2 Tesalonika 3
3
Zitaa àꞌíjʉ vɨɨ
1Àsìjʉ, adrímà kristiani lá, àmɨ zí àma yɨ́ Orɨ nɨ ànɨ ɨ̀rɨ fè eꞌyo Opɨ awo vɨɨ ɨ̀rɨ ɨre nɨ ꞌba ɨ̀sɨle yɨ̀ mbèlèmbele díká ɨ̀rɨ ca ìnzìzà drʉ, kɨ̀le ɨ̀rɨ nɨ ndráánɨ́ ꞌole àmɨ ɨ̀sɨlɨa vɨɨ lé benì. 2Díká àmɨ zí ɨ̀rɨ ànɨ ɨ̀rɨ òpa àma ꞌba eꞌyoonzɨ ꞌole díká así be onzɨ vɨɨ ɨnɨ gíá vɨɨ yɨ̀ ra benì, àrɨ̀yɨ̀kʉ ꞌba àꞌɨ̀taa ko vɨɨ ɨnɨ òꞌbɨ́ányá drʉ. 3Te Opɨ nɨ àꞌɨ̀taa be díká ɨ̀rɨ nga àmɨ yɨ́ òkpo fèe àloo àmɨ àgapí tèe ꞌba asíònzɨ be vɨɨ ɨnɨ bʉ yɨ̀ ra. 4Díká Opɨ fè àma trà eꞌyo àmɨ nɨ ꞌole vɨɨ ɨnɨ yɨ̀ ra díká àma àtì ra kɨ́nɨ̀ àmɨ ngaa eꞌyo àma nɨ àzílé àmɨ yɨ́ vɨɨ ɨnɨ ꞌo ra. 5Opɨ ɨ̀rɨ ce àmɨ asísílé drì lètaa Orɨ awo vɨɨ yɨ̀ díká ovʉjʉ así tezà Kristo nɨ fèle vɨɨ alɨa.
Bílé lɨzà eꞌyo àzí nɨ vɨɨ drìa vɨɨ
6Rú Opɨ Yesu Kristo awo vɨɨ yɨ̀, àma àmɨ azíi adrímà kristiani lá, àmɨ oná àmɨ kristiani ɨ̀gɨ̀ be lèle àzí ngale kʉ, díká ɨmbataa#3:6 Nòsɨ̀kʉ aꞌbɨ. àma nɨ ɨmbale àmɨ yɨ́ kɨ̀nɨ̀ àmɨ ngá àzí òkpo yɨ vɨɨ butia òbɨ̀le kʉ vɨɨ ɨnɨ yɨ̀ ra. 7Àrɨ̀yɨ̀kʉ àmɨ ngʉlʉpɨ nì ra lè àmɨ òbɨ́ ɨ̀cetaa àma ꞌyowa vɨɨ butia ɨ vɨɨ ra. Àma ovʉʉ ndráá ɨgɨ nɨ kʉ àma nɨ ovʉrɨa àmɨ ɨsɨlɨa, 8káꞌdí àma nyaa ꞌba àloo awo tà náni òfèa kokò drʉ kʉ. Ɨ̀ndɨ̀a ráaka, àma rɨ àzí nga òkpo yɨ̀, iní ɨnɨ ìtú be àma tàmbajʉ ànɨ àma ovʉ́ térí drʉ àmɨ drìa kʉ benì. 9Àma ꞌo eꞌyo ꞌdɨ̀vɨɨ vɨ́nɨ, ovʉʉ ꞌbènɨ̀à àma òkpo ɨcojʉ àzàkoma àꞌíjʉ àmɨ bʉ yʉ vɨ́ɨvɨɨ kʉ, te àma rɨ ꞌo vɨ́nɨ azílé àma ovʉ́ ɨ̀cetaa drʉ àmɨ yɨ́, àmɨ nɨ ànɨ eꞌyo ndee butia òbɨ̀jʉ benì. 10Àrɨ̀yɨ̀kʉ káꞌdí ndráánɨ́ àmanɨ ovʉrɨa àmɨ be, àma fè àmɨ yɨ́ àzítaa ꞌyole kɨ́nɨ̀, “ꞌBarʉʉ àzí ngale kʉ vɨɨ, lè ɨ̀rɨ nya tà kʉ” vɨɨ ra. 11Àma ɨrɨ ꞌbènɨ̀à àmɨ alóo ɨnɨ ɨgɨ nɨ. Ngáá àzí àlowa kʉ, te ráa ɨ rɨ ací ꞌba alóo ɨnɨ drì òmva ꞌyowa àzí tia ɨ ka. 12Àma lè ꞌba ꞌdɨ̀vɨ́ɨvɨɨ ɨnɨ azí díká ɨnɨ bílé lɨ rú Opɨ Yesu Kristo awo vɨɨ yɨ̀, ɨnɨ ngá azí ɨnɨ nɨ ngajʉ kasòjʉ ànɨ ka drìa àloo afa ɨnɨ lèle vɨɨ ɨnɨ isújʉ ànɨ òkpo yɨ̀. 13Díká àmɨ ɨ, adrímà kristiani nɨ, lè àmɨ àndé eꞌyo ònyɨ̀be ꞌozà yɨ̀ kʉ.
14ꞌBarʉʉ àloo tè eꞌyo àma nɨ sɨ̀le waragà ꞌdɨ̀vɨɨ alɨa vɨɨ butia òbɨ̀ɨ kʉ, lè àmɨ ndré ɨ̀rɨ kílílí. Àmɨ ovʉ́ ɨ̀rɨ be kʉ, ànɨ ɨ̀rɨ isú drìnza benì. 15Te àmɨ ꞌdú ɨ̀rɨ kɨ̀le àrɨꞌboo lé kʉ, lè àmɨ fé ɨ̀rɨ yɨ́ ɨmbataa kɨ̀le àma àloo lé.
Azítáá àsìjʉ vɨɨ
16Ànɨyɨ̀ Opɨ asíánzʉ́ nɨ vɨɨ ɨ̀rɨ fè àmɨ yɨ́ asíánzʉ́ sawà drɨ́á yɨ̀ díká léti drɨ́á yɨ̀. Opɨ ɨ̀rɨ ovʉ àmɨ be drɨ́á.
17Ma ɨ, Paulo ɨ, ma sɨ̀ zitaa ꞌdɨ̀vɨɨ ma gí yɨ̀, ꞌdɨ̀vɨɨ ɨ̀rɨ ɨ̀cetaa manɨ rɨjʉ waragà ma nɨ sɨ̀le vɨɨ ɨnɨ dejʉ vɨɨ ɨ.
18Asíndrɨ̀zà Opɨ àma ꞌyowa Yesu Kristo awo vɨɨ ɨ̀rɨ ovʉʉ àmɨ be drɨ́á.
© Wycliffe Bible Translators, Inc., © SIL Uganda, All rights reserved