ÚKLƆ́ KÚ ĀCOTƐ̄HƆ̄ 9
9
Usɔ́lu cɛ̄ ɛlɔ̄ɔwɔicō
(Ācot 22.6; 26.12,18)
1Amáŋ, Usɔ́lu yɔ̄ gē lɔfú lɛyíkwu ayíkpó kú Óndú ā kóō le uwá kpó ŋmó. Ó le tá ɛgiyí otrɛ̄yí kú ācogwɛ́ɛya, 2anɔ́ɔ ó gaá mīyɛ ɔkpá ŋmá abɔ̄ nū kóō bī nyɔ̄ Ɛgogbɔ̄ɔkɔ kú Udamásikɔ̄si, cɛ́ɛ́ ɔ́dāŋ ka ó lɛ ɔ̄cɛ dúú nōo ī yɛce ɔwɛ kú Óndú ā má, kwu ācɛnyīlɔ kwu ācɛnyā, kóō lɛ uwá kpó wā Ujerúsālɛm. 3Abɔ̄ ó yɔ̄ gē nyɔ̄, klla i bá lɛ ajɛ Udamásikɔ̄si ajaajɛ ā, igbeékpónú ɔlá ofíyajɛ ŋmá ɔkpáncō le fíyajɛ jīla anú tá maá. 4Ó mágwōnū wāajɛ gblágádá, anɔ́ɔ ó pó ɔkɔ kú ɔ̄cɛ éyi nōo da ɔ́ kahíníī, “Usɔ́lu, Usɔ́lu, ɔdíyá nāa gē bɛ́yíkwu um ā mɛ́ɛ̄?” 5Anɔ́ɔ ó dɔɔ̄kā kahíníī, “A wɛ ɔ̄nyɛ nɛ̄, Óndú?” Anɔ́ɔ ɔkɔ ā tóohi kahíníī, “N wɛ Ujísɔ̄si nāa gē bɛ́yíkwu á.” 6Amáŋ cāŋjɛ ká ā nyɔ̄ igelī nɛ̄ŋcɛ́ ā, abɔ́ɔ ā é kē í da uwɔ ɔdā nāa géē yá piíí ā.” 7Ācɛ nēe bá ī yāwu mla anú ā háyi í lɔfú kɛlā ŋ́, abɔ̄ é le ɔkɔ kú ɔ̄cɛ pó nēé kē má ɔ̄cɛ dúú ŋ́ mā. 8Usɔ́lu cāŋjɛ ŋmá ajɛ le eyī nwūla, amáŋ ó má ɔdā dúúmā gla ŋ́. É le abɔ̄ tū ɔ̄ abɔ̄ ga Udamásikɔ̄si. 9Ó yɔ̄ ɛ̄cī ɛtá, ó kē mɛ́ɛbɛ ŋ́, anɔ́ɔ ɛplá eko nyā ó lé ɔdā dúúmā ŋ́ māa ó kē gwá ɔdā dúúmā ŋ́ dúú.
