2е Петра 1
1
1Укут посланият Симон Петырымың пиңӯт. Қыпҳаҳтыка̄ңалъю, апостолоңалъю Иисус Христосым. Письмомамси қамахлъюси алъхыӷуткани ухпықилъыӷмың хўаңкутыстун аюқылӷӣмың. Алъхыҳтыкақаҳпут ухпықилъыҳпут ылъқуӷутңалъҳакун Иисус Христосым, Кияӷнықыхкыфутлъю, Югулиӷистыкыхкыфутлъю.
2Пиниқылъҳалъю, ныкыхмылъҳалъю ўата нулялик лъпысини лӣсимакылъыҳпысигун Кияӷныӷымлъю, Иисусымлъю Атаныҳтамта.
Кияҳтылъыҳқақ Кияӷныӷым Кияҳтысқысюлъҳатун
3Иисус аҳтуӷьяҳқа̄нӷилъылгӯқ Кияӷныӷмың. Та̄хун аҳтуӷьяҳқа̄нӷилъыҳқун тӯныхкақӣлъю сямың тамаҳа̄ның аклъюкыхкамнъың кияҳтысқылъюта Кияӷныӷьюныҳтулюта. Тама̄кут алъхыҳтыкақапут қаюҳлъяк лӣсимакыхкыфут Иисус. Туқлъюӷӣлъю илятысқылъюта қӯлвалъыӷминуңлъю, пинилъыӷминуңлъю. 4Аҳтуӷьяҳқа̄нӷилъыӷмикун, Иисусым тӯныхкақӣлъю акықусяминың мыгнунапихлъыҳӣныңлъю, пивагнапихлъыҳӣныңлъю. Тама̄гун акықусятхун Кияӷныӷым илятыслъықӣси наңаӷныӷминун. Та̄хкын анагьяқлъыгуҳлъықаси сыӷлыӷым пиюкылъҳи нунамылңӯт на̄фқӣяқлъыгыт лъпысиның. 5Кияӷныӷым наңаӷнылиткақутаңаның лъпыси, та̄куңинаҳа̄гның пинақылъҳаҳси қамахлъюку илятыки укут ухпықилъыҳпысинун: ухпықилъыҳпысинун илятыху пинилъық, пинилъыҳпысинун илятыху лӣсималъық, 6лӣсималъыҳпысинун илятыху нуқытутилъық, нуқытутилъыҳпысинун илятыху аӷулӣлъка̄малъық, аӷулӣлъка̄мылъыҳпысинун илятыху Кияӷныӷьюныҳтулъық, 7Кияӷныӷьюныҳтулъыҳпысинун илятыху наңлъыкутутылъық ухпықа̄лгутыхпысинун, наңлъыкутутылъыҳпысинун илятыху пиниқылъық. 8Тама̄кут атуқңукуфсики, нулястыкуфсикилъю каюсӣлъықӣси атуҳқа̄люсилъю, каюткаҳқа̄люсилъю лӣсимакылъыҳпысигун Атанымта Иисус Христосым. 9Иўырңа китум алңунак атуқынӷилъкумики тама̄кут, амухтапихтуқ ынка̄м ысҳа̄тыпагниңитуқ. Пуйгукақа̄ Кияӷныӷым укмаңиқа сыӷлыҳқылъыҳа.
10Ынка̄ңам ухпықа̄лгутымни, налъюнықнӣӷўа̄ҳтыху Кияӷныӷым туқлъюқақӣсилъю, накмикыхкақӣсилъю. Таўатын пикуфси та̄ўа иқитықаҳна̄нӷитуси Христосымың. 11Ынка̄м Кияӷныӷым қуякусиқыҳлъяглюси итыҳтыслъықӣси кынлыңилңуӷмун Атаныҳпагулъҳанун Атанымталъю, Югулиӷистымталъю Иисус Христосым.
12Қайўа лӣсимакыӷңа̄ҳпысики та̄кут ипапилъҳыт, сягиқутңуӷңа̄ҳпысикилъю қа̄ткынъалюки, ӣўлың нықамиклъықамси та̄куның ипапилъыӷның лъпысинун апыҳтӯткамнъың. 13Сюмымни итагнаҳтуқ нықамикыхкумси тама̄куның уңуваңулюңа. 14Лӣсимакақа туқуяҳтуҳтуңа қаюҳлъяк Атанымта Иисус Христосым уңипа̄тыкыстакақа̄ңа. 15Пинақылъқа қамахлъюку апыҳтуӷамси тама̄кын, ынка̄м туқулъыӷма киңуңаның нықа̄микылъықаси.
Ысҳа̄ткат Христосым Ниӷуҳқылъҳаның
16Атуқумаңитапут пыҳқиниқутңўа̄ӷлюки уңипаӷа̄тыңлъяқат а̄пҳақңамтыки лъпысинун аҳтуӷьяҳқа̄нӷилъҳалъю, тагилъҳалъю Атанымта Иисус Христосым. Хўаңкута катам ийыҳлъюўа̄мнъың ысҳақақаҳпут лъңан а̄ңылъыҳлъяга. 17Иисусым алъхыҳтақңагу қӯлвалъықлъю, ниӷуҳқылъықлъю Кияӷныӷмың Атамың, нагақуқақа̄ мыңа Кияӷныӷым, Қулиҳпига̄лӷӣ Ниӷуҳқыңъаҳлъяк. Атам пикақа̄: «Унаңӯқ пиниқыпихтыкыхка Иӷнықа, ыфқуқыпихтыкыхка». 18Хўаңкута хўаңкунъың катам нагаткақаҳпут ма қилягмың Иисусымытақңамта аглыӷналӷӣми на̄йӷами.
19Тама̄кын апалъюқлъюку хўаңкунъи налъюнықшахӣтут ӯкналиқистыт ӯкналиқуткыхкӣт ипаңутаңи. Лъпысинун пиниҳлъықут сюмыҳтаӷа̄ткыңъўа̄қуфсики ӯкналиқуткыхкӣт, қаюҳлъяк кынылӷутам кӯкхутылъҳатун аюқут мамлыгмун. Таўатытыкыстаҳтык кынляңа Христосым тагилъыҳқа̄н аӷныӷанун. Та̄хкын ниӷуга кӯкхулъықуқ илюхпысинун, уна̄ңум иӷалықыта̄ӷатун аюқлъюни. 20Лӣгикңўа̄ӷьяҳқақаҳси уна: Китум алңунак лъңаның катам лӣгикыпагниңитӣ сямың писӣтаңи ӯкналиқылъҳыт Акузитнилңӯт Игақыхкани. 21Ӯкналиқистыт накмикумаңитӣт ӯкналиқуткысяҳқатың. Итупилъ Аглыӷналӷӣм Таӷныӷам ӯкналиқистыт акузитылиткақӣ акузисқылъюки Кияӷныҳтамың.
Селектирано:
2е Петра 1: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.