхның, манигақӣт таўатын пинқихтысқылъюки. 19Апыҳтуӷистысиӷўа̄ӷыт уңипа̄ткақӣт тама̄кут югыт итымңанилюки сямун алңунак пиюкылъҳитнун, лъңит катам итымңаңунӷитыӷңа̄ӷмың. Қыпҳаҳтыля̄ӷӯт сыӷлыҳқылъыӷмыхнун ынка̄м сыӷлыҳқылъҳита на̄фқысяқлъыгўӣ. Ю̄к қыпҳаҳтыля̄ӷӯқ алңунак сямун иглықатақилӷӣмың лъңанун. 20Югыт лӣтақңамыхтыху Атаныҳпутлъю, Югулиӷистывутлъю Иисус Христос анагьяҳқақа̄т нукыхна̄ нунам. Иўырңа утыӷнинқихтыкумың сыӷлытун кияҳта̄лъыӷмыхнун а̄ҳқутақысимакумыңлъю тама̄кунун, та̄ўа кияҳта̄лъҳит сыӷлыӷатаӷа̄яҳқа̄гут пиюхўа̄лъыӷмыхның. 21Тама̄кут югыт, лӣтңўа̄ӷлюку аглыӷналӷӣ қылӷусяқ алъхыҳтыкаҳтың, тунуткақа̄т. Итагнаӷатаӷаӷнаяҳтут лӣсимаңисяқумыхтыху ылъқуӷутңалӷӣ кияҳта̄лъық. 22Таўатын аныҳтылъҳита ипаңуҳтыста̄т югыт пилъҳат: «Қикмим утыҳфикақа̄ миӷьяқани, куругақлъю уӷвуҳқыхкақ аглянқихлъюни уӷашамун миңуӷунъықихтақуқ».
Селектирано:
2е Петра 2: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.