Matthew 9
9
Jisü no Aphimpi Ithamlave kemi Lakhi Shipivi
1Jisü no ashuka lo iku no ayizükucho hechesü pa likhi paw mishiphu lo ighi. 2Ikelo timi khami no ayephu lono aphimpi ithamlave kemi lakhi pa lau saighi. Kughou Jisü no panongu küpülü ithulu keno, pa no aphimpi ithamlave keu vilo ishi pi, “Anu, amlo mutolo, oxinéqo qhivetsüae.”
3Hipau lo ayeza kükütsümiqo khami no pano likhi pano vilo ishi pia, “Timi hipau ye Alhou pipütha anie!”
4Panongu kükümsü ithive no Jisü no ishi pi, “Nongu ye kushiye nongu mulo lo küsakügha kükümsüqo kümsü acheni kea? 5Khikhiu no akümláu kea: ‘Oxinéqo qhivetsüae,’ ipikeu no keo, ‘Ithuve no alà chelo,’ ipikeu no kea? 6Ikemu ino nongu pelo ithi penishi akeu ye Timi Nu ye ayeghi lo axinéqo qhivetsülu kepu kükagha anie.” Ike pa no aphimpi ithamlave keu vilo pi, “Ino ovilo piani, ithulo, ozüa ikhipesü aki lo wovelo.” 7Ikelo ye timi hu no ithu püzü aki lo wove. 8Kughou timi aqokitikhi no hipau ithulu keno panongu ye akichiqhive eno panongu no Alhou no hitoi keu kükagha pesü timi tsükeu ghenguno Alhou sheqhe.
Matthew Kulù Keu
9Jisü no tipau-a qhive no wuche kelo, pa no timi lakhi Matthew ipikeu zame küqhauʼw hiyam lo iqa aghí keu ithulu. Jisü no pa vilo, “Ipapelo,” ipi kelo Matthew no ithu püzü pa papesü wuve.
10Jisü no Matthew ki lo avela ghulhu chu akelo zame küqhami eno achineye lo amlo tsüchemo kemiqo kutomo ighino pa eno pa khopemiqo gholo chu-sho ae. 11Kughou Phariseemiqo no ti ithulu keno panongu no Jisü khopemiqo vilo ishi iniju, “Nongu kükütsüu ye kushiye zame küqhami eno axinemiqo gholo chu-sho ani kea?”
12Hi chilu kelo Jisü no ishi pi, “Küsükinimi no kumo aye ashi-ajì vi akemi ye shikipivimi avehupu shichemoe. 13Ikemu wulo eno atsa hipau kiqi ye kiu keno ithilulo: ‘Ni ye kimiyekini lunishi cheni ke thono aghakishi kumoe.’#9:13 Hosea 6:6 Kughengu ni ye achipiumikuchomiqo ku niye ighimoe ikemu axinemiqo ku niye ighike.”
Kümvü keu Vehu Jisü Vilo Iniju
14Tipathiu John khopemiqo no ighino Jisü vilo ishi iniju, “Kíshi püzü Phariseemi ngò ninguqo ye müamzü kümvü acheni püzü okhopemiqo ye kümvü chemo kea?”
15Jisü no khochile, “Külakupu lo kusüpüa kemiqo ye külapuu no panoqo gholo aphi lono kíshi no amloküsa shi apeni kea? Külapuu ye panoqo gholo no ikhisüwuve kepu do ighi nani; tipathiu no panongu no kümvü nani.
16“Khunomu aphì akithé pesü aphimini aqa shou pukhoda puku chemoe, kughengu aphì kithé ye sükütsüve no aphimini aqa hu süxü kitheve cheni. 17Momu timi khumu atsaizü akithé pesü ashiyikohughi aqaqo lo lesü chemoe. Panongu no tishiaye ashiyiko mpakhove no atsaizü peleve nani eno ashiyikohughiqo ye kütsave nani. Ikehu, kümtsü no atsaizü akithé süwo ashiyikohughi akitheqo lo sǘ cheni, eno tiküma kinikujo qhipüalu cheni.”
