Matthew 10
10
Jisü no Akhopemi Chighikini Puwu
1Jisü no pa khopemi chighikiniqo pa lau ku puwu, eno mithekumo ghungúqo haphelu pe nikeu, küsükini eno aküsǜ jeli kümtsü shipivilu pe nikeu kükagha pesü panoqo tsüe.
2Apostolmi chighikini je ye hipaqo ke:
atüghiu no, Simon (Peter ipi ku chekeu) eno pa thiküzüu Andrew;
Zebedee nu James, eno pa thiküzüu John;
3Philip eno Bartholomew;
Thomas eno zame küqhau Matthew;
Alphaeus nu James, eno Thaddaeus;
4Azá yeghi kimiye kicheu Simon eno Jisü thechuve keu Judas Iscariot.
5Jisü no pano chighikini vilo hitoi tsaqütsalei pi püzü puwu: “Jewkumomiqo gholo wu kevilo momu Samariamiw mishiphuqo lakhi lomu ilo kevilo. 6Tishini ke züqhu lo Israelmi ambe toi pühape akeqo lau wulo. 7Nongu no wuche kelo, hipau kükütsü tsà pesü asheshulo: ‘Kungugha kükaqha ye kupunú ighivae.’ 8Küsükinimi shipivilo, kithimi xüputhulo eno apügha kupumiqo shikimthelo, tüghaküsaqo haphelo. Nono kümsá lono ithulu keu toi; ame lumo no tsülo.
9“Shuna, ghükayi momu asapuyi pesü nongu pokhaqo lo pusü wu kevilo— 10aghüzüla ghenguno jolabo, aphiküzü xakili kepu, apukhukuqho momu aküsǘ pe kevilo, kughengu akümlàmi lakhi ye pa no kiu avehupu shini keno ithulu küzü ke. 11Nongu no mishiphu momu aphu lo ilo kelo gihu küzüpumi phujulo eno nongu no aphughi qhimo ke kutólo pano ki lo ngolo. 12Nongu no aki lo ilo kelo, panongu sasü petha shilo. 13Tsalá aki tipau lo akemi no aküzüpushi aghí aye, tile alokiqi qhitsülo; ikemu aküzüpushi aghimo aye nongu lokiqi pelo nongu lau idechile ighive pelo. 14Tsalá khiuala no nongu sasümove momu, nongu tsà initsümove aye, aki momu mishiphu tipau qhivelo eno nongu pukhu müzá lo ayeghimukhu kukhuqhivelo. 15Ino kuchou tsà nongu vilo pìní, küghakütha tsalà lo mishiphu tipau ye Sodom ngò Gomorrah nguno alau ghimeqhi nani.
16“Julo ino nongu pelo ambe no tüngtügha gholo ilolu aketoi puwu anie. Tighenguno nongu ye apighi toi tsükhutsüvai shilo eno amiqhiqo toi ivünhei shilo. 17Nolikhi nongu khekuto alo; nongu pesü no-a lo mijetsümiqo u lo sǘve no synagogqo lono nongu küzaqhi nani. 18Ije ghenguno, nongu sasü angh eno kükamiqo zülo wu nani eno panoqo ngò Jewkumomiqo lau ishepe shi nani. 19Ikemu kughou panongu no nongu küghaluveni keno, kiu pìní momu kíshi pìní keno amlosa kevilo. Tipau tüqhüdo lono nongu no kiu pi kepu keno tsü nani ke. 20Kughengu nongu no pimo nani, ikemu nongu pa Pù Ghungú no ovechewo pi nani.
21“Athiküzümi dolo no thechu shive no pìthíve nani, eno titoi apù ngo anu dolo thechu shive no pìthíve nani; anuliqo no panongu pù-azá mujochile nani eno panoqo pìthíve nani 22Ighenguno timi kümtsü no nongu mithi nani, ikemu khuno no ashekha kutólo mutotoi puthugho aghíni keno xaluve nani. 23Kughou a-a lakhi lo nongu pishipujuni keno, a-a kütau povelo. Ino kuchou tsà nongu vilo pìní, nongu no Israel lo mishiphuqo lo wukha miphi lono timi nu ye ighive nani.
