Yoswa 5
5
Eshishebo nende Ipasaka eGiligali
1Olwa abaruchi bosi babaAmori abali injelekha waYorodani mumbo, nabaruchi babaKanaani abali hanyanza, bahulila shinga OMWAMI olwa yakhamia amatsi kaYorodani imbeli wabaana baIsiraeli, okhuula olwa bali nibaambuushe, emioyo chiabwe chiayengukha, kata shibalikhwo neitswoni yosi khandi ta, khulwa abaana baIsiraeli.
2Mundaalo etsio OMWAMI yaboolela Yoswa ari Obaatse amachina emibano, oshebe abaana baIsiraeli olwakhabili. 3Kho Yoswa nabaatsa amachina emibano, nasheba abaana baIsiraeli eGibeatsi-haaralotsi. 4Ne lino nilio eliachila Yoswa nabasheba; mbu abandu bosi abarula muMisiri abali abeshisaatsa, nibo abasaatsa bosi belihe, bali nibafwile mushitsiimi khunjila, olwa bali nibarulile eMisiri. 5Okhuba abandu bosi abarulamwo bali nibashebwa; ne abandu bosi abeebulilwa mushitsiimi khunjila olwa bali nibarulanga muMisiri, shibali nibashebwa ta.
6Okhuba abaana baIsiraeli bachenda emiyika amakhumi kane mushitsiimi, okhuula elwa lihanga liosi, nibo abasaatsa belihe abarula muMisiri, bali nibasishile pe, shichila shibahulilanga amakhuwa kOMWAMI ta; ne nibo aba OMWAMI yeetsubila mbu shiyakhabafuchiilila okhulolakhwo eshialo eshia OMWAMI yeetsubila abakuuka babwe mbu yakhakhuheelesia, eshialo eshiitsuulemwo amabeele nobuushi. 7Ne abaana babwe, aba yabuusia mushilenje shiabwe, nibo aba Yoswa yasheba; okhuba bali abasinde, shichila shibali nibabashebela khuniila ta.
8Ne olwa bali nibamalile okhusheba lihanga liosi, beekhalayo mukambi okhuula olwa bali nibahonile. 9OMWAMI namusunjila Yoswa mbu Leelo luno eselenjesiye tsiseni tsiaMisiri, tsimurulekhwo. Niko akachila habundu yaho nihalangwa mbu Giligali, okhuula olwa leelo.
10Abaana baIsirseli nibakhupa ikambi yabwe eGiligali; nibakhola ipasaka khunyanga yelikhumi nakhane eyomumwesi okwo, khubwile, ebweneyo hamuhololookhwe kwaYeriko. 11Ne mukamba okwalonda khupasaka nibalia khumele yeshialo eshio, mbu amaandasi akabulamwo amamela, neimele inziyile, khunyanga yeneyo. 12Mana mukamba, olwa bali nibaliile khumele yeshialo eshio, imana yaakama; kata abaana baIsiraeli shibalikhwo neimana khandi ta; ne omuyika okwo balia khubiamo bieshialo shiaKanaani.
Yoswa nende entundu owali nolukanga mumukhono
13Kho olwa Yoswa yali nali ahambi nende Yeriko yachinguula tsimoni nahenga; ne lola, ngwoyo, omundu nasinjiileho nahengana ninaye, nali nolukanga mumukhono, olutsomoolwe muluula. Yoswa natsia namureeba mbu Oli khulubeka Iweefwe, nohomba khulubeka lwabakhunyasinjia? 14Naye ari 'A, tawe; habula enzitsile bulaano shinga olwa endi omuseesia welihe liOMWAMI Yoswa nasikama nabunamia obweni hasi, namwinamila, nareeba mbu Omwami wanje, aka oboolela isie omusumbawo kali karie? 15Omuseesia welihe liOMWAMI namusunjila Yoswa mbu Wifwalule ebilaaro mubilenjebio, okhuba habundu aha osinjiile nahatakatifu. Naye Yoswa nakhola ario.
Oluluyia Union Version © Bible Society of Kenya 1975