Usɔ́lu yɔ̄ Udamásikɔ̄si
10Ɔyíkpó éyi yɔ̄ Udámásikɔ̄si, nēé hī ka Ananíyāsi. Óndú ā da ɔ́ ipú ɔ̄na kahíníī, “Ananíyāsi.” Anɔ́ɔ ó tóohi kahíníī, “Ami yɔ̄ á, Óndú.” 11Óndú ā da ɔ́ kahíníī, “Cāŋjɛ ká ā nyɔ̄ ga ɔlɛ́ kú Ujúdasi nōo yɔ̄ úláyi nēé hī ka Okpaakpa ā, cɛ́ɛ́ ká ā dɔɔ̄kā ɔ̄cɛ éyi nēé hī ka Usɔ́lu, ɔ̄cɛ kú Utásɔsi. Ó yɔ̄ ī gbɔ̄ɔkɔ, 12anɔ́ɔ ipú ɔ̄na ó le ɔ̄cɛ éyi nēé hī ka Ananíyāsi ā má abɔ̄ ó bēhé gáā le abɔ̄ ce ɔ́ ɛyí, cɛ́ɛ́ kóō klla lɔfú mɛ́ɛbɛ kpɔ́ á.” 13Amáŋ Ananíyāsi tóohi kahíníī, “Óndú, n tɛtɛ le ɔ̄kā kú ɔ̄cɛ ā pó ŋmá ɛgiyí ācɛ alɛwa ɛɛ́, ɛ́gɔ́dā obɔ̄bí nɛ̄hi nōó yá ācɛ otīihɔ kú uwɔ nēe bá Ujerúsālɛm ā. 14Ó kōō bī íkwu nɛ̄ ó mīyɛ ŋmá abɔ̄ aótrɛ̄yí kú ācogwɛ́ɛya ā kóō lɛ ācɛ dóódu nēe ī gbō uwɔ ɛ̄gbā kpó kwú mla iyī nū.” 15Amáŋ Óndú ā da ɔ́ kahíníī, “Nyɔ̄, ohígbū ka ó wɛ ɔ̄cɛ nɛ̄ n le fu kóō cɛ̄ um ɛhɔ̄, kóō yá ká aílɔ́wá, aɔ́cɛ́ mɛ́mla ācɛ kú Ísrɛ̄lu kéē lɛ iyē kú um jé. 16Ohígbū ka, Ami abɔ̄yī um géē mafú lɛ ɔ́ ɛ́gɛ́nɛ̄ ó géē móōwē nɛ̄hi piíí ohígbū um ā.” 17Anɔ́ɔ Ananíyāsi le yɛ, le bēhé ga ipú inu ɛga nɛ̄ Usɔ́lu yɔ̄ ā. Ó kwú abɔ̄ ú ce ɔ́ ɛyí, anɔ́ɔ ó kahíníī, “Usɔ́lu, ɔyínɛ́ um, Óndú ā Ujísɔ̄si nōo wā ɛgiyí uwɔ ɔwɛ ɛga nāa yɛ ŋmá ā, lɛ um tɛ̄hɔ̄ wā, cɛ́ɛ́ ká ā gbɔɔ́ ō mɛ́ɛbɛ kpɔ́, ká ā klla le mu mla Alelékwū Ihɔ.” 18Anɔ́ɔ ɔkwɔɔkwu ɔ́ɔmā, odée nōo lɛbɛ̄ɛka āpū ā gāājɛ ŋmá eyī kú Usɔ́lu, anɔ́ɔ ó gbɔɔ́ ō mɛ́ɛbɛ kpɔ́ á. Ó cāŋjɛ anɔ́ɔ é lɛ ubatísim yá ɔ̄ á. 19Igbīhi ɛ̄nyā ó le ɔdōlé lé, anɔ́ɔ ó le ɛ́nyɔ́ má á.
Usɔ́lu tɔ́ɔna Udamásikɔ̄si
