1е Иоанна 5
5
Ухпықилъық Иӷныӷаның Кияӷныӷым
1Китум алңунак ухпықңукумигу Иисус, Христосыңутаңа, авақутақа̄ Кияӷныӷым, китум алңунак пиниқыхкумигу Ата пиниқсяҳқақӣ авақутӣ. 2Хўатын лӣсимаксяҳқақаҳпут пиниқилъыҳпут Кияӷныӷым авақутӣтнун: пиниқылъымтыхун Кияӷнық, қа̄ткылъымтыхунлъю қылӷусӣ. 3Уна пиниқылъҳӯқ Кияӷныӷмун: қа̄ткутылъыҳпут қылӷуся̄нун. Қылӷусӣ пияқнаҳлъягунӷитут, 4қаюҳлъяк тамаҳаӷми авақуталӣтка̄н Кияӷныӷым кая̄лъқыхкақа̄ нуна. Хўатын ысҳа кая̄лъқысяҳқаҳпут нуна, ухпықилъымтыхун. 5Кинаңа̄ўа кая̄лъқӣста нунамың? Китум алңунак ухпықыхкумигу Иисус Иӷнықнилюку Кияӷныӷмун, та̄ната кая̄лъқӣста.
Пиңают А̄пҳистыт
6Иисус Христосыңӯқ тагикақ. Тагика̄гуқ мыҳқунлъю, а̄хўкунлъю. Тагимаңитуқ мыҳӣнаҳқун иўырңа мыҳқунлъю, а̄хўкунлъю тагика̄гуқ. 7Таӷныӷам а̄пҳа̄ та̄на ипаңунилюку қаюҳлъяк Таӷныӷак ипапиҳқылъҳулӷӣк. 8Та̄ўа пиңаюгӯт а̄пҳистыт, Таӷныӷак, мық, а̄кхў; та̄кут қамахлъютың итагнақулъютың аюқут. 9Ухпықңукумтыки югыт а̄пқӣт хўаңкунъун, ипапыста̄қ ухпықатаӷаӷьяҳқақапут Кияӷныӷым а̄пқӣ. Кияӷныӷым апылъҳа Иӷныӷмун ипаңӯқ. 10Ынка̄м китум алңунак ухпықыхкумигу Иӷныӷа Кияӷныӷым қама илюңанитуқ Кияӷныӷым а̄пқа̄. Иўырңа китум алңунак ухпықынӷилъкумигу Кияӷнық иқлъыңиқыстыңлъяҳлъықа̄, қаюҳлъяк Кияӷныӷым а̄пқа̄ Иӷныӷминың ухпықынӷилъкаңа. 11Уна Кияӷныӷым а̄пқақа̄, Кияӷныӷымңуқ тӯныхкақӣлъю кынлыңилңуӷмың уңувалъыӷмың, та̄на уңувалъық Иӷныӷанитуқ. 12Китум алңунак тугуклъиқумигу Иӷныӷа, уңувалъылгӯқ; китум алңунак тугуклъӣмаңилъкумигу Иӷныӷа Кияӷныӷым уңувалъыңылъҳитуқ.
Кынлыңилңуқ Уңувалъық
13Письмосиқанка тама̄кут лъпысинун ухпықилӷӣнун а̄тҳаның Иӷныӷан Кияӷныӷым, лъпысинун лӣсимакысқылъюку кынлыңилңуқ уңувалъыҳси. 14Налъюнықсюкигатаҳпут Кияӷнық; лӣсимакаҳпут нагатақӣлъю а̄пнымтыху сямың алңунак пиюкылъҳакун аюқылӷӣмың. 15Лӣсимакыхкумтыху нагатылъҳа сямың алңунак а̄птылъымнъың, лӣсимакаҳпут алъхыӷутақукут туңсиқамнъың лъңаның.
16Китум ысҳақумигу ухпықа̄лгутни сыӷлыҳқылӷӣ туқумун аюқынӷилңуӷмың юӷа̄ткылъигу ынка̄м Кияӷныӷым тӯнлигу уңувалъыӷмың. Акузиткыңъўа̄нка югыт сыӷлыҳқылъҳита туқумун пияҳқақынӷилъкаңитның. Сыӷлыҳқылъылгӯқ туқумун аюқылӷӣмун. Иўырңа юӷа̄ткысқыңъунӷитақа таўатын сыӷлыҳқылӷӣ. 17Қамахлъюни сыӷлытун пилъық сыӷлыҳқылъҳӯқ. Иўырңа сыӷлыҳқылъылгӯқ туқумун аюқынӷилңуӷмың.
18Лӣсимакаҳпут кина алңунак Кияӷныӷым авақута̄ сыӷлыҳқумаңинаӷна̄нӷитуқ, қаюҳлъяк Иӷныӷан Кияӷныӷым афлъыңакңукаңа ынка̄м Туӷныӷа̄м сыӷлытун пина̄нӷита̄.
19Лӣсимакукут Кияӷныӷым пикӣлъю қайўа Туӷныӷа̄м иглыӷутңуӷңа̄гу қамахлъюку нуна.
20Лӣсимакаҳпут Иӷныӷан Кияӷныӷым тагилюни лӣгикыстыкақӣлъю лӣсимакысқылъюку Кияӷныпик. Кияӷныпигмытукут Иӷныӷанитутымнъың Иисус Христосыми. Та̄ната Кияӷныпиклъю, кынлыңилңуқлъю уңувалъық.
21Таӷнуҳаҳаӷни, иқитңалюси кияӷнысиӷўа̄ӷның!
Селектирано:
1е Иоанна 5: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.