Kur 8
8
1Bwanyima Nyakubaho akagambira Musa ati: Za owa Faraaho, omugire oti: Nyakubaho naagira ati: Reka abantu bangye bagyende, babone kumpeereza. 2Kwonka ku oraayangye kubareka bakagyenda, niinyija kuteeza ensi yaawe yoona ebikyere. 3Omugyera nigwija kwijurirana ebikyere, haza bituuhuukyeyo, bitaahe omu nju yaawe, omu kishengye kyawe ekiraarwamu, omu kitanda kyawe, omu maju g'abaheereza baawe, n'ag'abantu baawe, omu mateekyero gaawe, n'omu by'okugoyeramu byawe. 4Ebikyere nibiija kukutemba, bitembe abantu baawe n'abaheereza baawe boona. 5Kandi Nyakubaho akagira Musa ati: Gambira Arooni oti: Bangira emigyera n'emikura n'ebiyanja omukono gwawe gukwaitse enkoni yaawe, ebikyere bibone kuteera ensi ya Misiri. 6Arooni atyo abangira amaizi ga Misiri omukono, ebikyere bitimbirayo, bishweka ensi ya Misiri. 7Kwonka abafumu nabo bakora batyo n'emiguruko yaabo, ebikyere biteera egyo nsi.
8Bwanyima Faraaho ayeta Musa na Arooni, abagira ati: Nimweshengyereze Nyakubaho, nyowe n'abantu bangye atwiheho ebi bikyere, haza ndekure aba bantu, baze kumutambira ebitambo. 9Musa agarukamu Faraaho ati: Nyakusinga, ngambira obunaku bu ndaakweshengyererezemu Ruhanga, iwe n'abaheereza baawe n'abantu baawe, ebikyere bibone kucwekyerera, bikakurugaho, bikaruga n'omu maju gaanyu, bikatsigara omu mugyera gwonka. 10Faraaho amugira ati: Nyencakare. Musa ati: Nikiija kuba nk'oku waagamba, obone kumanya ku hatariho n'omwe ori nka Mukama Ruhanga waitu. 11Ebikyere nibiija kukurugaho, birugye omu maju gaanyu n'aha baheereza baawe n'aha bantu baawe, bitsigare omu mugyera gwonka. 12Musa na Arooni batyo bashohora, baruga omu maisho ga Faraaho. Musa atakira Mukama kwihaho ebikyere bi yaateerize Faraaho. 13Na Nyakubaho aikiriza kukora nk'oku Musa yaashabire; ebikyere bifa, bihwa omu maju n'omu bibuga n'omu misiri. 14Reero ku baabirundaine baabirunda emituumo, ensi yaanuuka ekijunde. 15Kwonka Faraaho ku yaareebire haabaho okuyugirwa, yaagangaaza omutima, yaayanga kubahurira, nk'oku Nyakubaho yaabaire agambire.
Ekibonaboneso kya kashatu: Okuteerwa emibu
16Bwanyima Nyakubaho akagira Musa ati: Gambira Arooni oti: Banga enkoni yaawe, oteere omucuucu gw'aha nsi, gurugwemu emibu omu nsi ya Misiri yoona.
17Nabo baakora batyo. Arooni yaabanga omukono gukwaitse enkoni ye, yaagiteera omucuucu gw'aha nsi, gwarugwamu emibu, yaateera abantu n'enyamaishwa. Omucuucu gwona ogw'aha nsi gwarugwamu emibu, yaabuga ensi ya Misiri yoona. 18Abafumu ku baateireho n'emiguruko yaabo kureeta emibu, baaremwa. Haza egyo mibu yaashugyeera abantu n'enyamaishwa. 19Abafumu baagira Faraaho bati: Mbwenu eki Ruhanga niwe yaakikoresa orukumu rwe. Kwonka omutima gwa Faraaho gwaguma gugangaire; yaayanga kubahurira, nk'oku Mukama yaagambire.
Ekibonaboneso kya kana: Okuteerwa eshohera
20Bwanyima Nyakubaho akagambira Musa ati: Guruka kare omu kasheeshe, otegyereze Faraaho yaaba naashohora kuza aha maizi. Haza omugire oti: Nyakubaho naagira ati: Reka abantu bangye bagyende bampeereze. 21Reero ku oraabe otabaikiriize kugyenda, niinyija kukwoherereza eshohera zikuteere, n'abaheereza baawe n'abantu baawe, zitaahe omu maju gaanyu, amaju g'Abanyamisiri gaijure emizinga y'eshohera, zishugyeere n'aha itaka ri barikwemereraho. 22Kwonka eryo izooba, ekyanga kya Gosheni, eki abantu bangye batwiremu, niinyija kukireka hangahari, kirekye kuteerwa emizinga y'eshohera, obone kumanya ku niinye Nyakubaho orikukora ebyo omu nsi. 23Nikwo ndaayorekye ntyo entaaniso y'abantu bangye n'abaawe. Kandi ako kamanyiso nikaija kubaho nyencakare. 24Haza Nyakubaho nikwo yaakozire. Haija emizinga y'eshohera, yaataaha omwa Faraaho, n'omu maju g'abaheereza be, n'omu nsi ya Misiri yoona. Ensi yaasiisikara ahabw'ezo shohera.
25Mpaho Faraaho ayeta Musa na Arooni, abagira ati: Nimwirooko muze kutambirira Ruhanga waanyu omuri egi nsi. 26Musa amugarukamu ati: Tikihikire kukora tutyo; ahabw'okuba nitwija kutambira Mukama Ruhanga waitu ebitambo bi Abanyamisiri barikuzira. Mbwenu shi ku turaatambire omu maisho g'Abanyamisiri ebitambo bi barikuzira, tibarikwija kututeera amabaare? 27Tushemereire kugyenda orugyendo rw'ebiro bishatu, tukaza omu ihamba tukaba niyo twatambirira Mukama Ruhanga waitu ebitambo nk'oku araaturagiire. 28Faraaho amugira ati: Eego, niinyija kubareka mugyende, mutambirire Mukama Ruhanga waanyu ebitambo omu ihamba, kwonka mutaza hare munonga. Kandi munshabire. 29Musa amugira ati: Reeba naaza kushohora ndugye omu maisho gaawe, nyeshengyereze Mukama, nyencakare emizinga y'eshohera ekurugyeho Nyakusinga, n'abaheereza baawe, n'abantu baawe. Kwonka iwe Nyakusinga otagaruka kugobya, okanga kwikiriza abo bantu kuza kutambira Mukama ebitambo. 30Musa atyo ashohora aruga omu maisho ga Faraaho, ashaba Mukama. 31Na Mukama akora nk'oku Musa yaashabire, akiza Faraaho emizinga y'eshohera. Kandi agikiza abaheereza be n'abantu be, hatatsigare shohera n'emwe. 32Kwonka Faraaho obwo nabwo agangaaza omutima, taikiriza abo bantu kugyenda.
Ekibonaboneso kya kataano: Amatungo okwitwa omubyamo
Селектирано:
Kur 8: RKK2008
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
The Bible with Apocrypha in Runyankore-Rukiga, new revised joint translation © The Bible Society of Uganda, 2008.