Ó yɔ̄ mla ayíkpó nēe bá Udamáskɔ̄si ā ɛ̄cī alɛwa. 20Ó le tá ipú ɛgogbɔ̄ɔkɔ ā gbɔɔ́ ō tɔ́ɔna kú Ujísɔ̄si ka ɔ́ɔ wɛ Ɔyínɔ̄nyīlɔ kú Ɔwɔicō. 21Anɔ́ɔ odúúdú ācɛ nēe pó ɛlā kú nū ā le kpó hídáagó, bá ī dɔɔ̄kā kahíníī, “Ó wɛ ɔ̄cɛ ā yɔ̄ ī kpó ācɛ nēe gbā Ujísɔ̄si ɛ̄gbā ā ŋmó ipú Ujerúsālɛm ā yɔ̄ ā ŋ́ nɛɛ? Ó wā amānyā ohígbū ɔdā ékpó nyā ŋ́ nɛɛ, kóō lɛ uwá kpó kwú gé lɛ aótrɛ̄yí kú ācogwɛ́ɛya ŋ́ nɛɛ?” 22Amáŋ ɔna kú Ɔ̄kōolɔhi nɛ̄ Usɔ́lu yɔ̄ ī tá ā le lɔfú iyē nɛ̄ɛ̄nɛ̄hi. Ɔfú kú Usɔ́lu klla gɔbū fíyɛ́. Anɔ́ɔ ɔwɛ nōó gē mafú ka Ujísɔ̄si ɔ́ɔ wɛ Ohɔ́nyɛtá cēyī gēdēē nɛ̄ɛ̄nɛ̄hi nōo yá kú ācɛ Ujíyu nēe bá Udamásikɔ̄si ā kéē má ɛlā dúú ka mla anú glá ŋ́. 23#2 Ukɔ́r 11.32,33Eko nɛ̄ ɛ̄cī alɛwa le gla ā, ācɛ Ujíyu lɛ ujɔ̄ tū kéē ŋmó ɔ̄. 24Amáŋ Usɔ́lu lɛ ujɔ̄ kú uwā ā jé. É gē gbō okónu igá kú igelī nɛ̄ŋcɛ́ ā otú mla ɛnɔ kéē lɛ ɔ́ ŋmó. 25Amáŋ ayíkpó kú nū kwú ɔ̄ ú tá ipú ómblí, kwú ɔ̄ ú bī gla ɛyí ɔ́gba kú igelī ā wā ajɛ otú éyi.
Usɔ́lu yɔ̄ Ujerúsālɛm
26Eko nɛ̄ Usɔ́lu gā Ujerúsālɛm ā, ó tíne kóō wā í tá ipú ayíkpó ā. Amáŋ é yúufi nū ohígbū kéē cɛ̄ kóō wɛ ɔyíkpó ŋ́. 27Amáŋ Ubánābasi kwú ɔ̄ ú, anɔ́ɔ ó lɛ ɔ́ bī wā gé lɛ ācotɛ̄hɔ̄ ā. Anɔ́ɔ ó le da uwá ɛ́gɛ́nɛ̄ Usɔ́lu má Óndú ā ɔwɛ lɛ ā. Ó da uwá ka Ondú ā kē le ɛlā ka mla anú dúú. Ó klla da uwá ɛ́gɛ́nɛ̄ Usɔ́lu bī iyē kú Ujísɔ̄si tɔ́ɔna pāālā ipú Udamásikɔ̄si lɛ ā. 28Anɔ́ɔ ayíkpó ā mīyɛ Usɔ́lu, anɔ́ɔ ó gbɔɔ́ ō nyíliyētá ipú uwā, gē ga ɛga dóódu kú Ujerúsālɛm yɔ̄ ī tɔ́ɔna kú ɛlɔ̄ɔwɔicō o ŋmá lɛ iyē kú Óndú ā. 29Ó klla kɛlā gē táafú mla ācɛ Ujíyu nēe ī ka Ugríiki ā, amáŋ é dɔɔ̄kā ɔwɛ nēé géē lɛ ɔ́ ŋmó. 30Anɔ́ɔ eko nɛ̄ ayínɛ́ ā lɛ ɛ̄nyā jé ā, é kwú ɔ̄ ú ga ajɛ kú Usísarīya, anɔ́ɔ é le ɔ̄ bītá ga ajɛ kú Utásɔsi.
31Anɔ́ɔ odúúdú icɔ́ɔci nēe bá ajɛ kú Ujúdíya mɛ́mla Ugálīli mɛ́mla Usamérīya lɛ ɛbɔ́ lɛ, é klla lɔfú lɛ fíyɛ́. É yēeyī ipú ufi kú Óndú ā, Alelékwū Ihɔ ā tá uwā abɔ̄. Anɔ́ɔ é le nyīla ikpó ācɛ á.
