1е Иоанна 4
4
Нанӷӣқутыки Таӷныӷат
1Пиниқыхкамни, ухпықыхпынаки қамахлъюки таӷныӷат. Йыӷлыги лӣгикнақақитыки Кияӷныӷмың пиңутаңи, қаюҳлъяк угляпихлъыҳӣт ӯкналиқистысиӷўа̄ӷыт миңисима̄т нунами. 2Ысҳа хўатын лӣсимаксяҳқахси Кияӷныӷмун Таӷныӷақуткык: тамаҳаӷми таӷныӷам а̄пқагу Иисус Христос югулюни алъхықа̄нилюку, Кияӷныҳта̄гуқ. 3Иўырңа тамаҳаӷми таӷныӷам мысӣӷа̄скагу Иисус югулюни алъхықа̄нӷинъилюку Кияӷныҳта̄нӷитуқ. Та̄кук таӷныӷак аңуякилӷӣмың Христосымың пиңӯк нагақуқаҳпысиның тагӣяҳқа̄нилюкык. Та̄ўа ма̄тын ка̄тңўа̄ӷлютык нунамун аюқук.
4Таӷнуҳаӷни, лъпыси Кияӷныӷым пикутаңаның, кая̄лъқыхкақаси тама̄кут қаюҳлъяк илюхпысинилңуқ аҳтуӷьяҳқа̄нӷитаӷаҳтуқ нунамылңуӷмың. 5Тама̄кут нунам пикӣ, апыҳтӯсӣт нунамың пиңӯт, ынка̄м нунам юган нагатақӣт. 6Иўырңа хўаңкута Кияӷныӷым пикӣлъю, ынка̄м китум лӣсимакилӷӣм Кияӷныӷмың нагатақӣлъю. Тама̄кут иляңита Кияӷныӷым пикынӷилъкаңан нагасигатӣлъю. Ынка̄м таўатын ысҳа лӣсимаксяҳқахпут Таӷныӷакык ипапиҳқылъҳым налиӷмың таӷныӷакык ипаңунӷилңӯм.
Кияӷнық Пиниқылъҳӯқ
7Пиниқыхкамни, йықай пиниқутутылъта қаюҳлъяк пиниқылъық Кияӷныӷмың пиңӯқ. Кина алңунак пиниқиңалӷӣ таӷнуҳақа̄ Кияӷныӷым, лӣсимака̄лъю Кияӷнық.
8Китум алңунак пиниқинӷилңӯм налъюка̄ Кияӷнық, қаюҳлъяк Кияӷнық пиниқылъҳӯқ. 9Кияӷныӷым каяхтыкақа̄ та̄наңинаҳақ Иӷныни нунамун, уңувалъыңысқылъюта лъңакун. Таўатын пилъыӷмикун Кияӷныӷым кылгуткақа̄ пиниқылъыни хўаңкунъун. 10Пиниқылъық акузиткыхкыхка хўаңкута пиниқылъқынӷитаҳпут Кияӷныӷмун. Йыӷлыги Кияӷныӷым пиниқылъқа̄ хўаңкунъун кылгутка̄ каяхтылъыӷмикун Иӷныни иқитусӣлюку сыӷлыҳқылъымнъун.
11Пиниқыхкамни, Кияӷныӷым пиниқылъҳа хўаңкунъун таўатыскан хўаңкуталъю пиниқутусяҳқа̄гукут. 12Китум алңунак ысҳӣгатңўа̄ӷа̄ Кияӷнық; пиниқускумта Кияӷнық кияҳтыңъӯқ илюмнъи, пиниқылъҳалъю ӣӷўиӷьяҳқа̄гуқ илюмнъи. 13Кияӷныӷым тӯныхкақӣлъю лъми катам Таӷныӷагминың ынка̄м лӣсимакаҳпут кияҳтыңъӯқ хўанкунъи, хўаңкута лъңани. 14Ысҳақақаҳпут Иӷныӷа. Ынка̄м уңипақңўа̄ҳпут Кияӷныӷмун каяхтыкақнилюку Югулиӷистыңулюку тамаҳа̄нун югнун. 15Китум алңунак а̄пқагу Иисус Иӷнықнилюку Кияӷныӷмун, Кияӷнық кияҳтыңъӯқ лъңани, лъңа Кияӷныӷми. 16Ынка̄м хўаңкута лӣсимакаҳпутлъю, ухпықаҳпутлъю Кияӷныӷым пиниқылъҳа хўаңкунъун.
Кияӷнық пиниқылъҳӯқ, ынка̄м кина алңунак кияҳлъыҳӣ пиниқылъыӷми кияҳтыңъӯқ Кияӷныӷми, Кияӷнық лъңани. 17Ынка̄м пиниқылъық ӣӷўиҳтыка̄гуқ илюмнъи илютусқылъюта Нанқихтилъҳым Аӷныӷани. Таўатытукут қаюҳлъяк Христосытун аюқылӷӣкут нунами хўани. 18Пиниқылъыӷми алиңылъық авӣтуқ қаюҳлъяк ӣӷўиқам пиниқылъҳым иҳлъықаюўа̄ алиңылъық. Ынка̄ңам пиниқылъық ӣӷўӣмаңитуқ тама̄куни паниның алиңыхкаюгни, қаюҳлъяк алиңылъылгӯқ аӷью̄лъық.
19Пиниқӣқукут қаюҳлъяк Кияӷныӷым сивуклъюни пиниқыхкақӣлъю. 20Кина пикуми: «Пиниқақа Кияӷнық», нақам угумиклъюку ухпықа̄лгутни, иқлъыңиқыстыңӯқ. Қаюҳлъяк китум алңунак пиниқынӷилъкумигу ухпықа̄лгутни ысҳақаюни, пиниқна̄нӷита̄ Кияӷнық ысҳӣгалъкынъи. 21Уна қылӷусяқа̄ Христосым хўаңкунъун, китум пиниқыхкумигу Кияӷнық, пиниқсяҳқақа̄ ухпықа̄лгутнилъю.
Селектирано:
1е Иоанна 4: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.