24“Kiphimi lakhi ye shikükau shou kumoe, momu aqeu lakhi ye pa mpeu nguno akijeu kumoe. 25Kiphimiqo ghengu ye panonguw shikükami toi shilu keu no kughomoe, eno aqemiqo ghí pa mipeu toi shilu keu no kughomoe. Tsalá akibo lo akütsü shi akeu vilo Beelzebul ipi ku cheghí aye, akibolomiqo vilo ye tinguno alhoküsau aje kiu ku nani kea?
26“Tighenguno panonguqo müsà kevilo, kughengu tilehi lakhimu pephemo keu shimo nani eno küsüpüa keu lakhimu piyemo keu shimo nani. 27Ino àküzǘ lono nongu vilo kiu pìní keno, atsala küvü lono pilo; tuqhou no nongu kìní lo kiu pisüpüa keno aki kütsüqaqo lono asheshulo. 28Khunoqo aphimpi pìthíve tsülu nani kemu angulho pìthíve tsü müla nani keno tipaqo müsà kevilo. Tishini ke züqhu khuu no aphimpi eno angulho kinikujo amiyizü lono kütsave kulupu ani keno tipau hu müsàlo. 29Tüghashoqhe kini ye ame aghulo lono je cheni ke kumo keshea? Ikemu nongu pa Pù no pulotsümo kelo ye panongu lakhimu ayeghi lo ikiqive pe chemoe. 30Eno nongu kütsü lo asà akeu kutólo kümtsü kihipe ani. 31Tighenguno müsà kevilo; nongu ye tüghashoqhe kutomo nguno amekushou ke.
32“Khunoqo no kütami zülo ije piphe tsüní keno, ni ghí kungugha lo I Pù zülo pa je piphetsü nani. 33Ikemu khunoqo no kütamiqo gizülo imiliveni keno, ni ghí kungugha lo I Pù zülo panoqo milive nani.
34“Ni ye ayeghi lo külakishi süghi niye ighi küghashi kümsü kevilo. Ni ye alokiqi pesü tsü niye ighike kumoe, ikemu akihizüta#10:34 Akihizüta kiqi ye aghükishi momu kijetha keu pesü piani. süghi niye ighike. 35Ino ighi keu ye,
“ ‘anu lakhi pelo papù lachile,
angá lakhi pelo pazá lachile,
amukishiu lakhi pelo pani lachile peniye ke.
36Timi lakhi ghümi kuchou ye pa likhi pa kibolomiqo no shi nani.’#10:36 Micah 7:6
37“Khuu no inguno alau papù momu azá kimiyeni keno, iw shiküzü kumoe; khuu no inguno alau panu momu pangá kimiyeni keno iw shiküzü kumoe. 38Khuu no paw kros xapumo no ipapeni keno ikhopemi shiküzü kumoe. 39Khuno no pano küxü phuluni keno pühave nani, eno khuno no ighenguno pano küxü tsüveni keno xaluve nani.
40“Khuu no nongu sasüni keno isasü ani, eno khuu no isasü keno ipuwu akeu sasǘ ani. 41Khuu no tungkupu lakhi ye tungkupumi kepi ikhiluni keno tungkupu saxu ithulu nani, eno khuu no achipiumikuchomi lakhi ye achipiumikuchomi kepi sasüni keno, achipiumikuchomiw qesaxu ithulu nani. 42Ino kuchou tsà nongu vilo pìní, timi khuu no ikhopemi gholo akitilau shi aghí namu pa ye ikhopemi kepi azü kumko ajikhu lakhi likhimu pesü tsüní keno, panoqo ye khilemu panow qesaxu pühamo nani.”
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