Upíta nyā ācɛ tá ajɛ kú Ulída
32Upíta yɔ̄ ī yɛ ɛbɛɛbɛ, anɔ́ɔ ɛ̄cī éyi ó gā ɛgiyí ācocɛ̄lɔ̄wɔicō nēe lā ajɛ kú Ulída ā. 33Abɔ́ɔ nɛ̄ ó má ɔ̄cɛ éyi nēé hī ka Énesi nōo húmáyī gwutá ɛyí agōdō iháyí ahātá. Ɔŋmɛ́ɛŋmɛ́ɛ le iyē yá ŋmɛnɛŋmɛnɛ. 34Anɔ́ɔ Upíta da ɔ́ kahíníī, “Énesi, Ujísɔ̄si Ohɔ́nyɛtá lɛ uwɔ hɛ́tá ɛɛ́, cāŋjɛ ká ā lɛ agōdō kú uwɔ yá.” Anɔ́ɔ ɔkwɔɔkwu ɔ́ɔmā ó cāŋjɛ. 35Odúúdú ācɛ nēe lā ajɛ kú Ulída mɛ́mla Ussárɔn ā le ɔ́ má, anɔ́ɔ é cɛ̄ɛ̄lā kú Óndú āá.
É lɛ Udɔ́kasi héyī ŋmá ɔlékwū
36Eko nyā, ajɛ kú Ujɔ́pa, ɔyíkpó ɔ̄cɛnyā éyi yɔ̄, nēé hī ka Utabíta, nɛ̄ ɛyí nū le ka Udɔ́kasi. Ó le odúúdú eko kú nū táajɛ yɔ̄ ī yá ɔdā olɔhi klla yɔ̄ ī tá ācɛ ogbɛhá abɔ̄. 37Ɛ̄cī éyi ó gbɔɔ́ ō doōcē, anɔ́ɔ ó gekwú á. É lɛ ɔ́ iyē gwā, kwú ɔ̄ ú ga inīcō. 38Abɔ̄ Ulída í ligbó lɛ Ujɔ́pa ŋ́ mā, eko nɛ̄ ayíkpó ā le pó ka Upíta ɔ́ɔ yɔ̄ abɔ́ɔ ā. É le ācɛ ɛpa tɛ̄hɔ̄ fu ɔ́, kéē le ɔkɔ gbā lɛ ɔ kɔ́ɔ̄ wā fíya fíya. 39Anɔ́ɔ Upíta cāŋjɛ le yɛ mla uwá. Eko nōó gā ajɛ ā, é le ɔ̄ bī ga inīcō. Odúúdú anyōkwū ā háyi pī ɔ̄ bá ī jikwū, anɔ́ɔ é le úwé ɛháajɛ mɛ́mla ɛhícō nɛ̄ Udɔ́kasi gɔ́ lɛ uwá eko nōó yēeyī ā kpó mafú lɛ ɔ́. 40Amáŋ Upíta lɛ odúúdú uwā nū gɛɛcɛ, anɔ́ɔ ó lɛ okwúukwu kpó kwajɛ le ɔkɔ gbā lɛ Ɔwɔicō. Anɔ́ɔ ó le eyī pīya má okwū ā, anɔ́ɔ ó kahíníī, “Utabíta, cāŋjɛ.” Anɔ́ɔ Utabíta lɛ eyī nwūla á, abɔ̄ ó lɛ Upíta má ā, ó má pīya yāajɛ. 41Upíta le abɔ̄ nāndaa, kwú ɔ̄ ú nyāŋjɛ háyicō. Anɔ́ɔ ó lɛ ācocɛ̄lɔ̄wɔicō mɛ́mla anyōkwū ā kpó hīgwú, anɔ́ɔ ó le ɔ́ mafú lɛ uwá kóō oyēeyī á. 42Ɔ̄kā nyā le nyīla ga odúúdú ajɛ kú Ujɔ́pa, ācɛ alɛwa kē cɛ̄ɛ̄lā Óndú ā. 43Anɔ́ɔ Upíta yɔ̄ Ujɔ́pa ɛ̄cī alɛwa ɔlɛ́ ɔ̄cɛ éyi nēé hī iyē nū ka Usáyímɔ̄ni, oyúklɔ́ ɔkpɛ́bɛ́.
Šiuo metu pasirinkta:
ÚKLƆ́ KÚ ĀCOTƐ̄HƆ̄ 9: IFBCL
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The Bible Society of Nigeria
Sužinoti daugiau apie Ubáyíbu kú Idɔma