1е Иоанна 3
3
Авақутӣ Кияӷныӷым
1Ысҳақаҳтыхуқун Атам пиниқималъыҳлъяга хўаңкунъун, авақутақнӣқӣлъю лъңанун, ипа авақутақӣлъю. Тама̄кын апалъюқулюку нунам юган налъюкӣлъю қаюҳлъяк налъюкыхкаңат Кияӷнық. 2Пиниқыхкамни, та̄ўа авақутақыхкаңилъю Кияӷныӷым, иўырңа сялин хўатыҳлъюўа̄қ лӣгикигатаҳпут натын лъӣлъыҳқаҳпут. Иўырңа лӣсимакаҳпут, Христос алӣқан лъңатун аюқылъықукут қаюҳлъяк ысҳаҳлъықаҳпут лыган таўатылъюку. 3Та̄на китум алңунак лъминың сиӷимакыхкумигу Христосыкун пылюңиҳсяӷьяҳқа̄гуқ, катам Христосым пылюңитылъҳатун.
4Кина алңунак сыҳлъыҳқыхкаюк қа̄ткусигатуқ Кияӷныӷым Лӣлиҳтӯся̄мнъун. Сыӷлыҳқылъҳӯқ қа̄ткунъыӷитылъық Кияӷныӷым Лӣлиҳтӯся̄мнъун. 5Лӣсимакаҳси Христос алъхықа̄гуқ иқинъалюки сыӷлыҳқылъыпут, лъңа сыӷлыҳқылъҳитуқ. 6Кина алңунак Христосыми кияҳлъыҳӣ сыӷлыҳқумаңинаӷна̄нигуқ. Кина алңунак сыӷлыҳқумаңинақуми, лӣгикумаңита̄лъю, налъюкақа̄лъю Христос.
7Таӷнуҳаҳаӷни, китумун алңунак пӯҳтыстыхпынаси! Кина алңунак ылъқуӷулъюни пикаюк ылъқуӷутңа̄қ катам Христосым ылъқуӷутңалъҳатун. 8Кина алңунак сыӷлыҳқумаңиналӷӣ Туӷныӷа̄м пика̄ қаюҳлъяк Туӷныӷақ сыӷлыҳқыңъулӷӣ има пӣнлиӷьюхўа̄лъыӷмың. Иӷныӷа Кияӷныӷым алъхықа̄гуқ уна апалъюқлъюку, на̄фқынъалюку Туӷныӷа̄м қыпҳақа̄.
9Кина алңунак таӷнуҳа̄ Кияӷныӷым сыӷлыҳқумаңинӣгатуқ қаюҳлъяк Кияӷныӷым наңаӷныӷа лъңанилңуқ; қаюҳлъяклъю Кияӷнық Атакыхкаңа, ынка̄м сыӷлыҳқумаңинаӷна̄нӷитуқ. 10Хўатын лӣсимаксяҳқақапут Кияӷныӷымлъю авақутӣ, Туӷныӷа̄млъю авақутӣ: кина алңунак ылъқуӷулъюни пиңигалңуқ налиӷмың угумикиңалӷӣ юлгутминың Кияӷныӷым авақутақынӷита̄.
Пиниқутулъюси
11Уңипақ нагақуқаҳси пӣнлиӷьюхўа̄лъыҳпысиның унаңӯқ: пиниқутусяҳқа̄гукут. 12Каинтун аюқсяҳқа̄нӷитукут. Каин Туӷныӷа̄м пика̄ ынка̄м туқуткақа̄ лъми катам аңлыгутни. Сяңан туқутагу? Қаюҳлъяк сялъҳи анахутңалӷӣт нақам аңлыгутаңан сялъҳи ылъқуӷутңалӷӣт.
13Ухпықа̄лгутымни, сяӷӣӷаюхпынаси нунам юган угумикыхкаңиси. 14Лӣсимакаҳпут туқумың алъпака̄гукут уңувалъыӷмун қаюҳлъяк пиниқыхкыпут ухпықа̄лгутыпут. Кина алңунак пиниқиңигалңуқ паниның туқумытуқ. 15Китум алңунак угумикыхкумигу ухпықа̄лгутни юхтаҳтыңӯқ. Лӣсимакаҳси юхтаҳтым илюңани кынлыңилңуқ уңувалъық кияҳтыңъунӷитуқ. 16Хўатын ысҳа лӣсимакыхкыфут пиниқылъық сяңутаңа: Христосым тӯнылъҳакун уңувалъыни хўаңкунъун. Ынка̄м хўаңкуталъю тӯнылътыки уңувалъыпут ухпықа̄лгутымнъун. 17Китум алңунак на̄маӷми кияҳта̄ӷым ысҳаӷлюку ухпықа̄лгутни аклъюмалӷӣ наңлъыкынӷилъкумигу, натынңам Кияӷныӷым пиниқылъҳа илюңанилъықа?
Тытуўитылъық Сивуңани Кияӷныӷым
18Таӷнуҳаҳаӷни! Пиниқияҳқа̄нӷитукут акузитыра̄ӷинаҳтыхунлъю, акузилъымтыхунлъю. Йыӷлыги пиниқилъта ипапиҳқылъюта наңаӷнымтыхун. 19-20Ынка̄ңам лӣсимакылъықукут Кияӷныӷмун ипапиҳқылъыӷмун пикутфут. Сыӷлыӷнинымталъю Кияӷныӷым сивуңани налъюнықсюкна̄нӷитаҳпут сыӷывутиңалъҳа қаюҳлъяк Кияӷнық а̄ңатаӷаҳтуқ сыӷлыӷьюгңалъымнъың, лӣсимакыхкаңалъю сяңўа̄ тамаҳа̄н. 21Пиниқыхкамни, сыӷлыӷнинӷилъкумта тытугна̄нӷитаҳпут Кияӷнық. 22А̄пнымталъю сямың алңунак алъхыӷутақукут лъңаның қаюҳлъяк қа̄ткақыхкыпут қылӷӯсӣ, атуқақыхкыпутлъю ыфқуӷналӷӣт лъңани. 23Уна ысҳа қылӷуся̄: хўаңкунъун ухпықысқылъюку Иӷныӷми а̄тҳа Иисус Христосым, пиниқутулъюталъю Христосым қылылъҳатун. 24Китум алңунак қа̄ткыхкумики Кияӷныӷым қылӷӯсӣ кияҳтыңъӯқ Кияӷныӷми, Кияӷнық лъңани. Хўатын ысҳа лӣсимакыхкыфут Кияӷныӷым хўаңкунъитылъҳа: Таӷныӷагныкун тӯныхкамикун хўаңкунъун.
Селектирано:
1е Иоанна 3: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.