Jisü no Angá Lakhi Thive keu Xüputhu eno Totimi Lakhi Sǜ akeu Shipivi
18Jisü no hipau tsà pi akelo, synagog lo sakiphemi lakhi ighino pa zülo qhoqhünhe pe ngo no ishi pi, “Ingá ye itehi no thivae. Ikemu ighi püzü li shou o-u be tsülo, eno li ye xüluve nanie.” 19Jisü eno pa khopemiqo no puthughove no pa gholo wu.
20Tishi kemtsa totimi lakhi ampe chighikini ajì poache keu hu no Jisü thiu no ighi püzü paw ubephi kighikipili she lo bue. 21Li no li likhi pütsa ghi ishi pi, “Ino paw ubephi kighikipili she likhimu bulu aye, ni ye viluve nani.”
22Jisü no idewo ju eno li ithulu ikelo pa no ishi pi, “Angá, amlo mutotoilulo, oküpülü no oshipivivae.” Tipau mütsa lono totimi hu ye viluve.
23Kughou Jisü no synagog lo sakipheu ki lo iloghi no timiqo no mubumghui eno fuliliqo igha akeu ithulu keno, 24pa no ishi pi, “Wukhavelo. Angá hipau ye thimphie ikemu zü anie.” Ikemu panongu no Jisü junuqhie. 25Timiqo pelo khalau ipekhave pe kethiu, Jisü no achebo lo ilo püzü angá hu a-u lono sünheputhu, eno li no ithughive. 26Hipau sütsa tipau ko-aqha kümtsü lo külha wove.
Jisü no Anhethi Kighichemi eno Amilitshü Kemi Shipivi
27Jisü no tipau-a qhive no wuche kelo anhethi kighichemi kini no pa papesü ighino ishi ighamuku, “O David Nu, nikujo kimiyekütü tsülo!”
28Kughou Jisü no aki alou ilove keno, anhethi kighichemi pama no pa lau ighi, eno Jisü no pama vilo ishi iniju, “Ni ye hipau shilu nani kepi nokujo ye pülü anima?”
“Iyei, Ampeu,” ipi pama no khochile.
29Ikelo Jisü no pama nhethi buve tsü püzü ishi pi, “Nokujo no pülü akeu kiqi lono tishilu peniu”; 30ikelo pama ye ithulu kitheluve. Jisü no akumtoshi pama pikichive ghi ishi pi, “Timi khuu pelomu hipau ithipe kevilo.” 31Ikemu pama no tile no wuve püzü Jisü ghili pesü tipau ko-aqha kümtsü lo külhave tsü.
32Pama no khalau ipeve che kelo, tüghaküsa no tsügha pesü atsa pimla no akemi lakhi Jisü lau saghi. 33Eno kughou tüghaküsa hapheve keno, atsa pimla no akeu timi hu ye atsa piluve. Timi aqokitikhi hu ye akümzave no ishi pi, “Hitoi keu ye Israel lo khilemu ithumla aphie.”
34Ikemu Phariseemiqo no ishi pi, “Hiye tüghaküsaqow kükapuu küká vechewo tüghaküsaqo haphe anie.”
Ajumiqo ye Aghulo Likhie
35Jisü ye mishiphu eno aphuqo kümtsü lo wu no synagogqo lo kütsü, akükaqha sütsa kiviu pesü asheshu eno küsükinimi ngò aküsǜ jeli kümtsü shipivi ae. 36Kughou pa no timi aqokitikhiqo ithulu keno, pa mulo ighiqhiyive, kughengu panongu ye akheu küha keu ambe toi avehu küghüzü shi eno aveküsa shi ake. 37Ikehu pa no pa khopemiqo vilo ishi pi, “Ghile hu kepu ye kupukuno shi ani ikemu ajumi ye aghulo likhi anie. 38Tighenguno ghile Mipeu vilo pa lu lo ajumiqo puhu tsü penike inikhulo.”
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
